Ленингоры районмæ Хицауады Сæрдар Джуссойты Константины кусæгон балцы рæстæджы уынаффæ кодтой ацы районы актуалон пробле-мæтыл æмæ сæ аскъуыддзаг кæныны амæлттыл.
Хицауады Сæрдаримæ кусæгон балцы уыдысты экономикон рæзты министр Тадтаты Дзамболат, Хицауады Аппараты къухдариуæггæнæг Джуссойты Алан, районы администрацийы сæргълæууæг Гæджиты Иларион, автомобилон фæндæгты арæзтад æмæ эксплуатацийы фæдыл комитеты сæрдар Елзарты Константин, паддзахадон унитарон куыстуат «Водоканал»-ы директор Сиукъаты Иван æмæ æндæр официалон адæймæгтæ.
Гæджиты Иларион Джуссойты Константинæн фехъусын кодта май-июны мæйты тыхджын къæвдатæ фæндагон æмæ инженерон инфраструктурæтæн цы зиан ракодтой, уый тыххæй, æмæ банысан кодта, зæгъгæ, сæ сæндидзын кæнын у бынæттон администрацийы сæйрагдæр хæстæй иу. Йæ ныхæстæм гæсгæ, районы цæрæнуатон-коммуналон хæдзарады тыхтæй æндидзыд æрцыдысты æхсæнпоселокон фæндæгты иуæй-иу фадгуытæ, хидтæ, фæлæ ныр-ма ис куыстыты стыр фронт, кæцыты сæххæст кæнын хъæуы цыбырдæр æмгъуыдты, цалынмæ боныгъæд фадат дæтты, уæдмæ.
Хицауады сæрдар федта Цхинвал-Ленингоры фæндагæн цы бынæтты разианчындæуыд, уыцы бынæтты, районы административон центрмæ бацæ-уæны Чысаны цæугæдоныл хид. Джуссойты Константин банысан кодта, зæгъгæ, Цхинвалы Ленингоримæ цы фæндаг бæтты, уый у республикæйы фæндагон хæдзарады нысаниуæджы объект, кæцы хъуамæ куса кусæгон режимы æнæхъæн азы дæргъы. Уый бахæс кодта æввахс рæстæджы фæндаджы уæлцъар сæндидзын кæныны фæдыл фæндæттæ бацæттæ кæнын æмæ сæ хицауадмæ æрбавдисыны тыххæй.
БАБÆРÆГ КОДТА ЛЕНИНГОРЫ ДОНÆМБЫРДГÆНÆН СТАНЦЫ
Ленингоры районмæ йæ кусæгон балцы рæстæджы Хицауады Сæрдар бацыд Ленингоры поселочы донæмбырдгæнæн станцмæ. «Водоканал»-ы директор Сиукъаты Иван Хицауады Сæрдарæн радзырдта Ленингоры донифтонгады проблемæты тыххæй æмæ банысан кодта, зæгъгæ, цæрджытæн дон лæвæрд цæуы райсом æмæ изæр иу сахат, кæцы дзуапп нæ дæтты цæрджыты домæнтæн. Йæ ныхæстæм гæсгæ, поселок донæй ифтонг цæуы донæмбырдгæнæнтæй, кæцытæ арæзт æрцыдысты 2011 азы. Доны гуырахсты хъуагдзинадæй дарддæр ма проблемæтæ ис сыгъдæггæнæн станцы куыстыты дæр.
Фарстытимæ бынаты базонгæйы фæстæ, Хицауады Сæрдар бахæс кодта «Водоканал» æмæ Ленингоры райо-ны администрацийæн, цæмæй æввахс рæстæджы бакусой цъайтæ саразыны фарстыл, поселочы донифтонгад фæхуыздæр кæныны нысанæн.
ЦÆУГÆ ÆМБЫРД КОНТРОЛОН-УАДЗÆН ПУНКТ «РАЗДÆХÆН»-ы
Хицауады Сæрдар Джуссойты Константин, йæ хæдивæг – Экономикон рæзты министр Тадтаты Дзамболат, Хицауады Аппараты къухдариуæггæнæг Джуссойты Алан, районы администрацийы сæргълæууæг Гæджиты Иларион æмæ æндæр официалон адæймæгтимæ цæугæ æмбырд ауагъта Ленингоры районы контролон-уадзæн пункт «Раздæхæн»-ы.
Æмбырды хайадисджытæ æруынаффæ кодтой арæны сæрты ахизынæн бары гæххæт радтыны, районы æмбæстæгты актуалон фарстытыл.
Хицауады сæрдар бахæс кодта бæрнон адæймæгтæн, цæмæй Ленингоры районы цæрджытæн æмбæлон уæлвæзадмæ æркæной паддзахадон арæны сæрты ахизыны уавæртæ.
БАБÆРÆГ КОДТА БÆГÆНЫФЫЦÆН ЗАВОД
Хицауады сæрдар кусæгон балцы фæлгæтты бацыд Ленингоры поселочы бæгæныфыцæн заводмæ. Уый базонгæ технологон процессимæ, федта цехтæ æмæ æфтауцдæттæ. Уæрæсейы РХИ-йы базарадон минæвар Таймураз Гогинов премьерæн равдыста продукцийы каталог, радзырдта йын кондады кæмæй пайда цæуы, уыцы доны уникалон миниуджыты тыххæй. Йæ ныхæстæм гæсгæ, завод байгом кæныны фæстæ скуыста мини-бæгæныфыцæн технологитæ бакусыны тыххæй. Абон куыстуат тыхджындæр кæны йæ кондадон гуырахст, монтаж цæуы ифтонгад бæгæныфыцæн заводы егъаудæр цехы.
Базарадон минæварады сæргълæууæг банысан кодта, зæгъгæ, проектон гуырахсттæм рахизгæйæ, заводæн йæ бон суыдзæн суткæйы дæргъы 50 тоннæйы продукци дæттын, æмæ кусджыты штат та фæфылдæр уыдзæн 100 адæймаджы онг.
Премьер райгондæй баззад æмæ банысан кодта, зæгъгæ, районы кондадон къабазмæ инвестицитæ æрбакæнынæн уыдзæн æвæрццаг экономикон эффект.
Уæ зæрдыл уын лæууын кæнæм уый, æмæ Ленингоры поселочы бæгæныфыцæн заводы проекты инициатор кæй у экономикон рæзты министрад æмæ реализаци æрцыд 2022 азы апрелы мæйы, раздæры «Æлутон»-ы бындуырыл.
Куыстуат фæнд кæны дæс хуызы бæрц бæгæны, лимонад, минералон æмæ нуазыны дæттæ уадзын.
Comments are closed, but trackbacks and pingbacks are open.