Мыхуыры рацыд Тедеты Валентинæйы чиныджы æртыккаг том «На Юге Осетии и снег горел».

Куыд раззаг дыууæ, афтæ  та æртыккаг томмæ дæр хаст æрцыд 1989-2008 азты Хуссар Ирыстон æмæ Гуырдзыстоны ‘хсæн национ ахастытæ карзæй-карздæр куыд кодтой, цадæггай сæ архайд адæмты хъысмæтыл куыд æндæвта, уыцы хронологи.

Хуссар Ирыстон 22 азы дæргъы цы уæззау фæндæгтыл рацыд, уыцы бæлвырдгæнæнтæ документалонæй æрæмбырд кæнын æмæ сæ мыхуырмæ бацæттæ кæнын цыппар томæй æнцон хъуыддаг нæ уыд, фæлæ Тедион йæ ныфс бахаста уыцы ахсджиаг хъуыддагмæ.

Тедеты Валя Мæскуыйы Полиграфион институты редакцион-рауагъдадон факультет фæсаууонмæ каст куы фæци, уæд кусынмæ бацыд Цхинвалы рауагъдад «Ирыстон»-мæ. Уым бакуыста 32 азы æндæр æмæ æндæр бынæтты. Уыд техникон редактор, стæй кæстæр редактор уый фæстæ, хистæр экономистмæ схызт. Уый фæстæ та куыста Мыхуыры хæдзары чингуыты рауагъдады хайады хистæрæй æмæ рауагъдад «Хуссар Алани»-йы директорæй. Йæ цæсгомджын æмæ æнæзæрдæхудт куыстæн бæлвырдгæнæн сты йæ бирæнымæц кады грамотæтæ æмæ алыгъуызон арфæйы гæх-хæттытæ.

1996 азы Валяйыл сæххæст 55 азы æмæ йæ азтæм гæсгæ ныууагъта рауагъдады куыст æмæ уæхскуæзæй бавнæлдта сфæлдыстадон куыст кæнынмæ. Уæрæх у йæ хайбавæрд сывæллæтты литературæйы къæбицмæ. Тынг зын у сабийы миддуне бамбарын, уыдоны æнæхин зæрдæйы цæмæй уацмыс йæ бынат ссара, уый тыххæй сæ бæллицтæ, сæ тырнындзинад æмæ кармæ гæсгæ, сæ хъуыдытæ банкъарын алкæцы фыссæджы бон нæу. Раст æрмдзæф разынд Валяйæн сабитæн фысгæйæ. Уарзон сты рæзгæ фæлтæрæн йæ уацмыстæ.

Куыд зонæм, афтæмæй Хуссар Ирыстоны полиграфион рауагъдады дæснытæ бирæ не сты. Ирон-гуырдзиаг хæсты азарæй рауагъдад æхгæд куы æрцыд æмæ йæ уый фæстæ ногæй сæндидзын куы хъуыд, уæд Хицауад бахатыд Тедеты Валямæ. Валя нæ бахæлæг кодта йæ хъару æмæ зонындзинæдтæ, цæмæй ма банымæг уыдаид республикæйы иунæг рауагъдад. Дыууæ азæй фылдæр фæкуыста иунæгæй, рауагъдад «Хуссар Алани»-йы æнæ куыстмыздæй, бирæ тых бахардз кодта, уæддæр йæ бон сси рауагъдад сæндидзын кæнын.

Уæлдæр куыд загътон, афтæмæй Валя иуран никуы бадт, интернеты æндæвдад нæ къуыммæ кæд æрхæццæ уыдзæн, уымæ дæр не ‘нхъæлмæ каст. Йæ бон куыд уыд, афтæ æмбырд кодта æрмæджытæ, Уæрæсе æмæ нæм фæсарæнтæй цы журналисттæ цыд, уыдон фыст уацтæ. Уымæн æмæ йæ хорз æмбæрста, уыдон фидæны нæ ног истори фыссынæн стыр ахъаз кæй   фæуыдзысты. «На Юге Осетии и снег горел»-ы раззаг дыууæ томы мыхуыры рацыдысты йæхи финансон хæрдзтæй. Æртыккаг том рауадзынæн та йын баххуыс кодта æхсæнадон-политикон парти «Иугонд Ирыстон»-ы лидер Бибылты Анатоли. Мыхуырмæ цæттæ у чиныджы цыппæрæм том дæр.

Ивгъуыд аз Тедеты Валя банысан кодта йæ 75 азы юбилей. Уый цытæн æй уæды Президент Тыбылты Леонид схорзæхджын кодта «Кады грамотæ»-йæ.

Йæ нацийы хъысмæтмæ куыдфæндыйы цæстæй чи нæ кæсы, йæ сæйраг рис йæ адæмы зындзинад кæмæн у, æмæ патриотикон удыхъæд æрдзæй ратгæ кæмæн у, уыцы куыстуарзаг сылгоймаг нырма дæр у куыстхъом æмæ йын нæ зæрдæ зæгъы ноджыдæр бирæ цæрæнбонтæ. Цæмæй лæггад кæнынхъом уа йæ раттæг адæмæн.

Уазæгты М.

Comments are closed, but trackbacks and pingbacks are open.