19-æм майы РХИ-йы Культурæйы министрады цур Адæмон сфæлдыстады республикон центры хъæппæрисæй киноконцертон зал «Чермен»-ы уагъд æрцыдысты  бинонты коллективты  3-æм республикон фестиваль-конкурс «Бинонтæ — курдиæтты стъалыбардз» æмæ ирон адæмон зарды æххæстгæнджыты 1-æм республикон фестиваль-конкурс «Айзæлд».

Мадзаламонджытæ — центры кусджытæ Къæбысты Заринæ æмæ Санахъоты Жаннæ раарфæ кодтой æрæмбырдуæвджытæн,  конкурсанттæн та сæ бафæндыд сфæлдыстадон æнтыстытæ.

Фестиваль-конкурсы жюрийы уæнгтæ уыдысты Дзеранты Джульеттæ — РХИ-йы Культурæйы сгуыхт кусæг, культурæйы министры хæдивæг, Гасситы Ацæмæз — Æлборты Феликсы номыл Цхинвалы музыкалон  ахуыргæнæндоны академион вокалы ахуыргæнæг, Сланты Ацæмæз — ацы ахуыргæнæндоны академион вокалы ахуыргæнæг, Бестауты Ирмæ — Галаты Барисы номыл Хуссар Ирыстоны зард æмæ кафты паддзахадон ан-самбль «Симд»-ы солисткæ, 2-æм астæуккаг скъолайы цур скъола-студийы астæуккаг хореографион къорды ахуыргæнæг, Гуыцмæзты Эльзæ — Адæмон сфæлдыстады республикон центры директор, РХИ-йы культурæйы сгуыхт архайæг, жюрийы сæрдар. Гуыцмæзты Эльзæ арфæ ракодта конкурсты хайадисджытæн æмæ банысан кодта, зæгъгæ, æхсæз азы дæргъы уыдон ауагътой бирæ фестиваль-конкурстæ.

 Мадзал райдыдта бинонты коллективты ралæудæй. Фестиваль байгом кодтой горæт Къуайсайæ хо æмæ æфсымæр Зассеты Фатимæ æмæ Алан. Уыдон сæххæст кодтой дыууæ зарæджы — «Æз æнæ дæу нæ цæрын, нæ» æмæ «Танцор диско, танцуй, танцуй». Цхинвалы районы Тъбеты хъæуæй Кокойты Иван æмæ Амандæ та сæххæст кодтой «Сиргæ кафт». Уыдоны фæстæ сценæйыл сæ арæхстдзинад равдыстой Знауыры районы Гъаристауы хъæуккаг Сиукъаты Анзор йæ цардæмбал Мæлдзыгаты Мадленæимæ, Дменисы хъæуккæгтæ  Дудайты Эрик, Эльбрус æмæ Элинæ (сæххæст кодтой «Хæ-лæртты кафт»), Цхинвалы 3-æм астæуккаг скъолайы ахуырдзаутæ, хо æмæ æфсымæр Гобозты Лизæ æмæ Рома,  нæ горæты 1-æм астæуккаг скъолайы ахуырдзаутæ Зæгъойты Дианæ æмæ Гæбæраты Сослан, Дзауы районы Кировы хъæууон клубы сæргълæууæг Танделаты Луизæ йæ хъæбулы хъæбул Джиоты Къостаимæ, Дзауы поселочы минæвæрттæ Кокойты Валери æмæ Давид. Бинонты коллективты фæстаг номыр сæх-хæст кодтой Тыджыты бинонтæ — Аринæ, Аннæ æмæ Аллæ.

Жюрийы уæнгтæ конкурсанттæй чи цал баллы æрæмбырд кодта, уый бахынцгæйæ, фыццаг бынæттæ радтой Зассеты, Дудайты, Кокойты æмæ Тыджыты бинонтæн, уыдон хорзæхджын æрцыдысты грамотæтæ æмæ фæйнæ фондз мин сомæй. Дыккаг бынæттæ та лæвæрд æрцыдысты Гæбæраты бинонтæ æмæ Джиоты Къоста æмæ йæ нана Танделаты Луизæйæн. Уыдон та хорзæхджын æрцыдысты фæйнæ æртæ мин сомæй, æртыккаг бынат та фæцис тъбеттаг Кокойты бинонты æмæ сын лæвæрд æрцыд 2 мин сомы. Жюрийы сæрмагонд призæй, фæйнæ иу мин сомæй  та хорзæхджын æрцыдысты Гобозты æмæ Сиукъаты бинонтæ.

Уый фæстæ та сценæйыл сæ арæхстдзинад æвдыстой ирон адæмон зарды 1-æм республикон фестиваль-конкурс «Айзæлд»-ы хайадисджытæ. Дзауы районы нæлгоймæгты хор сæххæст кодта зарæг «Къостйы фарн» æмæ «Раджы бадæг æвæсмойнаг (аивадон къухдариуæггæнæг Дзадтиаты Анисим). Сæ ралæуды фæстæ Дзеранты Джульеттæ бузныджы ныхæстæ загъта Дзадтиаты Анисимæн, ирон патриотон зарæджы амæлын кæй нæ уадзы, уый тыххæй.

Знауыры районы минæвар Тхелидзе Александр сæххæст кодта дыууæ зарæджы. Нæ горæты 1-æм астæуккаг скъолайы ахуырдзау Гæбæраты Сослан дæр йæ диссаджы хъæлæсæй йæхимæ æркæсын кодта сценæмæкæсджыты. Тъбеты хъæуккаг Джуссойты Кристинæйы зарæг дæр тынг фæцыд жюрийы уæнгты зæрдæмæ. Кировы хъæуккаг дыууæ чызджы Æлборты Оксанæ æмæ Бæззаты Ульянæ дæр сæххæст кодтой сæ номыртæ. Знауыры районы Гъаристауы хъæуккаг Сиукъаты Анзор азарыд йæхи фыст зарджытæ. Кироваг Джиоты Къоста тынг хорз сæххæст кодта хъайтарон зарæг. Ноджы ма йæ зæгъон, æвзонг лæппу йæхиуыл куы бакуса, уæд æм æнхъæлмæ кæсы тынг хорз фидæн.

Дзауы районы Хуыцъейы хъæ-уы  ансамбль «Нартæ» тынг хорз сæххæст кодта «Гæздæнты авд æфсымæры зарæг» æмæ «Иссæйы зарæг».

Ууыл фæцис фестиваль-конкурс «Айзæлд» дæр. Цалынмæ жюрийы уæнгтæ уынаффæ кодтой, уæдмæ уал сценмæ фæхуыдтой æмæ æрæмбырдуæвджыты зæр-дæтæ йæ рæсугъд зардæй ба-хъæлдзæг кодта нæ горæттаг чызг Харебаты Марта, кæцы ныртæккæ ахуыр кæны Уæрæсейы музыкалон ахуыргæнæндæттæй сæ иуы. Центры номæй йын балæвар кодтой дидинджытæ, радтой йын зæрдылдарæн лæвар дæр.

Æмхуызон баллтæ кæй æрæм-бырд кодтой, уымæ гæсгæ 1-аг бынæттæ лæвæрд æрцыдысты Гæбæраты Сослан, Тхелидзе Александр, Хуыцъейы хъæуы ан-самбль «Нартæ» æмæ Дзауы районы нæлгоймæгты хорæн. Уы-дон хорзæхджын æрцыдысты фæйнæ 5 æмæ 6 мин сомæй. Дыккаг бынат бацахста Джуссойты Кристинæ æмæ райста 3 мин сомы æмæ 3-æм бынæттæ та — Джиоты Къоста æмæ Сиукъаты Анзор. Уыдонæн та лæвæрд æрцыд фæйнæ 2 мин сомы.Банысан кæнын хъæуы уый дæр, æмæ дыууæ фестивалы конкурсанттæ иууылдæр хорзæхджын кæй æрцыдысты Центры дипломтæй, афтæ ма уæлахиздзаутæн лæвæрд æрцыдысты грамотæтæ дæр. Фестиваль-конкурсты организатортæн бузныджы ныхæстæ загъта Тхелидзе Александр. Уый жюрийы уæнгтæм бахатыд, цæмæй йæ цы фондз мин сомæй схорзæхджын кодтой, уый радтой Ленингоры районы сывæллæтты хæдзарæн кæнæ та скъола-интернатæн. Мадзалы организатортæн ма бузныджы ныхæстæ загъта Дзауы районы администрацийы культурæйы хайады сæргълæууæг Цхуырбаты Галинæ.

РХИ-йы Культурæйы министры хæдивæг Дзеранты Джульеттæ конкурсы тыххæй загъта, зæгъгæ, бузныг зæгъын æмбæлы центры кусджытæн Гуыцмæзты Эльзæйы сæргълæудæй. Уыдон зæгъ, бакодтой стыр куыст фестиваль-конкурстæ ауадзыны тыххæй. Уый ма куыд загъта, афтæмæй ахæм фестивалтæ дарддæр дæр уагъд цæудзысты.Центры директор Гуыцмæзты Эльзæ дæр раарфæ кодта фестивалы хайадисджытæн, конкурсы активон хайад кæй райстой, уый тыххæй. Загъта, зæгъгæ, уыдон равдыстой сфæлдыстады хорз æмвæзад. Банысан кæнын  хъæуы уый дæр, æмæ ацы конкурсы хайад кæй нæ райстой Ленингоры районы минæвæрттæ. Уый фæдыл Гуыцмæзты Эльзæ загъта, зæгъгæ, æнæмæнгæйдæр бабæрæг кæндзæн ацы районы æмæ базондзæн, конкурсы хайад цы аххосагмæ гæсгæ нæ райстой, уый.

Фестиваль-конкурсты иумиагæй хайад райстой 47  хайадисæджы бæрц. Æххæстгæнджыты номыртæм кæсгæйæ, зæрдæ цины малы аныгъуылд, æгайтма, Ирыстон хъæздыг у ахæм курдиæттæй. Сæйраг призон бынат рамбулын нæу, сæйраг у конкурсы хайад райсын.

ДЖИОТЫ Екатеринæ

Comments are closed, but trackbacks and pingbacks are open.