Хетӕгкаты Къостайы номыл Хуссар Ирыстоны Паддзахадон драмон театры сценӕйыл 20 ӕмӕ 21 январы æвдыст ӕрцӕудзӕн спектакль «Фӕстаг ӕвдисӕн»-ы премьерӕ. Уый тыххӕй спектаклы режиссер Дзуццаты Тамерлан фехъусын кодта, Информаци ӕмӕ мыхуыры комитеты цы брифинг уагъд ӕрцыд, уым. Брифингы ма хайад райстой пьесӕйы автор Остъаты Алан ӕмӕ композитор Плиты Мурат.

Дзуццаты Тамерланы ныхӕстӕтӕм гӕсгӕ спектакль у тынг цымыдисон, уый бындуриуӕг кӕны 1920 азы июны мӕйы цаутыл. «Мах хӕсджын стӕм, цӕмӕй нӕ сывӕллӕттӕн равдисӕм, 1920-ӕм азты нӕ адӕмӕн гуырдзиаг меньшевиктӕ цы геноцид сарӕзтой, ӕппӕт уыцы цаутӕ. Ӕмӕ уый тынг ирдӕй ӕвдыст ӕрцыд Остъаты Аланы фыст пьесӕ «Фӕстаг ӕвдисӕн»-ы. Уыдон уыдысты дӕс боны, кӕцытӕ Ирыстоны скуынӕг кодтой 1920 азы. 12 июны гуырдзиаг гварди ӕрбацыдысты горӕт Цхинвалмӕ ӕмӕ 22 июны та фӕстаг ирӕттӕ ахызтысты Ручъы ӕфцӕджы сӕрты. Уымӕ гӕсгӕ, цы ирон адӕймаджы фӕнды йӕ адӕмы истори базонын, уый ӕнӕмӕнгдӕр хъуамӕ бакӕса ацы спектаклмӕ. Уымӕн ӕмӕ дӕ истори куы зонай, уӕд дӕ ӕцӕгӕй тыхджын», – банысан кодта Дзуццаты Тамерлан.

Спектаклӕн сӕрмагонӕй фыст ӕрцыд музыкæ, кӕцы ныффыста зынгӕ ирон композитор Плиты Мурат. «Уый у мӕ ӕнтыстджын куыстытӕй сӕ иу», – зӕгъы Мурат. Йӕ ныхӕстӕм гӕсгӕ музыкӕйы иу хай уый ныффыста Цӕгат Ирыстоны. «Музыкӕйы фыццаг фæлварæнтæ мын уыдысты рӕдыд фыст, уымӕн ӕмӕ ӕз ӕххӕстӕй не ‘нкъардтон спектаклы атмосферӕ. Фӕлӕ сценӕйыл режиссер ӕмӕ ар-тисттимӕ куыстӕн та йӕ гъӕд вӕййы сӕдӕ проценты. Уыцы рӕстӕджы фӕзынынц энергетикон ӕнкъарӕнтӕ, эмоцитӕ, кӕцыты гӕнӕн вӕййы уый фӕстӕ зӕлмӕ раивын. Уымӕ гӕсгӕ музыкӕйы фылдӕр хай ныффыстон театры мидӕг, спектаклмӕ куы кастӕн, уыцы рӕстӕджы», – банысан кодта композитор Плиты Мурат.

Йӕ хъуыдымӕ гӕсгӕ спектакль алы адӕймаджы зӕрдӕмӕ дӕр фӕцӕудзӕн, йӕ репетицимӕ кӕсгӕйӕ дӕр, зӕгъгӕ, ныридӕгӕн адӕймаджы зӕрдӕ уынгӕг кӕны. «Стыр бузныг мӕ фӕнды зӕгъын Дзуццаты Тамерланӕн, фадат мын кӕй радта ацы спектаклы сӕвӕрдмӕ мӕ хайбавӕрд бахӕссынӕн», – загъта Мурат.

Пьесӕйы автор Остъаты Аланы ныхӕстӕм гӕсгӕ кӕд драматургимӕ дард лӕууыд, уӕддӕр йӕ зӕрдыл кӕддӕриддӕр лӕууыдысты 1920 азы геноциды цаутӕ. «Тынг мӕ фӕндыд сӕ ном сын истӕмӕй ссарын. Цалдӕр азы дӕргъы фӕтымбыл кодтон уӕды цауты фӕдыл ӕрмӕджытӕ. Стыр ӕххуыс мын фесты, Мидхъуыддӕгты минстрады цы рӕстӕджы фӕкуыстон, уыцы азтӕ дӕр, стӕй архивты ӕрмӕджытӕ. Фылдӕр ныхас кодтон хистӕр кары адӕмимӕ, кӕцытӕ-иу мын радзырдтой тынг бирӕ цымыдисон цаутӕ. Кӕд ӕнцон нӕ уыд, уӕддӕр мӕ ныфс нӕ асаст ӕмӕ пьесӕ фыст ӕрцыд», – загъта Остъаты Алан.

Дзуццаты Тамерланы ныхӕстӕм гӕгӕ спектаклы сӕвӕрд у масштабон, уым хайад исынц 70 адӕймаджы онг, уыдоны нымӕцы сты артисттӕ ӕмӕ театры техперсонал, Хуссар Ирыстоны паддзахадон университеты актерон факультеты студенттӕ, скъоладзаутӕ ӕмӕ цӕгатирыстойнаг артисттӕ.

      Кокайты Зæринæ

Comments are closed, but trackbacks and pingbacks are open.