Хуыцаубоны, 20 июны, афтæ зæгъæн ис æмæ Абайты Аннæйæн уыд йæ дыккаг райгуырæнбон…Чи куывта, уый – Аннæйæн. Уый аирвæзт стыр фыдбылызæй æмæ йæ ирвæзынгæнджытæ та уыдысты нæ горæты цæрджытæ Уалыты Эльвирæ æмæ Кундохова Аксанæ. Абайты чызг хъазгæ-хъазын бацыд, дон иууыл арфдæр кæм уыд, уыцы бынатмæ æмæ дзы аныгъуылд. Йæ амондæн, уым фесты ацы дыууæ хъайтар сылгоймаджы æмæ сывæллон баззадис сæрæгасæй.

 

Гимназ «Альбион»-ы ахуыргæнджытæй сæ иу Хъоцыты Аллæ нын куыд фехъусын кодта, афтæмæй сæ къласы сывæллæттæ æмæ ныййарджытимæ сæ рæстæг æрвыстой Дменисы улæфæн бынаты, чысыл Леуахийы былмæ хæстæг æмæ æвдисæн уыдысты ацы æвирхъау хабарæн. Уый нæм бахатыд, цæмæй нæ газеты фæрцы, Уалыты Эльвирæ æмæ Кундохова Аксанæ цы хъайтардзинад æмæ хæрзиуæгон хъуыддаг сарæзтой, уыимæ адæмы  базонгæ кæнæм.

«Мах сывæллæтты акодтам, Дменисы хъæуы цы улæфæн бынат ис, уырдæм. Аксанæ æмæ Эльвирæ загътой, ленк кæнын кæй зонынц æмæ уыдонæн бахæс кодтам, цæмæй доны был уыдаиккой сывæллæттимæ. Цыма йæ зонгæ кодтам, нæ фарсмæ чи улæфыд, уыдоны сывæллон  доны фæдæлдон уыдзæнис, уыйау.

Махæй чысыл фалдæр ма улæфыдысты æндæр чидæртæ, семæ уыд сывæллæттæ дæр. Куыд рабæрæг, афтæмæй уыдон нысан кодтой гуырæнбон æмæ бадтысты фынджы уæлхъус. Сывæллæтты, æвæццæгæн, куы афæлмæцыдысты, уæд æрфæндыд доны ахъазын æмæ дзы бахызтысты. Цасдæр рæстæг куы рацыд, уæд сывæллæттæй доны чи уыд, уыдон райдыдтой æмхъæлæсæй хъæр кæнын, зæгъгæ, чызг дæлдон кæны. Кундохова Аксанæ уый фехъусгæйæ, багæпп кодта донмæ æмæ чызджы райдыдта агурын.  Куы йæ ссардта, уæд сывæллон нал улæфыд, афтæмæй йæ райста. Эльвирæ чызджы ахæм уавæры куы ауыдта, уæд нæ фæтыхст æмæ йын уайтагъд фыццаг æххуыс бакодта. Сывæллон уыцы змæст дон куы скалдта æмæ куы сулæфыд, уæд мах дæр сулæфыдыстæм. Эльвирæйы æххуысы фæстæ нæ тагъд æххуысмæ адзурыны сæр дæр нал бахъуыд. Аннæйы хиуæттæй сæ иу фырдиссагæн æрзоныгуыл кодта æмæ стыр бузныджы ныхæстæ загъта чызджы ирвæзынгæнджытæн. Æцæгæйдæр, Аксанæ æмæ Эльвирæ цы диссаджы хъуыддаг сарæзтой, уый хъуамæ федтаиккат. Ахæм ныфсхаст æмæ æхсардзинад кæй равдыстой, уый тыххæй сæм æмбæлы хорзæхтæ дæр. Фæнды мæ, уавæрæй спайда кæнгæйæ, уыдонæн ноджыдæр стыр бузныджы ныхæстæ зæгъын. Мæ зæрдæ сын зæгъы фидар æнæниздзинад æмæ амондджын цард. Куыд никуыуал фæтыхсой æмæ сæ ахæм хъуыддаджы сæр цы нал бахъæуа, уый амонд сæ уæд», – тыхстæй дзырдта Хъоцыты Аллæ.

Абайты чызджы чи фервæзын кодта, уыцы сылгоймæгтæй сæ иу – Кундохова Аксанæ ныртæккæ кусы Цхинвалы ЗАГС-ы, Уалыты Эльвирæ та – Республикæ Хуссар Ирыстоны Фæсарæйнаг хъуыддæгты министрады. Сæ дыууæ дæр сты рæсугъд, хæларзæрдæ, цæвиттойнаг  ныййарджытæ.

Хъоцыты Аллæ ма нын куыд загъта, афтæмæй Дмени-сы ацы улæфæн бынаты хицау развæлгъау бафæдзæхсы улæфджыты, цæмæй доны метр æмæ æрдæгæй мидæгдæр мачи хиза, фæлæ ацы фæдзæхст улæфджытæ алыхатт ницæмæ æрдарынц.

Цхуырбаты Лариса

Comments are closed, but trackbacks and pingbacks are open.