Знон Хуссар Ирыстоны Мидхъуыддæгты министрады ауагъд æрцыд æмбырд. Хуынд æм æрцыдысты министрады æппæт управлениты разамонджытæ, хицæн хайадты къухдариуæггæнджытæ.
Мидхъуыддæгты министры хæдивæг, инæлар-майор Лалыты Геннади æмбырды хайадисджытæн раарфæ кодта, Республикæ Хуссар Ирыстоны сырæзтыл 26 азы кæй сæххæст, уый цытæн. Бафæндыд æй, цæмæй сын сæ куысты уа стыр æнтыстытæ. Лалыты Геннади ма сын раарфæ кодта Мады Майрæмы бæрæгбоны цытæн дæр.
Уый фæстæ министры хæдивæг æрдзырдта æмæ управлениты разамон-джыты базонгæ кодта, ацы бæрæгбонты сын республикæйы разамынад сæ разы цы хæстæ æвæры æхсæнадон фæтк хъахъхъæныны фæдыл, уыдонимæ. Уый сæ бафæдзæхста, цæмæй милицийы кусджытæ ацы бонты сæ хæстæ æххæсткæнынмæ æрæвналой иугъуызон дарæсы. Фылдæр хъусдард здæхт хъуамæ цæуа Дзау, Знауыр æмæ Ленингоры фæндæгтæм. Раныхасгæнæг ма управлениты разамонджыты бафæдзæхста, цæмæй бæрæгбонон мадзæлттæ уадзыны рæстæджы сæ кусджытæ сæхи æвдисой цæвиттойнагæй.
Æмбырдуадзæг управлениты разамонджыты бафæдзæхста, цæмæй ацы бонты, хицæн рæстæджыты, горæты æхгæд цы уынгтæ цæудзысты уыцы график хæлд ма цæуа.
Дарддæр ма сæ хъуыдытæ загътой горæты милицийы хистæры хæдивæг Пухаты Александр, Цхинвалы районы милицийы къухдариуæггæнæг Гæбæраты Радион, Паддзахадон автоинспекцийы разамонæг Джиоты Алан, Мидхъуыддæгты министрады штабы хистæры хæдивæг Гасситы Владимир, горæты мидхъуыддæгты управленийы хистæр Мæргъиты Уырызмæг æмæ æндæртæ.
Гæззаты Иван
Comments are closed, but trackbacks and pingbacks are open.