Фæсконфликтон бæстонкæнынады фарстаты фæдыл Хуссар Ирыстоны Президенты æххæстбарджын минæвар Джиоты Мурат дискусситы минæвæрттимæ фембæлды рæстæджы банысан кодта, Женевæйаг дискусситы форматы раз цы хæстæ ис, уыдон ахсджиагдзинад æмæ актуалондзинад. Хуссар Ирыстон Женæвæйаг дискусситимæ бæттынц æгасæй регионы æдасдзинад æмæ стабилондзинад. Йæ ныхæстæм гæсгæ, уавæр кæд сабыр у, Женевæйы фæстаг раундæй фæстæмæ ницы эксцесстæ æрцыд, уæддæр махæн ницы бындуртæ ис, цæмæй бынтон æдыхст уæм. Мах, зæгъгæ, уынæм уый, æмæ Гуырдзыстоны къухдариуæгад Хуссар Ирыстоны ‘рдæм дарддæр кæй кæны йе ‘взидæнтæ, нæ нымæг кæны йæ агрессивон риторикæ, æмæ мах дæр уый катайы æппары.

Дарддæр Джиоты Мурат куыд радзырдта, афтæмæй арæнтæм æввахс районты уавæр дæр хуыздæрхъуаг у.

«Æрæджы уагъдцæуæг механизмты фæлгæтты фембæлды мах равдыстам стыр тыхстдзинад, Гуырдзыстоны фарсæрдыгæй Хуссар Ирыстоны территори дыууæ хатты æхсæнгарзæй æхст кæй цыд, уый тыххæй. Æхстыты фæстиуæгæн бахъыгдард сты арæнты амонæн ны-сæнттæ. Нæ амондæн дзы удзиан не ‘рцыд, уымæн æмæ уым цæрынц бынæттон цæрджытæ, уыцы бынаты службæ кæнынц арæнхъахъхъæнджытæ», — дзырдта Джиоты Мурат.

Йæ ныхасы кæрон ма банысан кодта, зæгъгæ, Женæвæйаг дискусситы фæлгæтты цы гуманитарон фарстытыл дзырд цæуы, уыдон сты актуалон æмæ сыл дарддæр хъæуы кусын. Джиойы фырт ныфс бавæрдта, Женевæйы радон раун-дмæ цæттæгæнæн куыст кæй уыдзæн фæстиуæгджын.

Женевæйы радон дискусситæм цæттæгæнæн фембæлды Евроцæдисы минæвар Тойво Клаар фыццаг хатт хайад исы ацы куысты. Цалдæр азы уый архайдта Гуырдзыстоны Евроцæдисы хъусдарджыты миссийы къухдариуæггæнæджы бынаты. Уый банысан кодта Фæскавказы æдасдзинады фæдыл Женевæйы дискусситы ахсджиагдзинад. Æхсызгон мын у, зæгъгæ, уæ ныхæстæ хъусын  женевæйаг формат æнæмæнгхъæуæг æмæ ахсджиаг кæй у, — уый фæдыл.

ИНО-йæ æмсæрдар Антти Турунен дæр ныфс бавæрдта дискусситы фæл-гæтты æнтыстджын куыстæй.

«Мæн ныфс ис, æмæ женевæйаг процессы фæлгæтты æмæ механизмты куысты цы контекст арæзт æрцыд, уый руаджы нын фадат кæй уыдзæн размæ цæуынæн. Бантысдзæн нын размæ акъахдзæф кæнын, æмæ уыцы раст къахдзæф ноджыдæр бафидар кæндзæн, тыхæй пайда кæй нал æрцæудзæн, уыцы принципыл иузæрдиондзинад», — банысан кодта ныхасгæнæг.

ЕÆÆО-йæ æмсæрдар Гюнтер Бехлер куыд загъта, афтæмæй механизмты куысты фæлгæтты «рæвдз бастдзинады» руаджы бæстон æрцыд 52 фарсты. Дискусситы куыстыл дзургæйæ, Бехлер банысан кодта, кæй сын уыдзæн конструктивон фæстиуæг.

 

ФЕМБÆЛДÆН ХАТДЗÆГТÆ АРАЗГÆЙÆ

Фæкавказы æдасдзинады фæдыл Женевæйаг дискусситы хайадисджытæ се ‘ппæт дæр банысан кодтой хуссарирыстойнаг делегацийы уæнгтимæ фембæлды ахсджиагдзинад.

Фембæлдæн фæстиуджытæ аразгæйæ, информацион фæрæзтимæ чысыл брифинджы рæстæджы Евроцæдисæй æмсæрдар Тойво Клаар куыд банысан кодта, уымæ гæсгæ Женевæйы дискусситы радон раундмæ цæттæгæнæн куыст уыд фæстиуæгджын. Мах, зæгъгæ, фаг æнтыстджынæй æруынаффæ кодтам, радон дискусситы цы фарстытыл дзырд цæудзæн, уыдоныл.

Евроцæдисæй æмсæрдар растыл нæ банымадта, æрæджы Хуссар Ирыстон æмæ Гуырдзыстоны паддзахадон арæнтыл æхсæнгарзæй æхсыны дыууæ цауы. Инциденттæ ма æруадзын æмæ сæм хъусдард здахыны фæдыл æрæджыйы фембæлды рæстæджы дæр дзырд цыд ацы фарстыл. Клаар куыд банысан кодта, уымæ гæсгæ исад халыны æнгæс цаутæ фæлхатт мауал хъуамæ æрцæуой. Фæлæ дипломат бынтон нæ фæазымджын кодта ацы хъуыддаджы гуырдзиаг фарсы, зæгъгæ, бынтон æмбæрстгонд нæу, кæцы фарсæй цыд æхст æмæ цы нысанæн.

Уый ма куыд банысан кодта, уымæ гæсгæ Женевæйы фæстаг раунды, тыхæй пайда кæй нал æрцæудзæн, уыцы принципыл иузæрдиондзинады фарстыл уынаффæ цыд конструктивон уавæрты.

«Фæлæ Женевæйы дискусситы радон раунды цы æрцæудзæн, ууыл развæлгъау ахъуыдыгæнæн нæй», — банысан кодта Тойво Клаар.

ЕÆÆО-йæ æмсæрдар Гюнтер Бехлер информацион фæрæзты минæвæрттæн радзырдта Хуссар Ирыстоны æбæрæгæй сæфт æмбæстæгты хъысмæты тыххæй.

«Женевæйы дискусситы æмæ механизмты фæлгæтты фембæлды рæстæджы мах раразмæ кæнæм ацы фарстытæ. Хæдбар эксперт Душан Игньятович ацы фарсты фæдыл бацæттæ кодта дыууæ хыгъды.  Уый декабры мæйы æрцæудзæн Гуырдзыстонмæ. Бабæрæг кæндзæн Хуссар Ирыстон дæр, фембæлдзæн Джиоты Муратимæ», — дзырдта Бехлер.

Йæ ныхæстæм гæсгæ, хæдбар эксперт æнгом куыст кæны Гуырдзыстоны къухдариуæгадимæ, æмархайд кæны Сырх Дзуары Дунеон миссиимæ ацы фарсты фæдыл æнтыстытæ къухы бафтыны нысанæн.

ИНО-йæ æмсæрдар Антти Турунен дæр йæ рады банысан кодта,  йæ куысты рæстæг кæронмæ кæй бахæццæ, уый. Уымæ гæсгæ йæ ныхасы уый фылдæр арæзта Женевæйы дискусситæн хатдзæгтæ.

«Женевæйы дискусситæ æмæ механизмты куыстыл иузæрдиондзинад фидарæй фидардæр кæны. Бирæ конкретон фарстатæ цæуынц бæстонгонд, бирæтæ — бынæттон æмвæзадыл. Хъуыддагон ныхас цæуы Женевæйаг дискусситы иуæй-иу фарстаты фæдыл. Мæ хъуыдымæ гæсгæ, уый ныфс дæтты, бирæ фарстытæ цадæггай бæстон кæй æрцæу-дзысты, уымæй. Æмæ мæ ныфс ис, фæстиуджытæ нæ къухы кæй бафтдзæн».

Дискусситы хуссарирыстойнаг делегацийы сæргълæууæг Джиоты Мурат куыд радзырдта, уымæ гæсгæ ацы фембæлдæй хуссарирыстойнаг фарсы ныфс ис радон раунды æнтыстджын куыстæй. Зæгъгæ, хорз уаид æмæ ацы раунды, рагæй фæстæмæ куыст цы иумиаг хъусынгæнинагыл цæуы, ома, тыхæй пайда кæй нал æрцæудзæн, уыцы принципыл иузæрдиондзинад, кæдæй уæдмæ æмразы æрцæудзæн, уымæн æмæ ныр кæронмæ фæхæццæ кæны. Джиойы фырты ныхæстæм гæсгæ, уыцы иумиаг хъусынгæнинаджы райсын ноджыдæр радон къахдзæф суыдзæн, тыхæй пайда кæй нал æрцæудзæн  уыцы стыр сразы-дзинадыл бакусынæн. Уыдонæн уыдзæн юридикон бæрнджын æмæ фидар дунеон гарантитæ.

Делегацийы сæргълæууæг ма банысан кодта, зæгъгæ, Женевæйаг дискусситы сæйраг хæс кæй уыд æмæ уыдзæн, æдасдзинад ифтонг кæнын æмæ Гуырдзыстоны ‘рдыгæй тыхæй пайда кæй нал æрцæудзæн, уыцы гаранти.

Къæбулты Марина

Comments are closed, but trackbacks and pingbacks are open.