Фæсивæд хъуамæ æмгуыст кæной, архайой иумæ

Ныр цалдæр боны дæргъы нæ республикæйы уагъд цыдис фыццаг уæрæсейаг-ирыстойнаг фæсивæдон форум. Хайад дзы истой Донецк æмæ Луганскы Адæмон Республикæты, æфсымæрон Абхаз æмæ Приднестроваг-Молдаваг Республикæты, Арцах æмæ Хуссар Ирыстоны фæсивæды  минæвæрттæ.

Семæ фембæлд РХИ-йы Президент Бибылты Анатоли. Уый банысан кодта, зæгъгæ, тынг ахсджиагыл нымайы, бирæ бæстæты фæсивæды минæвæртты ‘хсæн кæрæдзиæмбарындзинад кæй ис æмæ кæрæдзиимæ бастдзинæдтæ кæй аразынц.

«Тынг æхсызгон мын у, ахæм ахсджиаг нысаниуæг кæмæн ис, уыцы форум уагъд кæй цæуы Хуссар Ирыстоны зæххыл. Хорз хъуыддагыл нымайын уый, æмæ уæрæсейаг-ирыстойнаг фæсивæдон форумы æрмæст уæрæсейаг фæсивæды минæвæрттæ нæ исынц хайад,  фæлæ ма – хæларадон республикæты фæсивæды минæвæрттæ дæр. Тынг ахсджиаг хъуыддагыл нымайын,  нæ республикæты фæсивæды минæвæрттæн кæрæдзиимæ иудзинад кæй ис, уый. Уымæн æмæ мах куы фæуынæм, цы проблемæтæ ис нæ разы, кæнæ нæ ныййарджытæ, нæ фыдæлтæ цы æргъадтыл хъомыл кодтой, уый, уæд ацы хорз æмæ царды хъæуæг миниуджытæ мах æрбаиу кæнынц.

Кæй зæгъын æй хъæуы, Европæйы бæстæтæ æппæт дæр аразынц, цæмæй мæнæ æз цы адæймагон миниуджыты кой кæнын, уыдон фесæфой, æмæ нæ фыдæлтæ цы хъуыддагыл тох кодтой, уый ферох кæной. Фæлæ мах æппæт дæр аразæм, цæмæй нæ фæсивæды минæвæрттæ аразой раст къахдзæфтæ, кæцытæ сын фадат дæттынц, цæмæй хъомыл кæной куыд сæхæдæг, афтæ  кæсдæрты дæр патриотон æргъадтыл. Мæн банысан кæнын фæнды уый,  æмæ Хуссар Ирыстоны фæсивæд кæй хъомыл кæнынц интернационалон æмæ патриотон æргъадтыл, куыд не ‘фсымæрон паддзахадты фæсивæд, афтæ. Æмæ ахæм форумтæ та махæн дæттынц ныфс, нæ фæсивæд кæй хъомыл кæнынц интернационалон принциптыл æмæ патриотон æнкъарæнтыл. Ацы хъуыддаг æз нымайын тынг ахсджиагыл. Уымæн æмæ ацы æнкъарæнтимæ ис фенæн сомбоны фæсивæды минæвæртты иудзинад, сæвзæргæ  проблемæтæй кæцыдæртæ иумиаг тыхæй скъуыддзаггæнæн. 

Кæй зæгъын æй хъæуы, иу ран лæууын нæ хъæуы, хъæуы хиуыл кусын, хъахъхъæнын национ интерестæ, уымæн æмæ сымахæй чидæртæ сомбон суыдзысты йæ республикæйы паддзахадон кусджытæ. Мах иумæ куы уæм, нæ фæсивæды минæвæрттæ иумæ æмгуыст куы кæной, уæд нын ницæмæй уыдзæн тас. Махæн ис иумиаг нысан æмæ хæслæвæрдтæ, кæцытæ æххæст æрцæудзысты», – загъта  Президент  Бибылты Анатоли. Уæрæсейаг-Ирыстойнаг форумы хуссарирыстойнаг фарсæй Гатыгкоты Валентинæ йæ раныхасы банысан кодта, зæгъгæ,  форум у ахæм бынат, цыран реализаци æрцæуынц алыгъуызон проекттæ. Фæлæ проекттæ среализаци кæнынæн хъæуы стыр æххуыс æмæ фарсхæцынад. Цæмæй ацы форум уагъд æрцыдаид, уый тыххæй сын стыр æххуыс бакодта Президент Бибылты Анатоли.

Уæрæсейаг-ирон форумы Уæрæсейы фарсæй минæвар Никита Чекрыгин бузныджы ныхæстæ загъта, форумы организатортæн æмæ Президент Бибылты Анатолийæн, фадат сын кæй радта йæ ауадзынæн. «Уæрæсейы делегацийы номæй мæ фæнды зæгъын стыр бузныг уæ хъарм ахасты тыххæй. Мæн ныфс ис, ацы форум фæстаг кæй нæу, уымæн æмæ тынг ахсджиаг у фæсивæдæн кæй ис æхсæнадæмон аренæйы сæ ныхас зæгъыны фадат» – загъта Никита Чекрыгин.

Уый дзырдта Хуссар Ирыстонмæ туристты раздахын информацион фæрæзты руаджы, кæцытæ æддейæ дзурдзысты республикæйы рæсугъддзинад æмæ историйы тыххæй.

«Уæрæсейаг-ирыстойнаг иннæ форумы фæлгæтты нæ фæндид, цæмæй арæзт æрцæуа информацион фæзуат, цыран ныхас цæудзæн, Хуссар Ирыстоны туристон потенциалы фæдыл. Мах делегациимæ ис уæрæсейаг æхсæнадон организаци «Уæлахизы волонтертæ»-йы минæвар. Куыд зонут, афтæмæй фидæн аз нысан цæудзæн Стыр Уæлахизы 75 азы бон», – фехъусын кодта уæрæсейаг минæ-вар.

Уыцы организацийы фæлгæтты ис программæ «Дунеон волонтертæ», цыран архайынц 35 бæстæйы бæрц. Уым фæсивæды минæвæрттæ цæттæ кæндзысты мадзæлттæ, кæцытæ уагъд цæудзысты Стыр Уæлахизы юбилейы цытæн. Уый тыххæй хорз хъуыддагыл нымайæм, цæмæй ацы организаци Хуссар Ирыстоны дæр рауæрæх уа. Президент Бибылты Анатоли рахæцыд, форумы уæрæсейаг минæвар цы идеятæ бавдыста, уыдоны фарс. Банысан кодта, æппæт ацы идеяты среализаци уыдзæн æппæт фæсивæдон минæвæртты иумиаг серьезон ахаст куыстмæ, æмæ сæ æххæст кæнын хъæуы.

Донецкы Адæмон Республикæйы фæсивæды минæвар Виктор Орехов фехъусын кодта, зæгъгæ, форумы руаджы сæ делегацийы минæвæрттæн фæзынд Хуссар Ирыстонмæ æрцæуын, бынаты республикæйы рæсугъд бынæттæ фенын æмæ ирон æмбæстæгтимæ бынаты ныхас кæныны фадат.

«Цытджын Президент, нæ делегацийы номæй мæ фæнды бузныджы ныхæстæ зæгъын, Донецкы Адæмон Республикæйы сырæзт æмæ рæзты фæдыл уе ‘нæкæрон æххуысы тыххæй. Ацы форумы фæлгæтты нæ республикæ æмæ Хуссар Ирыстоны Фæсивæды хъуыддæгты фæдыл спорт æмæ туризмы ведомствоты сæргълæуджытæ хъуамæ къухтæ æрфыссой æмгуыстады фæдыл сразыдзинадыл. Ацы хъуыддаг у ахсджиаг, уымæн æмæ фæсивæды минæвæрттæ сты ног фæндтæ æмæ идеяты фарсхæсджытæ. Алы бæстæйæн дæр фæсивæды минæвæрттæ сты йæ сомбон» – банысан кодта Виктор Орехов. Йæ раныхасы фæстæ уый зæрдылдарæн лæвар бакодта Президент Бибылты Анатолийæн.

Луганскы Адæмон Республикæйы фæси-вæды минæвар Роман Олексин бузныджы ныхæстæ загъта форумы организатортæн, фадат кæй радтой фæсивæды минæвæрттæн кæрæдзиимæ фембæлын æмæ ныхас кæнынæн, уый тыххæй.

«Ацы форум уадзыны рæстæджы мах базонгæ стæм æндæр республикæты фæсивæды минæвæрттимæ. Фæзындис нæм иумиаг плæнттæ. Нæ делегацийы сконды сты куыд æхсæнады минæвæрттæ, афтæ паддзахадон органты минæвæрттæ дæр, цæмæй кæрæдзийы нæ фæлтæрддзинадимæ зонгæ кæнæм. Мах, æцæгæйдæр, кæрæдзийæн систæм тынг æввахс паддзахадтæ, уый фæдыл кусын хъæуы дарддæр, хъæуы ног идеятæ реализаци кæнын алы фадыджы дæр», – банысан кодта минæвар.

Фембæлды рæстæджы раныхас кодтой иннæ республикæты минæвæрттæ дæр кæцытæ сæ рады бæcтæйы сæргълæууæджы зонгæ кодтой сæ программæтимæ æмæ ног идеятимæ. Фембæлды хайадисджытæ Президентмæ лæвæрдтой алыхуызон цымыдисгæнæг фарстатæ. 

ТАНДЕЛАТЫ Виленæ