Фæндагон змæлды æдасдзинады фæткойтæ хынцын æнæмæнг у хи цард бахъахъхъæныны нысанæн. Уый тыххæй ацы бонты ХИПУ-йы уагъд æрцыд тымбыл фынг. Сорганизаци йæ кодта Республикæ Хуссар Ирыстоны Æхсæнадон палатæ. Хуынд æм æрцыдысты куыд министрадтæ æмæ ведомствоты сæргълæуджытæ, афтæ астæуккаг скъолаты директортæ, горæты администрацийы ахуырады хайады минæвæрттæ æмæ автоинспекцийы кусджытæ.

Мидхъуыддæгты министрады фæндагон змæлды æдасдзинады паддзахадон инспекцийы управленийы къухдариуæггæнæг Джиоты Алан банысан кодта, зæгъгæ, фæндагон змæлды æдасдзинад хъахъхъæнын хъæуы царды æдасдзинады тыххæй. Хъыгагæн, фæндæгтыл мæлыны цаутæ сты арæх.

Бахатыд, цæмæй арæзт æрцæуа фæндагон змæлды æдасдзинады фæдыл къамис.

«Уыцы къамисы сконды хъуамæ уой æппæт профилон министрадтæ æмæ уагдæтты минæвæрттæ, кæцытæ иумиагæй скъуыддзаг кæндзысты сæвзæргæ фарстатæ.

Афæдзы дæргъы нæ республикæйы хынцыд æрцыд 173 фæткхалæн цауы æмæ сæ фæмард 13 адæймаджы. Аивгъуыйгæ аз иууыл фылдæр аваритæ æрцыдысты нæ горæты 8 июны уынгыл – 14 фæндагон фæткхалæн цауы. Фылдæр аваритæ хынцыд æрцæуы къуырисæр бонты», – банысан кодта Джиоты Алан.

Паддзахадон автоинспекцийы сæргълæууæг ма банысан кодта, зæгъгæ, нæ уынгты видео-цæстдарæнтæ æвæрд куы ‘рцæуид, уæд фæндагон змæлды бархалæн цаутæ скъуыддзаг кæнын æнцондæр уаид.

Сæ хъуыдытæ ма фæндагон змæлды фæтк халыны фæдыл дзырдтой нæ горæты скъолаты директортæ, кæцытæ банысан кодтой, зæгъгæ, райсомæй ахуырадон объектты раз æрæмбырд вæййы бирæ машинæтæ. Уыдон фæхъыгдарынц скъоламæ цæуæг ахуырдзау фæсивæды.

Нæ горæты 2-æм астæуккаг скъолайы директор Ольга Михайлиди бузныджы ныхæстæ загъта нæ горæты автоинспекцийы кусджытæн, кæцытæ æрвылрайсом ахуырмæ цæуæг скъоладзаутæн феххуыс кæнынц фæндагыл ахизынæн. Нæ горæты 12-æм Æрсойты Геннади астæуккаг скъолайы директор та банысан кодта, зæгъгæ, фистæг бæлццон æмæ машинæйы шофырæн нæй кæрæдзимæ æмбаргæ ахаст – æмæ уый та у фæндагон змæлд фехалыны сæйраг аххосаг.

Æхсæнадон палатæйы сæргълæууæг Дзиццойты Анатоли банысан кодта, зæгъгæ, скъолаты ахуыры процессы 15 минуты раздæр куы райдаид, уæд уый, бирæбæрцæй сисит фæндагон змæлды æндыгъддзинад райсомæй.

Йæ ныхæстæм гæсгæ, Цæгат Ирыстоны иуæй-иу ахуырадон уагдæтты ауыры рæстæг райдайы 8.30 сахатыл.

«Абон автоскъола кусы бæрзонд æмвæзадыл æмæ дарддæр дæр йæ куыст хуыздæр кæндзæн», – банысан кодта ХИПУ-йы ректор Тедеты Вадим. Уый ма куыд загъта, афтæмæй уыдон æмгуыст кæнынц нæ республикæйы Паддзахадон автоинспецийы кусджытимæ æмæ, зæгъгæ, университеты автоскъола нымад цæуы республикæйы хуыздæр ахуыргæнæндоныл. Фæндагон æдасдзинады фæтк чи халы, уыдон æхсæн нæ университеты автоскъолайы рауагъдонтæй бирæ нæ вæййы.

Тымбыл фынджы хайадисджытæ бахатыдысты нæ республикæйы политикон парти «Иугонд Ирыстон» – ы сæрдар Тадтаты Аланмæ, цæмæй сын баххуыс кæна проект «Æдас горæт» раразмæ кæныны хъуыддаджы. Уæлдайдæр ахæм фарсты, куыд уæлæмхас финансон фæрæзтæ рахицæн кæнын горæты скъолатæ æмæ сывæллæтты рæвдауæндæтты рæзты ацы проект реализаци кæнынæн. Тадтаты Алан ныфс бавæрдта, йæ хъус кæй æрдардзæн ацы фарст æрбæстон кæнынмæ.

«Æз, мæхæдæг, республикæйы къухдариуæгады раз фарст æрæвæрдзынæн, цæ-мæй финансон фæрæзтæ хицæн æрцæуой ацы проект реа-лизаци кæныны фæдыл», – загъта уый. Тадтаты Алан куыд банысан кодта, афтæмæй закъонмæ гæсгæ хъæуы фæкарздæр кæнын фæндагон змæлд халджыты ныхмæ æфхæрд.

«Хъæуы закъондæттынады æмвæзадыл фæкарздæр кæнын, фæндагон змæлд чи халы, уыдон ныхмæ, суанг сын машинæ скъæрыны бартæ æрисын æмæ сæ ныхмæ карз мадзæлттæ исыны онг – ахæм хъæппæрисимæ æз бахатыдтæн нæ парламентмæ дæр», – банысан кодта Тадтаты Алан.

Тымбыл фынджы хайадисджытæ рахæцыдысты ахæм хъуыдыйы фарс, зæгъгæ, «Æдас горæт» – ы проект у ахсджиаг. Уыимæ ма иумæ, нæмæнгæй, хъæуы æгас горæты видеокамерæтæ сæвæрын, кæцыты руаджы хынцыд цæудзысты фæндаджы фæтк халджытæ. Уымæн æмæ нæ фæндæгтыл сæвзæргæ уавæр домы карз мадзæлттæ райсын.

 

Нæ уацх.

Comments are closed, but trackbacks and pingbacks are open.