Размæцыд бæстæты электронон си-гареттæй адæм пайда кæнынц ныр 20 азы бæрц æмæ махмæ дæр æрхæццæ сты 3-4 азы размæ. Нæ сыхаг бæстæты сæ сæрибарæй уæй кæнынц кæцыфæн-ды базарадон объекты дæр æмæ нын Уæрæсеимæ æнгом ахастытæ кæй ис, уымæ гæсгæ махмæ дæр тагъд фæзындысты дуканиты тæрхæджытыл. Ныри-дæгæн афтæ зæгъæн нæй æмæ тынг популярон сты не ‘мбæстæгты хсæн, фæлæ сыл скъоладзаутæ кæй фæцахуыр сты, уый катайы баппæрста ахуыргæнджыты æмæ ныййарджыты. Азы райдианы бæлвырд æрцыдысты электронон сигареттæ дымыны факттæ скъолаты, æмæ уæд ахуыргæнджыты номæй коллективон фыстæг æрвыст æрцыд РХИ-йы Парламентмæ, цæмæй закъон рахæссой æмæ сын Хуссар Ирыстоны территорийыл уæй кæныны бар ма уа.
Парламенты уынаффæ рахæссыны фæстæ августы мæйы бæстæйы Президент йæ къух æвæстиатæй æрфыста ацы закъоныл æмæ йæ тыхы бацыд йæ ныммыхуыр кæныны фæстæ. Амалиуæггæнджытæн иу мæй рæстæг раттой æмæ сæ бафæдзæхстой, цæмæй сæ товарæн исты саразой æмæ дарддæр мауал ласой æмæ уæй кæной ацы тамакотæ. Уæдæй фæстæмæ рацыд цалдæр мæйы æмæ закъонмæ гæсгæ нæ дуканиты электронон сигареттæ уæййаг мауал хъуамæ уыдаид, фæлæ…
Милицийы фадыгон инспектортæ æмæ экономикон фыдракæндтæ ма æруадзыны управленийы кусджытæ ныр цалдæр боны дæргъы горæт Цхинвалы уадзынц рейдон мадзæлттæ дуканиты æмæ базарадон объектты. Рейдтæ нысанмæздæхт сты электронон сигареттæ сбæлвырд кæнынмæ, базоной, сусæгæй-æргомæй ма сæ уæй кæнынц, æви нæ. Басгæрсты рæстæджы милицийы кусджытæ развæлгъау барвитынц хуымæтæг бынæттон цæрæджы электронон сигарет балхæнынмæ æмæ дзы кæмдæриддæр вæййы, уым ын æй сæрибарæй рауæй кæнынц. Уый та нысан кæны æмæ бæрндзинад хæссынæй кæй нæ тæрсынц ацы амалиуæггæнджытæ æмæ йæ куы анымайæм, уæд ын сæ уæй кæнын пайда дæр бирæ хæссы, æндæра ахæм рискыл нæ цæуиккой.
Басгæрстыты рæстæджы цалдæр дуканийы баййæфтой æмæ сконфискаци кодтой электронон сигареттæ, – кæмдæрты дзæвгар уыд сæ нымæц, кæмдæрты та хæрзцъус. Фæлæ иу ран дæр æмбæхст нæ уыдысты, – æвæрд уыдысты иууыл зынгæдæр бынæтты, цæмæй уайтагъд æлхæнæджы цæстыты бахауой. Уымæй уæлдай ма уæйгæнджытæ ноджы азымджын кодтой милицийы кусджыты, зæгъгæ нæ рагацау нæ бафæдзæхстат, сæ уæй кæныны бар кæй нæй, уый тыххæй. Милицийы кусджытæ хæсджын не сты, цæмæй исты закъон кæнæ уынаффæ куы рцæуа хаст, уæд æй адæмæн фехъусын кæной, – уый тыххæй ис дзыллон информацийы фæрæзтæ æмæ йæ хъуамæ уыдонæй базоной. Иу амалиууæггæнæг та йæхи ницызонæг скодта æмæ йæхи раст кодта, зæгъгæ, дам, æз нæдæр газеттæ фæрсын, нæдæр телеуынынадмæ кæсын, æмæ йæ кæцæй хъуамæ базонон. Æмæ йын уый та кæй аххос у? Æви йæ афтæ фæнды, цæмæй-иу Президент закъон бафыссыны фæстæ йæхæдæг азила цæрджытыл æмæ сын æй фехъусын кæна лæгæй-лæгмæ.
Милицийы кусджытæ ма иу дуканийы баййæфтой энергетикон нуæзтытæ дæр – æдæппæт 23 банкæйы. Ацы нуæзтытæн дæр уæй кæныны бар нæй Хуссар Ирыстоны территорийыл, уы-мæн æмæ 2012 азы РХИ-йы Парламент рахаста ахæм уынаффæ, кæцы стыр ахъаз фæцис фæсивæды фыдбылызæй бахизынæн. Уæдæй фæстæмæ барадхъахъхъæнæг органтæ сæ хъус дарынц ацы тæссаг нуæзтытæм æмæ дзы рейдон мадзæлттæ ауадзыны фæстиуæгæн рæстæгæй-рæстæгмæ байсынц. Кæй зæгъын æй хъæуы, раздæрау парахат нал сты, фæлæ дзы иуæй-иу амалиуæггæнджытæ уæддæр сусæгæй кæй ласынц уæй кæнынмæ, уый хорзыл дзурæг нæу.
Рейдон мадзæлттæ дарддæр дæр регуляронæй уагъд цæудзысты æмæ кæ-мæ æййафой, уæй кæныны бар кæмæн нæй, ахæм товар, уыдонæн сæ конфискаци кæндзысты. Ныридæгæн уал арæзт æрцыдис цалдæр суагъæйы æмæ цыбыр рæстæгмæ æрвыст æрцæудзысты тæрхондонмæ.
ДЖИОТЫ Алыксандр
Comments are closed, but trackbacks and pingbacks are open.