ДЫВÆР ÆМБÆСТАГДЗИНАДЫ ТЫХХÆЙ СРАЗЫДЗИНАД РАТИФИКАЦИ ÆРЦЫД

1-æм декабры уагъд æрцыд Республикæ Хуссар Ирыстоны Парламенты æхсæзæм сессийы фыццаг рабадт. Уагъта йæ РХИ-йы Парламенты  Сæрдар Тадтаты Алан.

Депутаттæ æруынаффæ кодтой «Дыууæ æмбæстагдзинады фарстытæ æрбæстон кæныны фæдыл Республикæ Хуссар Ирыстон æмæ Уæрæсейы Федерацийы ‘хсæн Сразыдзинад сратификаци кæныны тыххæй» Республикæ Хуссар Ирыстоны закъоны проектыл, кæцы уынаффæ кæнынмæ рахаста Республикæ Хуссар Ирыстоны Парламенты Æддагон политикæ æмæ æхсæнпарламентон бастдзинæдты фæдыл комитеты сæрдар Дриаты Заза.

Банысан æрцыд, «Республикæ Хуссар Ирыстоны æхсæнадæмон бадзырдты тыххæй» Республикæ Хуссар Ирыстоны закъоны 15-æм статьямæ гæсгæ Республикæйы Президент Парламентмæ ратификаци кæнынмæ бахаста дыууæ æмбæстагдзинады фарстытæ æрбæстон кæныны тыххæй Республикæ Хуссар Ирыстон æмæ Уæрæсейы Федерацийы ‘хсæн горæт Цхинвалы 2021 азы 20 сентябры цы Сразыдзинадыл къухтæ фыст æрцыд, уый. Сразыдзинады нысан у Хуссар Ирыстон æмæ Уæрæсейы цæрджыты дыууæ æмбæстагдзинадимæ баст фарстытæ æрбæстон кæнын, афтæ ма хуымæтæг фæткы Республикæ Хуссар Ирыстоны æмбæстæгты уæрæсейаг æмбæстагдзинад райсын.

Сразыдзинадмæ гæсгæ, Республикæ Хуссар Ирыстоны æмбæстагæн бар ис Уæрæсейы Федерацийы æмбæстагдзинад райсын, уыимæ иумæ, хуссарирыстойнаг æмбæстагдзинад нæ фесафгæйæ. Уæрæсейы Федераци фадат дæтты, 2008 азы 26 августмæ Республикæ Хуссар Ирыстоны æмбæстагдзинад кæмæ уыд æмæ йæ куырдиат бадæттыны рæстæгмæ чи нæ фесæфта, 18 азы кæуыл сæххæст æмæ йæ бон кæмæн у куырдиатимæ бахатын Уæрæсейы Федерацийы æмбæстагдзинад райсын хуымæтæг фæткмæ гæсгæ. Уæрæсейы Федерацийы æмбæстагдзинад райсыны уавæр, хъæугæ документты номхыгъд æмæ куырдиæттæ райсыны фæтк фидар кæны Уæрæсейы Федерацийы Президент.

Парламентаритæ æмхъæлæсæй сратификаци кодтой ацы Сразыдзинад.