11-æм ноябры РХИ-йы Культурæйы министрады цур Адæмон сфæлдыстады республикон центры хъæппæрисæй киноконцертон зал «Чермен»-ы уагъд æрцыд эстрадон зарæджы 2-аг републикон фестиваль-конкурс «Ирыстоны хъæлæстæ». Фестиваль-конкурсмæ æрбацыд  бирæ адæм, æмæ сын уыд бæрæгбонон, хъарм зæрдæйы уаг. Хъуыстысты музыкæйы æхцон зæлтæ. Уæдмæ сценæмæ рахызт мадзаламонæг Гуыцмæзты Иннæ. Уый арфæ ракодта æрæмбырдуæвджытæн æмæ сценæмæ фæхуыдта РХИ-йы культурæйы министры хæдивæг Дзеранты Джульеттæйы. «Эстрадон зарæджы конкурс кæд нырма ног у, уæддæр дзы хайад райсы бирæ курдиатджын адæймæгтæ, кæцытæн сæ нымæц кæны фылдæрæй фылдæр. Абон ацы ног хайадисджыты æмрæнхъ сценæйыл ралæудзысты,  ивгъуыд азы конкурсы хайад чи иста, уыдонæй дæр бирæтæ. Иннæ ахæм ма конкурс цымыдисон у уымæй дæр, æмæ дзы хайад кæй исынц хæрзæвзонг хайадисджытæ дæр, стæй 35-аздзыдтæ æмæ уымæй уæлæмæйы кары æххæстгæнджытæ. Стыр бузныг зæгъын Адæмон сфæлдыстады центры кусджытæн Гуыцмæзты Эльзæйы сæргълæудæй. Уыдон æрвылаз дæр ауадзынц алыгъуызон конкурстæ, кæцытæ ахъаз кæнынц рæзгæ фæлтæры монон хъомыладæн æмæ сæ ирон традицитæ æмæ æгъдæуттыл ахуыр кæнынæн», — загъта Дзеранты Джульеттæ.

Фестиваль-конкурсы жюрийы уæнгтæ уыдысты Гуыцмæзты Эльзæ — Адæмон сфæлдыстады республикон центры директор, РХИ-йы культурæйы сгуыхт архайæг, Дзеранты Джульеттæ — РХИ-йы Культурæйы сгуыхт кусæг, Культурæйы министры хæдивæг, Гасситы Ацæмæз — Æлборты Феликсы номыл Цхинвалы музыкалон ахуыргæнæндоны академион зарды ахуыргæнæг (жюрийы сæрдар), Сланты Ацæмæз — Æлборты Феликсы номыл Цхинвалы музыкалон ахуыргæнæндоны академион вокалы ахуыргæнæг.

Мадзал райдыдта вокалон-эстрадон коллективты ралæудæй. Фестиваль байгом кодтой Колыты Аксойы номыл Аивæдты паддзахадон лицейы вокалон-инструменталон ансамбль «Гипс»-ы хайадисджытæ. Уыдон сæххæст кодтой æртæ зарæджы, уыцы нымæцы «Рæсугъд» æмæ «Нæртон». Уыдоны фæстæ та сценæйыл сæ арæхстдзинад равдыстой ацы лицейы вокалон-инструменталон ансамбль «Дизель бокс»-ы æххæстгæнджытæ (аивадон къухдариуæггæнæг — Гуыцмæзты Георги). Дарддæр сценæйыл ралæууыдысты горæт Къуайсайы вокалон къорд «Браво»-йы уæнгтæ, кæцытæ сæххæст кодтой «Мады зарæг». Сценæмæкæсджыты зæрдæмæ тынг фæцыдысты Тыджыты бинонты сæххæстгонд аргъуанон зарджытæ «Вдоль по ВИА Долоросса…» æмæ «Дæ хъару, Стыр  Хуыцау, стыр у».

Вокалон ансамблты фæстæ та сæ арæхст-дзинад æвдыстой хицæн зарæггæнджытæ. Ленингоры районы минæвар Мегрелишвили Индирæ хорз азарыд дыууæ зарæджы. Цъинагары хъæуы культурæйы хæдзары минæвар Джиголаты Аннæ дæр сæххæст кодта дыууæ зарæджы. Дзауы районы Хуыцъейы хъæуы культурæйы хæдзары конкурсант Гаглойты Владислав æрæмбырдуæвджыты дисы баппæрста йæ аивадæй. Уый йæ номыртæ сæххæст кæнынмæ, сценæмæ  рахызт кафгæйæ, йæ чысыл уæнгтæ афтæ аив айвæзта, афтæ хорз азарыд дыууæ зарæджы «Кавказ» æмæ «Мæ уарзон Ирыстон», æмæ йын æрæмбырдуæвджытæ кодтой тыхджын къухæмдзæгъд. Фæйнæ зарæджы хицæнтæй сæххæст кодтой Къуайсайы вокалон къорд «Браво»-йы уæнгтæ Багаты Владæ, Гæджиты Лаурæ æмæ Теблойты Камилæ. Сценæйыл сæрибарæй йæхи хатыд Цхинвалы районы Дменисы культурæйы хæдзары чысыл минæвар Дудайты Элинæ (къухдариуæггæнæг — Икъаты Ануси), кæцы сæххæст кодта «Иналы зарæг». Тынг хорз йæхи равдыста Цхинвалы скъола-интернаты ахуырдзау, чысыл Бикойты Светæ дæр, сæххæст кодта «Раз ладошка» æмæ «Первоклашка».

Сценæмæ рахызт æмæ дыууæ зарæджы сæххæст кодта РХИ-йы сгуыхт артисткæ Къуезерты Фатимæ. Тыджыты Аллæ тынг хорз  сæххæст кодта дыууæ зарæджы. Фестиваль-конкурс фæцис Плиты Григорийы ралæудæй, кæцыйы Гуыцмæзты Эльзæ абарста Суанты Кимимæ.

Фестиваль-конкурсы хайадисджыты алы номырæн дæр  аргъ кодтой жюрийы уæнгтæ æмæ сын æвæрдтой баллтæ. Гасситы Ацæмæз æмæ Сланты Ацæмæз конкурсанттæн сæ фылдæрæн загътой сæ фиппаинæгтæ, бирæтæн дзы бауынаффæ кодтой, цæмæй ма ныууадзой сценæ æмæ дарддæр кæной сæ аивадон архайд. Цалдæрæн та дзы загътой, цæмæй скъолайы фæстæ сæ ахуыр адарддæр кæной Цхинвалы музыкалон ахуыргæнæндоны.

Жюрийы уæнгтæм æрхаудта уæззау хæс, уыйбæрц курдиатджын хайадисджытæй хъуыд уæлахиздзаутæ равзарын. Фæлæ цалынмæ уыдон конкурсантты баллтæ нымадтой, уæдмæ уал æрæмбырдуæвджыты зæрдæтæ йæ диссаджы зардæй бахъæлдзæг кодта Æлборты Феликсы номыл музыкалон ахуыргæнæндоны 3-аг курсы студент Плиты Олег.

Жюрийы уæнгты уынаффæмæ гæсгæ вокалон ансамблы номинацийы фыццаг бынат лæвæрд æрцыд Тыджыты бинонтæн, дыккаг —  Колыты Аксойы номыл паддзахадон Аивæдты лицейы вокалон ансамбль «Дизель бокс»-æн æмæ æртыккаг бынат та фæци горæт Къуайсайы вокалон ансамбль «Браво»-йы. Вокалон инструменталон ансамблы номинацийы 1-аг бынат бацахста Аивæдты лицейы къорд «Гипс». Кæстæр категорийы хайадисджытæй 1-аг бынат лæвæрд æрцыд Багаты Владæйæн æмæ 2-аг бынат та — Бикойты Светæйæн. Солон зарæджы номинацийы 1-аг бынат саккаг кодтой дыууæ хайадисæгæн — Мегрелишвили Индирæ æмæ Тыджыты Аллæйæн, 2-аг бынæттæ  адих кодтой Гаглойты Владислав æмæ Плиты Григори, 3-аг бынæттæ та  лæвæрд æрцыдысты Къуезерты Фатимæ æмæ Теблойты Камилæйæн. Адæмон сфæлдыстады республикон центры дипломтæй хорзæхджын æрцыдысты конкурсанттæ иууылдæр. Фæуæлахизуæвджытæн бакодтой зæрдылдарæн лæвæрттæ.

Дзеранты Джульеттæ куыд загъта, афтæ-мæй ахæм фестивалтæ дарддæр дæр уагъд цæудзысты, уый тыххæй арæзт æрцыд Адæмон сфæлдыстады республикон центр. «Центры хæс у курдиатджын фæсивæд сбæрæг æмæ йын йæ рæзтæн баххуыс кæнын. Ацы нысанæн æрвылаз дæр уагъд æрцæуынц алыгъуызон мадзæлттæ. Адæмон сфæлдыстады центры  кусынц сæ хъуыдда-джы æцæг дæснытæ Гуыцмæзты Эльзæйы сæргълæудæй, уыдон ахъаз кæнынц нæ фæсивæды сфæлдыстадон хъомыс рæзын кæнынæн», — банысан кодта уый.

Центры директор Гуыцмæзты Эльзæ дæр раарфæ кодта фестивалы хайадисджытæн, конкурсы активон хайад кæй райстой, уый тыххæй. Уый фехъусын кодта, зæгъгæ, конкурс уагъд цæудзæн æрвылаз дæр æмæ, зæгъ, ныридæгæн уæхи цæттæ кæнын райдайут иннæ азмæ. Жюрийы сæрдар Гасситы Ацæмæз банысан кодта  адæмон сфæлдыстады центр активонæй æмæ хорз кæй бакуыстой æмæ сын загъта бузныджы ныхæстæ, уымæн æмæ иу чысыл мадзал сорганизаци кæныны тыххæй дæр бахъæуы бирæ тыхтæ бахардз кæнын æмæ ахæм фестиваль-конкурс ауадзыны тыххæй та хъуыд уæхскуæзæй бакусын. Уый ма банысан кодта, зæгъгæ, конкурсы фонограммæйæ пайдагæнæн нæй æмæ, дзы чи  спайда кæна иннæ хатт, уымæн нымад не ‘рцæудзæн йæ сæххæстгонд номыр. Жюрийы сæрдар ма загъта, зæгъгæ, сæйраг призон бынат рамбулын нæу, сæйраг у конкурсы хайад райсын.

Джиоты Екатеринæ

Comments are closed, but trackbacks and pingbacks are open.