РХИ-йы Æнæниздзинад æмæ социалон рæзты министрады уагъд æрцыд æмбырд, кæцыйы уынаффæ кодтой 2 азæй 6 азмæ сабиты, сывæллæтты цæхæрадæтты хъомылгæнинæгты диспансеризацийы фыццаг фæстиуджытыл. Уый тыххæй фехъусын кодтой РХИ-йы Æнæниздзинад хъахъхъæнын æмæ социалон рæзты министрады пресс-службæйы.

Банысан кæнын хъæуы уый дæр, æмæ Æнæниздзинад хъахъхъæныны министрад кæй уадзы диспансеризацийы хатдзæгты, диспансерон басгæрст рацæуджыты æмбæстæгты нымæц æмæ сбæрæггонд фæстиуджыты регулярон мониторинг.

Æмбырды куысты хайад райстой РХИ-йы Æнæниздзинад хъахъхъæнын æмæ социалон рæзты министры хæдивæг Плиты Агуындæ, Хуссар Ирыстоны æнæниздзинад хъахъхъæныны рæзты фæдыл УФ-йы уынаффæгæнæг, профессор, медицинон зонæдты доктор Игорь Галь æмæ поликлиникæты сæйраг дохтыртæ. «2 азæй 6 азмæйы онг сывæллæтты диспансерон басгæрст уагъд цæуы Цхинвалы ацы аз 11 апрелæй. Педиатртæ æмæ æндæр специалисттæн сæ бон ссис сывæллæтты цæхæрадæтты 1583 хъомылгæнинаджы басгарын. Æдæппт горæты сывæллæтты цæхæрадæттæм цæуынц 2629 сывæллоны 2 азæй 6 азмæ», — радзырдтой пресс-центры.

Республикæйы сæйраг педиатр Тадтаты Людмилæ фехъусын кодта æмбырды хайадисджытæн, зæгъгæ, сæрдыгон рæстæг кæй у, уымæ гæсгæ сывæллæттæй бирæтæ сты улæфты кæнæ та хъæуты сæ дадатæ æмæ нанатæм, уымæ гæсгæ ацы мæйты сывæллæтты цæхæрадæтты вæййы къаддæр сабитæ.

«Уымæ нæ кæсгæйæ, æппæт сывæллæтты цæхæрадæттæм дохтыртæ ногæй бацæудзысты сентябры. Иу сывæллон дæр нæ баззайдзæн æнæ диспансеризаци рацæугæйæ. Диспансеризацийы фæстиуджыты хыгъд аразыны рæстæджы, сабиты низты ‘хсæн фыццаг бынат ахсы „плоскостопие“, кæцы сбæрæг кодтой 847 сабийæн (53%). Ома, ацы низ сбæрæг кодтой алы дыккаг сабийæн дæр», — банысан кодтой пресс-центры.

Сæйраг педиатрты ныхæстæм гæсгæ, дыккаг бынаты ис тонзиллит, рæсыдгонд миндалинæтæ æмæ аденоидтæ. Ахæм миниуджытæ сбæрæг кодтой 614 сабийæн (39%).

Тадтаты Людмилæ æмбырды рæстæджы фехъусын кодта, зæгъгæ, стырдæргонд миндалинæтæ практикон æгъдауæй вæййы æппæт сабитæн дæр æхсæз азмæ. Фæлæ куыд рæзынц, афтæмæй фæкъаддæр вæййынц”. Низты ‘хсæн æртыккаг бынаты та ис кариес. 563 сабийæн сæ дæндæгтæ хъыгдард сты кариесæй (35,5%). Ацы низтæй дарддæр ма 315 цауы сабитæн сбæрæг сты гуырыконды проблемæтæ (20%), фады (стопа) вальгусон деформаци 243 цауы (15,3%), æмæ бикъы къуыллау (грыжа) 217 цауы (13,7%). Гемангиомайы миниуджытæ сбæрæг кодтой сывæллæтты цæхæрадæтты 21 хъомылгæнинагæн. Уый æддейæ ма, фыццаг хатт сбæрæг сты цæстыты низтæ«, — загътой пресс-службæйы.

Æмбырды рæстæджы ма загътой серьезон низы цауы тыххæй, кæцыйæн хъæуы оперативонæй баххуыс кæнын. Горæты цæхæрадæттæй сæ иуы сбæрæг кодтой зонды рæзты къуылымпыдзинадимæ сабийы, ныхасы аппараты цухдзинад.

Пресс-службæйы куыд банысан кодтой, уымæ гæсгæ ныййарджытæ хатгæ дæр нæ фæкæнынц сæ сывæллæттæ исты низтæй рынчын сты, уый. «Диспансеризацийы хæс ис уый мидæг, цæмæй низы райдайæн стадийы сбæрæг кæной, цæмæй йын афойнадыл хос æрцæуа. Цас раздæр райдайа адæймаг хос кæнын, уыйбæрц эффективондæр æмæ тагъддæр уыдзæн хос кæныны процесс».

Сабиты ныййарджытæн фехъусын кодтой диагонзты тыххæй. «Ныййарджытæй бирæтæ нæ зыдтой сæ сывæллæттæн цы низтæ сбæрæг сты, уыдоны тыххæй æмæ бацыдысты дохтыртæм. Иуæй-иутæн дзы ныридæгæн æнтыстджынæй арæзт æрцыдысты операцитæ», — загътой пресс-службæйы.

Æмбырды рæстæджы банысанчындæуыд, зæгъгæ, æввахсдæр рæстæджы диспансеризаци райдайдзæн республикæйы районты дæр. Зæгъын хъæуы, уый дæр, æмæ цæрджыты диспансерон басгæрст кæй план кæнынц æрвылазон саразын.

Comments are closed, but trackbacks and pingbacks are open.