Гæнæн ис æмæ рæхджы Цæгат Ирыстоны Хетæгкаты Къостайы номыл паддзахадон университет æмæ Цæгат Ирыстоны педагогон институт баиу уыдзысты. Ууыл æмæ æндæр скъуыддзаггæнинаг фарстатыл уыд сæ ныхас нæ республикæйы Сæргълæууæг Битарты Вячеслав æмæ Уæрæсейы Хицауады Сæрдары хæдивæг Ольга Голодецæн сæ фембæлды рæстæджы.

Ацы хъуыддагыл ныхас рагæй цæуы. Бафиппайын хъæуы уый, æмæ дыууæ уæлдæр ахуыргæнæндонæн сæ ахуырады функцитæ æмæ æмвæзад сты иу. Рауагъдонтæ цы дипломтæ райсынц, уыдонæн дæр сæ тых æмхуызон у, иухуызон у сæ ахуыры æмæ сæ куысты программæ дæр. Уæдæ, æвæццæгæн, хуыздæр уыдзæн, дыууæ хъомысджын уæлдæр ахуыргæнæндоны сæ куыст куы баиу кæной, уæд. Уымæй бюджет дæр сфæсауæрц кæнид стыр фæрæзтæ, иугонд ахуыргæнæндоны ахуыры процесс та иумæйаг хъарутæй ацæуид хуыздæр.

Республикæйы Сæргълæууæг ма Ольга Голодецæн куыд бамбарын кодта, афтæмæй ЦИПУ-йы реконструкци бахъæудзæн 4-æм корпус. Уым ис географи æмæ геоэкологийы; хими, биологи æмæ биотехнологийы; стоматологи æмæ фармацийы, стæй квалификаци фæбæрзонддæр кæныны факультеттæ. Уым гæнæн ис æмæ æхгæд æрцæуой кæцыдæр факультеттæ дæр, кæнæ сæ баиутæ кæной æндæр ахуыргæнæндæтты программæтæм. Уымæн æмæ сæм ныры дуджы уадиссаг ничиуал тырны. Нæ сæ вæййы, æгæрыстæмæй, фаг студенттæ дæр.

Уымæй уæлдай амынд университет æмæ Миланы университет æрæджы бафыстой æмгуыстады бадзырд, Миланы университеты цы дунеон зонадон конгресс цыд, уым. Документмæ гæсгæ дыууæ университеты æмгуыстад рапарахат кæндзысты зонад æмæ ахуырады къабæзты. ЦИПУ-йы разамынды уырны, Миланы университетæн дунейы стыр кад кæй ис, уый разæнгард кæндзæн мах дæр.

Дыууæ разамонæджы ‘хсæн ма ныхас цыд Гергиты Валерийы номыл культурон — музыкалон центры арæзтадыл. Уымæн йæ арæзтадон куыстытæ райдайдзысты ацы азы дыккаг æмбисы. Битарты Вячеславы фæндонæй фидæны центр, стæй ног филармони æмæ Оперæ æмæ балеты театр суыдзысты Мариинаг театры иу хай, ома, йæ филиалтæ.

Ольга Голодец ныфс бафæрдта нæ республикæйы Сæргълæууæгæн, сæ бирæ фæндтæ сын царды сæххæст кæнынæн кæй баххуыс кæндзæн, уымæй.

Нæ уацх.

Comments are closed, but trackbacks and pingbacks are open.