7-æм августы изæры авд сахатыл Цъинагары хъæууон администрацийы  бæстыхайы цурмæ æрбамбырд сты Дзукъаты хъæу, Гдулет, Цъинагары хъæуты цæрджытæ, ацы комæй рацæугæтæ, фæлæ ныртæккæ æндæр æмæ æндæр рæтты чи цæры, уыдонæй сæрдыгон мæйты сæ райгуырæн хъæутæм улæфынмæ чи æрцæуы, уыцы уазджытæ.

Уырдæм ма æрбацыдысты Ленингоры районы администрацийы сæргълæууæджы хæдивæг Дриаты Гамлет, Хуриты Гивийы номыл Цъинагары астæуккаг скъолайы директор Гуссойты Ласко, Цъинагары хъæууон администрацийы ног сæргълæууæг Быценты Вадим. Фыдохы мадзалы ма хайад райстой уæрæсейаг арæнхъахъхъæнæг заста-вæйы хистæр æмæ минæвæрттæ. Æрбамбырдуæвджытæн сæ цæсгæмт-тыл зынд æрхæндæгдзинад, сног та сын сты 2008 азы августы хæстон цаутæ. Хъуыстысты æрхæндæг музыкæйы зæлтæ. Сыгъдысты цырæгътæ æмæ афтæ зынд цыма дзыллæты бæсты дæр цырæгътæ кæуынц.

Мысæн изæр байгом кодта, ацы рæнхъыты автор, Ленингоры районы администрацийы культурæйы хайады Цъинагары зонæйы сæйраг специалист Уалыты Зоя. Уый цыбыртæй æрдзырдта 2008 азы августы трагикон цауты тыххæй. «2008 азы 7-æм августы адæм сæ изæры зылдтытæ куы бакодтой æмæ сæ уæтты куы æрулæфыдысты, уæд айхъуыстысты тыхджын æхстытæ. Фидауынгæнджытæ акастысты æмæ федтой, Тбилисы трассæйæ Хурвалеты хъæуы ‘рдæм кæй æрбацæуынц бирæнымæц æфсæддон машинæтæ. Машинæтæй рахызтысты гуырдзиаг лæгмартæ æд хотыхтæ æмæ апырх сты хъæутыл. Гуырдзиаг агрессортæн сæ фылдæр æрбацыд Цъинагармæ. Сæ иутæ бацыдысты Уалыты Лавренты хæдзармæ, хорз уыд æмæ фысымтæй уым ничи разынд. Гуырдзиаг хæстонты иу къорд уым æрæхсæвиуат кодтой, сæ хотыхтæ рудзгуытæй радаргæйæ. Бацыдысты Цъинагары хъæууон администрацийы бæстыхаймæ æмæ дзы æрсагътой Гуырдзыстоны тырыса, фæлæ гуырдзиаг фашистты тырыса раппæрстой нæ хъæбатыр лæппутæ. Гуырдзиаг абырджытæ хастой, сæ зæрдæмæ цы цыд, æппæт уыдæттæ. Пырх кодтой хæдзарон дзаумæттæ. Уыцы тыхст рæстæджы ацы хъæуты цæрджытæн баххуыс кодтой æмæ сæ машинæтыл æдас ранмæ ластой Дзукъаты Артем, Бестауты Эльбрус æмæ Гояты Эдуард. Уыдон æнæзивæгæй сарæзтой цалдæргай рейстæ æмæ цæрджыты фæхæццæ кодтой Багъиты хъæуы хъæдмæ. Фæлæ фыдлæг æмæ фыдбонæн бирæ цæрæнбон нæй æмæ абон цæрæм хæдбар республикæйы», – дзырдта уый.

Мысæн мадзалы ма раныхас кодтой Цъинагары астæуккаг скъолайы директор Гуссойты Ласко, Ленингоры администрацийы сæргълæууæджы хæдивæг Дриаты Гамлет, уæрæсейаг арæнгæрон заставæйы хистæр Андрей. Хæстыл фыст Галуанты Людмилæйы æмдзæвгæ бакаст Цъинагары астæуккаг скъолайы рауагъдон, ЦИПУ-йы журналистикæйы факультеты 1-æм курсы студенткæ Хъайсынты Иринæ.

Мысæн мадзал бацæттæ кодтой Цъинагары Культурæйы хæдзары директор Бестауты Эмзар, пенсион фонды социалон кусджытæ Хуыбылты Тинæ æмæ Хацырты Циури.

Фыдохы мадзалы кæрон айхъуыстысты Республикæ Хуссар Ирыстоны Паддзахадон гимны зæлтæ.

УАЛЫТЫ Зоя,

РХИ-йы Культурæйы сгуыхт кусæг

Comments are closed, but trackbacks and pingbacks are open.