29 марты Мæскуыйы Уæрæсейы Федерацийы Генералон прокурор Юрий Чайка фембæлд Республикæ Хуссар Ирыстоны Генералон прокуратурæйы делегациимæ, йæ сæргъ Республикæ Хуссар Ирыстоны Генералон прокурор Дзæгъиаты Уырызмæг, афтæмæй. Фембæлды ма хайад райстой Уæрæсейы Федерацийы Генералон прокуроры хæдивæг Саак Карапетян, Уæрæсейы Федерацийы Генералон прокуратурæйы Академийы ректор Оксана Капинус, Уæрæсейы Федерацийы Генералон прокуратурæйы профилон управлениты къухдариуæггæнджытæ.

Хуссар Ирыстоны фарсæрдыгæй мадзалы уыдысты Уæрæсейы Федерацийы Республикæ Хуссар Ирыстоны Уæлвæткон æмæ Æххæстбарджын минæвар Гасситы Знауыр, Республикæ Хуссар Ирыстоны Генералон прокуратурæйы дунеон-барадон æмгуысткæнынады управленийы хистæр Уалыты Васили, Уæрæсейы Федерацийы Республикæ Хуссар Ирыстоны минæварады 2-аг секретарь Бестауты Реуаз.

Йæ раныхасы Уæрæсейы Федерацийы Генералон прокурор банысан кодта дыууæ бæстæйы прокуратурæйы органты хайбавæрд уæрæсейаг-хуссарирыстойнаг ахастытæ фидардæр кæнынмæ, кæцытæ рæзынц Хæлардзинад, æмгуысткæнынад æмæ кæрæдзийæн æххуыс кæныны тыххæй дыууæфарсон бадзырды бындурыл.

Уæрæсе æмæ Хуссар Ирыстоны генералон прокуратурæты ‘хсæн æмгуысткæнынады тыххæй сразыдзинадыл, 2008 азы æмæ 2009-2011 азты æмархайды сæйрагдæр здæхтыты тыххæй меморандумыл къухтæ æрфыссын, афтæ 2013-2014 азты æмгуысткæнынады æндыгъд программæ дыууæ паддзахады прокуратурæты ‘хсæн ахастыты ракодта ног гъæд æмвæзадмæ. Уыцы азты дæргъы Уæрæсейы æмæ Хуссар Ирыстоны прокуророн кусджытæ регулярон æгъдауæй зонгæ кодтой кæрæдзийы фæлтæрддзинадимæ. Æркастæуыд ахæм фарстытæм, куыд оперативон-агурæн куыст æххæстгæнæг органтæ закъæттæ куыд æххæст кæнынц, ууыл контроль, развæлгъау фæдысгæрст, паддзахад æмæ æхсæнады интерестæ хъахъхъæнын, адæймаг æмæ æмбæстаджы бартæ æмæ сæрибардзинæдтæ хъахъхъæнын ифтонг кæнын, коррупци æмæ терроризмы ныхмæ архайын, уголовон хъуыддæгты дæттын æмæ барадон æххуысы фæдыл дунеон æмгуысткæнынад.

Юрий Чайка фембæлды хайадисджыты хъусдард аздæхта Уæрæсе æмæ Хуссар Ирыстоны прокуратурæйы органты эффективон æмархайд адарддæр кæныны æнæмæнгхъæуындзинадмæ. Уый тыххæй фæндон бахаста, дыууæ фарс дæр кæмæ цымыдис кæнынц, ахæм здæхтыты æхсæнведомствойон æмгуыстады тыххæй сразыдзинад дарддæр реализаци кæныны оптималондæр амæлттæ снысан кæнын.

Кæронбæттæны Уæрæсейы Федерацийы Генералон прокурор Юрий Чайка банысан кодта Уæрæсе æмæ Хуссар Ирыстоны прокуратурæты ‘хсæн цы партнерон ахастытæ æрбиноныг, уыдоны ахсджиагдзинад æмæ бафидар кодта, дарддæр дæр динамикон æгъдауæй кæй рæздзысты.

Comments are closed, but trackbacks and pingbacks are open.