Республикæ Хуссар Ирыстоны Паддзахадон таможнæйон комитет æмæ Уæрæсейы Федерацийы Федералон таможнæйон службæйы минæвæрттæн æрæджы нæ горæты Анахарсисы номыл библиотекæйы æмбырдгæнæн залы уагъд æрцыд æмбырд-семинар. Ацы мадзал ауадзыны нысан уыд, Хуссар Ирыстон æмæ Уæрæсейы æхсæн таможнæйыл хизыны фæтк, уæзтæ ласын æмæ къорд таможнæйон процедурæтыл æруынаффæ кæнын.

Мадзалы хайад райстой Хуссар Ирыстоны таможнæйон службæйы минæвæрттæ, УФ-йы Федералон таможнæйон службæ æмæ Цæгат Ирыстоны таможнæйы бæрнон кусджытæ æмæ  индивидуалон амалиуæггæнджытæ.

Боны фæткы фыццаг фарст – Таможнæйон цæдисы Евразиаг экономикон цæдисы бæстæтæ таможнæйон арæнтыл цы транспортон фæрæзтæ æмæ товартæ ласынц, уыдонæн таможнæйон деклараци аразыны фæтк æмæ уагæвæрды фæдыл æмбарынгæнæн ныхас ракодта Цæгат Кавказы таможнæйон управленийы таможнæйон контролы организацийы хайады сæргълæууæг Валентина Молчанова. Уый лæмбынæг æрдзырдта, таможнæйон кодексмæ гæсгæ хисæрмагонд товартæ æмæ амалиуæгады нысанæн товартæ ласыны фæдыл деклараци исыны фæткыл.

Дыууæ Ирыстоны ‘хсæн таможнæйон пост Дæллаг Зæрæмæ-джы цы инспекцион- сгарæн комплексæй пайда цæуы, уый æмбæстæгты цардæн ницы зиан хæссы, уый фæдыл Цæгатирыстойнаг таможнæйы къухдариуæгад цæттæ у бæлвырдгæнæг документтæ бавдисынмæ.

Цæгат Кавказы таможнæйон управленийы таможнæйон контроль æмæ таможнæйон процедурæты хайады сæргълæууæг Хайты Аликы ныхæстæм гæсгæ ацы комплекс адæмы ‘хсæн зындгонд у, куыд «рентген», афтæ, барынц æй флюорографийы процедурæтимæ æмæ уый та, кæй зæгъын æй хъæуы, æвзæрын кæны тыхстдзинад. Æмæ уымæй, арæны сæрты уадзæн пунктыл цы æмбæстæгтæ хизынц, уыдон таможнæйы кусджыты куыстмæ хæссынц хæццæдзинад. Бирæ хæттыты фехъусæн вæййы ахæм ныхæстæн, зæгъгæ, ацы комплекс уым æвæрд æрцыд адæмы куынæг кæныны нысанæн, цот кæнын æруромынæн, æмæ ахæм ныхæстæ хъусын зын æмæ хъыгаг у.

«Мах уе знæгтæ не стæм æмæ Хуссар Ирыстонæн,   цы товартæ йæм ласт цæуы, уыдонæн знагиуæг нæ кæнæм. Сгарæн комплекстæй пайда цæуы æппæт уадзæн пункт-ты дæр. Цæгат Ирыстоны цы товартæ æл-хæнынц адæм, уыдон дæр, цалынмæ уæйгæнæн бынæттæм бахауынц, уæдмæ рацæуынц ахæм процедурæтæ æндæр уадзæн пунктты», – дзырдта Хайты Алик.

Инспекцион-сгарæн комплексы архайдыл дзырд куы цæуа, уæд бæстон кæны къорд проблемæйы. Уымæй пайда кæнын у дунеон иумиаг райсгæ практикæ. Æрмæст таможнæйон органтæ дзы нæ пайда кæнынц, фæлæ æн-дæр структурæтæ дæр. Дæллаг Зæрæмæджы уадзæн пункты дзы пайда цæуы 2010 азы райдианæй. Ацы комплекстæ рацыдысты санитарон-эпидемиологон экспертизæ æмæ сын арæзт æрцыд æмбæлон хатдзæгтæ. «Роспотребнадзор»-ы хатдзæгтæм гæсгæ ацы комплекстæ ницы зиан хæссынц.

Хайты Аликы ныхæстæм гæсгæ таможнæйы кусджытæ æхсæвæй-бонæй кусынц ацы комплексæй пайда кæнгæйæ. Ацы комплекс фенын кæй фæнды, уымæн йæ бон у бацæуа æмæ фена æппæт дæр. Уым æппынæдзух цалдæр дозиметрæй  барст цæуы бынаты фон.

Сæ æнæмæнгхъæуындзинад та баст у, уадзæн пункты сæрты ласыны бар цы уæзтæ æмæ товартæн нæй, уыдон сбæрæг кæны-нæн. Сусæггаг нæу уыцы хъуыддаг дæр, æмæ æрвылбон дæр таможнæйон посты урæд кæй æрцæуынц алыгъуызон тамакотæ  æмæ æндæр контрабандон уæзтæ, кæцытæ вæййынц æмбæхст. Ацы факттæ рабæрæг æрцæуынц комплексæй спайда кæнгæйæ.

Ныхасгæнæг ма зæрдыл æрлæууын кодта, зæгъгæ, цалынмæ ацы инспекцион-сга-рæн комплексæй пайда нæ цыд, уæдмæ таможнæйыл товартæ æмæ уæзтæ ласджытæ сæхæдæг æвдæлон кодтой уæзтæ, цæмæй таможнæ æмæ арæнхъахъхъæнджытæ федтаиккой, цы ласт цæуы, уый. Ацы процедурæтæн хъуыд бирæ рæстæг æмæ тых.

Цæгат Кавказы таможнæйон управленийы хайады сæргълæууæг ма банысан кодта, ацы комплексимæ чи архайы, уыдон æрвылаз дæр кæй цæуынц профилактикон медицинон басгæрст. Йæ фæстиуджытæ та æвзæр нæ вæййынц. Уымæ гæсгæ, ома комплексы бæрæг процедурæ рацæуыны фæстæ транспортон фæрæзыл 15 минутæй раздæр сбадæн нæй, уый мæнг ныхас у.

Статистикон бæрæггæнæнтыл дзургæйæ, автотранспортон фæрæзтæ Дæллаг Зæрæмæджы таможнæйон посты уадзæн пункты сæргълæууæг Куымæридтаты Давид мадзалы рæстæджы куыд фехъусын кодта, уымæ гæсгæ ацы аз уадзæн пункты сæрты рахызт 338 543 алыхуызон транспортон фæрæзы. Уыдонæй инспекцион-сгарæн комплексы фæрцы спайдагæнгæйæ басгæрстæуыд 3,4 проценты. Бирæ хатт дзы рæзыны æмбæхст бынæттæ æмæ æппæт уыдон рабæрæг вæййынц инспекцион комплексы руаджы.

Уымæй дарддæр ма уæрæсейаг таможнæйон кусджытæ фæдзæхсты хуызы дзырдтой, цæмæй хуссарирыстойнаг æмбæстæгтæ сæхиуыл мауал фидар кæной транспортон фæрæзтæ. Уымæн æмæ уыдон таможнæйы сæрты ахизынц æмæ фæстæмæ дæр бæрæг æмгъуыдмæ хъуамæ рахизой, науæд фылдæр кæнынц сæ таможнæйон фиддонтæ æмæ проценттæ. Æмæ арæны сæрты хизгæйæ ахæм адæймаг урæд куы æрцæуы, уæд хъуамæ бафида уыцы фиддонтæ,  науæд ын уадзæн пункты сæрты ахизыны бар нæй. Уымæ гæсгæ мадзалы хайадисджытæ бахатыдысты ахæм æмбæстæгтæм, цæмæй рæстæгыл фæстæмæ аласой арæны сæрты цы транспортон фæрæзтæ сыл фидар ис, уыдон, кæд хæлд сты, уæддæр, цæмæй сæ фиддонтæ ма фылдæр кæной.

Евразиаг экономикон цæдисы таможнæйон арæныл фитосанитарон æмæ ветеринарон хъусдард цы товартæм ис, уыдон ласыны фæткы фæдыл информаци сарæзта Цæгат Кавказы таможнæйон управленийы сæйраг таможнæйон инспектор Ирина Кононова.

Административон бархалæнтæ саразыны барадон фæстиуджытæ, таможнæйон фиддонтæ, ивартæ æмæ проценттæ, афтæ Уæрæсейы Федерацимæ цæуын æмæ фæстæмæ рацæуыны бар цы æмбæстæгтæн нæй, уыцы фарстыты фæдыл та ныхас кодта Цæгат Кавказы оперативон таможнæйы сæргълæууæджы хæдивæг Максим Чурсин.

Къæбулты Маринæ

Comments are closed, but trackbacks and pingbacks are open.