РХИ-йы Хицауады Сæрдар Хъуылымбегты Доменти ПТРК «ИР»-ы комкоммæ эфиры радзырдта æххæстгæнæг хицауиуæгады архайды фæстиуджыты тыххæй, адæмон хæдзарады фадгуыты тенденциты, экономикæйы реалон секторы къабазы куыстыты, социалон-экономикон рæзты перспективæты тыххæй, афтæ ма дзуаппытæ радта, цæрджыты цы фарстытæ цымыдис кодтой, уыдонæн.

Стыр хъусдард здæхт æрцыд экономикæйы реалон секторы рæзты, инвестицион политикæйы фарстытæм. План-бæрцон куысты фæстиуæгæн, республикæйæн йæ къухты бафтыд Уæрæсейы раззагон регионтимæ хъуыддагон æмгуыстад æрнывыл кæнын, сæудæджерад æмæ хъæууон хæдзарадмæ инвестицитæ æрбакæнын, бæрæгæй паддзахадон бюджеты хисæрмагонд æфтиæгтæ фæбæрзонддæр кæнын, экономикæйы æнæбюджетон секторы архайæг цæрджыты нымæц фæфылдæр кæнын, чысыл æмæ астæуккаг амалиуæгадæн баххуыс кæныны тыххæй конкретон къахдзæфтæ акæнын.

Зæгъæм, 2015 азы бæрæггæнæнтæм гæсгæ, республикæйы паддзахадон бюджеты хисæрмагонд æфтиæгты хай 2013 азимæ абаргæйæ, сырæзт 81,66%. Административон мадзæлттæ кæй фæхуыздæр сты, уый дæр фадат радта бюджетмæ хъалонты бацыдтыты æппæт хуызтæ 2,5 хатты фæфылдæр кæнынæн.

Фæрæзты арæнгонддзинадмæ нæ кæсгæйæ, бынæттон бангтæ микрокредиттæ лæвæрдтой амалиуæггæнджытæн. Æрмæст фæстаг дыууæ азы лæвæрд æрцыд кредитон фæрæзтæ 187 милуан сомæй фылдæр. Экономикæйы фадыджы чи архайы, уыдон нымæц 2016 азы фыццаг æмбисы уыдысты 20920 адæймаджы, уый 3352 адæймаджы фылдæр у 2015 азы аналогон рæстæгимæ абаргæйæ.

Хицауады сæргълæууæг 2016 аз схуыдта фæзилæн рæстæг, æрмæст республ-икæйы социалон инфраструктурæйы уæрæсейаг паддзахадон капиталы инвестициты тыххæй нæ, фæлæ ма хицæн инвесторты æрбакæныны планы дæр, кæцы хорз перспективтæ сарæзта Хуссар Ирыстоны территорийыл бизнесы рæзтæн.

Хъуылымбегты Доменти ранымадта инвесторты конкретон къорд, кæцытæн сæ бон у æввахс фидæны республикæйы экономикæ йæ къахыл слæууын кæнын, кæцытæ  сты реализацийы алы стадиты: интенсивон хуызы дыргъдæттæ ныккалыны проект «Ирыстоны дыргъдæттæ» талахъомылгæнæндон æмæ дыгътæ æфснайыны инфраструктурæимæ; дзидзагуыст-кæнæн куыстуат «Растдон»; зæхкусæгон-фермерон хæдзарад «Фарн», кæцы кæн-дзæн маргъдарды куыст æмæ сорганизаци кæндзæн цалдæр  хуызы хæдзарад; Дзауы районы гæрзты дон æмæ лимонады кондад; бынæттон фæсауæрцты бындурыл базальтон фæскъауы бæрзонд-технологион кондад,  Бæгъиаты суары заводы базæйыл авгын мигæнæнты минералон доны кондад; уæрæсейаг-китайаг фирмæ «Усю-Импекс-Лимитед»-ы машинæтæн сойын æмæ уæлдæфон фильтрты рауагъд, афтæ ма хиирхæфсæн æмæ курортологийы фадыджы  проекттæ.

Банысан æрцыд, зæгъгæ, æрбакæнгæ инвестицион фæрæзты иумиаг гуырахст у 1 миллиард 330 мин сомы, кондадты та байгом уыдзысты 350 онг ног кусæн бынæттæ.

Кæй зæгъын æй хъæуы, уый хорзæрдæм бандавдзæн Хуссар Ирыстоны иумиаг экономикон рæзтыл.

Хицауады Сæрдар ма банысан кодта, зæгъгæ, республикæйы инвестицион климат фæхуыздæр кæныны нысанæн, барадон ахасты арæзт цыдысты преференцитæ амалиуæггæн-джыты тыххæй, хъалонты æрлæмæгъ, Уæрæсейы Федерациимæ базар кæнынады æнæфиддонон режим, инвестортæн æххуымæ здæхт Хицауады закъондæттæн инициативæтæ зæрдыл æрлæууын кæнгæйæ.

Ныхасы рæстæджы   Хъуылымбегты Доменти æрхаста ныфсæвæрæн бæрæггæнæнтæ миграцион процессты фæдыл, æдзух цæрыны тыххæй йæхи чи срегистраци кодта, уыдоны нымæц банысан кæнгæйæ. Хуссар Ирыстоны Мидхъуыддæгты министрады паспортон-визæйон службæйы управленийы информацимæ гæсгæ, 2016 азы 11 мæйы æмгъуыдмæ, кусæг мигрантты нæ бахынцгæйæ, æдæппæт республикæйы территорийыл æдзух цæрыны тыххæй сæхи срегистраци кодтой 2031адæймаджы, сæхи та сфыстой æрмæстдæр 414 адæймаджы.

Ныхасæн хатдзæгтæ аразгæйæ, Хицауады Сæрдар раарфæ кодта Хуссар Ирыстоны цæрджытæн æрбалæугæ Ног азы цытæн, загъта сын фæрныгад æмæ æнтыстыты фæндиæгтæ, æмæ бахахх кодта, зæгъгæ, куыст даддæр цæудзæн хисæрмагонд бюджетон æфтиæгты администраци кæнынады эффективондзинад фæбæрзонддæр кæныны фæдыл, республикæйы зæрдæмæдзæугæ инвестицион климат дарддæр аразыны фæдыл, æмæ, æнæхъæнæй, дарддæр дæр цæрджыты царды гъæд активонæй бæрзонддæр кæныны фæдыл.

Comments are closed, but trackbacks and pingbacks are open.