Фæфылдæр сты сывæллæттæн æххуысы фæрæзтæ

Хуссар Ирыстоны сывæллæтты райгуырды тыххæй иурæстæгон компенсаци фæфылдæр 5 минæй 10 мин сомы онг.

Ацы хъæппæрисæн æвдисæг уыд РХИ-йы Президент Бибылты Анатоли. Ныры онг фарстыл куыст цыд æмбæлон органты.

Æрæджы Хицауады æмбырды уынаффæ цыд, цæмæй 2019 азы январы мæйæ нæ республикæйы территорийыл цы сабитæ райгуыра, уыдонæн иурæстæгон компенсаци суа 10 мин сомы.

Ацы æмæ æндæр социалон нысаниуæджы фарстаты фæдыл нын лæмбынæгдæр радзырдта Æнæниздзинад æмæ социалон райрæзты министры хæдивæг Сиукъаты Наирæ.

«2018 азы январы мæйæ сывæллоны райгуырды тыххæй иурæстæгон æххуыс ссис 10 мин сомы. Нырмæ 2018 азы райдианæй 5 мин сомы чи райста, уыдонæн дæр нымад æрцæудзысты, цы фæндзгай мин сомтæ ма сæм æмбæлы, уыдон. Афтæ ма фыст æрцæудзысты сывæллоны райгуырдæй афæдз æмæ æрдæгмæ ныййарæг æрвылмæй цы дыгай мин сомтæ хъуамæ иса, уыцы фиддонтæ дæр. 18 азмæ алы сывæллонæн дæр цы 200 сомы фыст цыд æрвылмæй дæр, уый баззад æнæ-аивгæйæ», – зæгъы Сиукъаты Наирæ.

Уый ма куыд зæгъы, афтæмæй сабийæн йæ райгуырдæй 6 мæйы æмгъуыдмæ хъуамæ алкæцы ныййарæг дæр йæ гæххæттытæ бавдиса, фыст кæм у, уыцы ран социалон хайадтæм.

Æнæниздзинад æмæ социалон райрæзты министрады куыд зæгъынц, афтæмæй абоны бон иурæстæгон компенсацийы 10-гай минтæ райстой не ‘мбæстæгтæй Знауыры районы Цъорбисы хъæуы цæрæг Хуыбылты Екатеринæ, Цхинвалы районы Хелцуайы хъæуы цæрæг Тортиаты Аленæ, Чугуты Ада, Дзауы районæй – Бязырты Ирина æмæ æнд.

Раздæр фæндзгай мин сомтæ  чи райста, ома, 2018 азы райдианы, уыдонæн дæр ныр сæ бон суыдзæнис иннæ фæндзгай мин сомтæ райсын.

Куыд зонæм, афтæмæй раздæр уыцы компенсаци лæвæрд цыд æртыккаг сывæл-лонæн. Ныр Хицауады бадзырдмæ гæсгæ 2018 азæй компенсаци лæвæрд цæудзæн дыккаг æмæ  ма уый фæстæ цы сабитæ фæзына, уыдонæн дæр.

Уымæй дарддæр Сиукъаты Наирæ куыд зæгъы, афтæмæй Хицауад ноджыдæр агуры фæрæзтæ, цæмæй 2019 азы дæр фæфылдæр кæной ацы социалон фиддонтæ. «Архайдзыстæм, цæмæй Цæгат Кавказы республикæты царды æмвæзадмæ скæнæм сывæллоны райгуырды тыххæй иурæстæгон компенсацийы фæрæзты бæрц», – зæгъы уый.

Министры хæдивæг куыд загъта, афтæмæй куыст цæуы æндæр социалон фадыджы дæр. 2018 азы социалон райрæзты фадыджы министрад рахицæн кодта æвæрæз æмбæстæгтæн æххуысы тыххæй компенсаци 800 мин сомы бæрц. Æдæппæт уыцы фæрæзтæй материалон æххуыс райста 72 æххуысхъуаг æмбæстаджы. Уыдоны нымæцы – I-аг æмæ II-аг къорды инвалидтæ, гуырцæй инвалидтæ, Стыр Фыдыбæстæйон хæсты хайадисджытæ.

Уæззау цардуагон уавæрты бахауæг æмбæстæгтæн адресон æххуыс цæуы «Адресон социалон æххуыс бакæныны тыххæй» Хицауады уынаффæмæ гæсгæ.

УАЗÆГТЫ Марфа