Цæмæй æвзонг фæлтæр спорт бауарзой, сæ зæрдæмæ йæ арф айсой, уый тыххæй сæ, фыццаджыдæр, хъуамæ разæнгард кæной хистæртæ. Уыцы нысанæн у йæ куыст Цхинвалы районы фæсивæд æмæ спорты хъуыддæгты хайады хистæр Бестауты Кавказæн. Ацы бынаты кæд нырма бирæ рæстæг нæ кусы, уæддæр бæрæг у, æвзонг фæлтæримæ кусын ын кæй хæссы æхцондзинад. Æмæ сæ разæнгард кæны спортивон ерыстæ æмæ ма æндæр алыхуызон бæрæгбонон мадзæлттæ æмæ зæрдылдарæн цауты хайад исынмæ.

Развæлгъау цæттæгонд планмæ гæсгæ бацæттæ кодта ерыстæ: шашкæтæ, футбол, волейбол, бæндæн ивазын, армрестлинг, стъолы теннис æмæ спорты æндæр хуызтæй. Ахæм ерысты хайад фæисынц канд районы фæсивæд нæ, фæлæ ма республикæйы иннæ районты спортсментæ дæр. Уый тынг хорз хъуыддаг у, уымæн æмæ уæд спортсментæ сæхи хуыздæр бацæттæ кæнынц ерыстæм, уыимæ ма уагъд æрцæуынц бæрзонд спортивон æмвæзадыл æмæ спортуарзджыты нымæц дæр вæййы бæрæг фылдæр. Зæгъæм, стъолы теннисæй турнир уагъд куы цыд, уæд дзы хайад райстой Цхинвалы районæй дарддæр Дзау, Ленингор æмæ Знауыры районтæ дæр. Канд Цхинвалы районы нæ, фæлæ ма æнæхъæн республикæйы дæр зындгонд уыд Цхинвалы «Спартак»-ы футболист, алкæмæн дæр уарзон адæймаг, Дменисы хъæуккаг Габайты Иван. Уымæн йæ рухс ном арыны тыххæй æрвылаз дæр уагъд фæцæуы турнир футболæй хистæр кары хъазджыты хайадистæй. Ацы турниры хайад фæисынц республикæйы районты командæтæ. Уым иууыл цæттæдæр вæййы Знауыры районы командæ æмæ ныр дыккаг хатт сси турниры уæлахиздзау.

Хайад фæсивæды ‘хсæн канд спортивон ерыстæ æмæ турниртæ нæ фæуадзы, фæлæ ма ауадзынц бæрæгбонон мадзæлттæ дæр æмæ сæ активон хайад райсынц скъоладзау фæсивæд. Уыимæ ма активон хайад райсынц цыртдзæвæнтæ æмæ æндæр æхсæнадон бынæттæ сыгъдæг кæныны. Æппæт уыдæттимæ Бестауты Кавказ архайы, йæ куыстæй дарддæр, æндæр хъуыддæгтæ дæр æрбæстон кæныныл. Цæвиттон, курдиатджын нывгæнæг Кокойты Хазбийы райгуырдыл сæххæст 80 азы. Цæмæй йæ бæрæгбон æмбæлон æгъдауæй ацыдаид, уый тыххæй цæстуарзонæй бацархайдта Бестауты Кавказ. Уый йæ фæндон загъта нæ республикæйы уæлдæрлæууæг органтæн æмæ йын сæххæст кодтой йæ фæндон. Уымæ гæсгæ Бæстæзонæн музейы уыд йæ нывты равдыст æмæ уымæй стыр æхцондзинад райстой аивадуарзджытæ.

Бестауы фырт дарддæр дæр зæрдиагæй архайы, азы кæронмæ ма йын цы мадзæлттæ хъуамæ уагъд æрцæуа, уыдон бацæттæ кæныныл.

ХУЫБИАТЫ Никъала

Comments are closed, but trackbacks and pingbacks are open.