Цхинвалы районы Тъбеты хъæуы библиотекæйы дæр уагъд æрцыд бæрæгбонон мадзал ирон æвзаг æмæ литературæйы боны цытæн. Ардæм æрбамбырд сты скъоладзаутæ, хъæуы цæрджытæ, бынæттон администрацийы минæвæрттæ æмæ ма сæм фæуазæг сты журнал «Фидиуæг»-æй дæр.
Райдианы ныхасы рацыд Цхинвалы районы централон библиотекæйы директор Уалыты Нанули æмæ йæ доклады банысан кодта, зæгъгæ, йе ‘взаг чи нæ уарзы, уый йæ нацийы дæр æмæ йæ райгуырæн зæхх дæр нæ уарзы.
Ирон æвзаджы тыххæй æмдзæвгæтæ радзырдтой Дзабиты Николай, Дзабиты Виктория æмæ Санахъоты Дауыт. Ныхасы ма рацыдысты ноджы цалдæрæй æмæ иууылдæр дзырдтой не ‘взаджы ныры проблемæтыл.
«Бинонтæ паддзахады сты чысыл паддзахад æмæ дæ хæдзары цахæм уаг сæвæрай, ахæм вæййы паддзахад дæр. Уымæ гæсгæ не ‘взаджы сомбон дæр баст у ирон бинонтыл – хъуамæ дзурæм иронау. Æрæджы дуканийы дзул æлхæдтон æмæ аргъæй афарстон, зæгъын, «йæ аргъ фондз æмæ ссæдз сомы у?», фæлæ мæ уæйгæнæг нæ бамбæрста. Æмæ мæ хъустыл Гæбæраты Никъалайы ныхæстæ ауадысты, – «цалдæр азы фæстæ ирон адæмæй нымæцонтæ ничиуал зондзæнис», – загъта катайгæнгæ Наниты Асиат.
Æмæ, æцæгæйдæр, куы ахъуыды кæнæм, уæд раст у, – фыццаг хæдзары бинонтæ куы райдайой дзурын иронау, уæд алцы дæр йæ гаччы æрбаддзæнис. Ис нæм ахæм патриоттæ дæр, æмæ «фыдыбæстæ», «райгуырæн зæхх» хъæргæнгæ цæуынц, фæлæ сæ мадæлон æвзаг кæнæ рæстмæ нæ зонынц кæнæ та йыл сæ сæрмæ дзурын нæ хæссынц. Æмæ фыццаг мадæлон æвзаг у – уый фæрцы стæм ирæттæ. Искуыдæм балцы ацæугæйæ дæ райгуырæн бæстæ демæ нæ ахæсдзынæ, фæлæ дæ мадæлон æвзаг демæ уыдзæнис кæддæриддæр. Нæ бæстæйæ ирон ныхас куынæуал хъуыса, уæд ма йæ Ирыстон схонæн уыдзæнис?
ДЖИОТЫ Александр
Comments are closed, but trackbacks and pingbacks are open.