Республикæ Хуссар Ирыстоны Президент Тыбылты Леонид азылд Знауыры районы иумиагахуырадон уагдæтты фæстаг дзæнгæрæджы сæраппонд цытджын линейкæтыл. Паддзахады сæргълæууæгимæ уыд Президенты паддзахадон уынаффæгæнæг Цоциты Барис дæр.

Тыбылты Леонид уал раздæр бацыд Терегуаны астæуккаг скъоламæ æмæ фæстаг дзæнгæрæджы бæрæгбоны цытæн раарфæ кодта рауагъдонтæн.

«Абон сымах гом кæнут уæ дарддæры царды дуæрттæ, сымах хъуамæ равзарат, дарддæр цы фæндагыл хъуамæ рацæуат, уый. Мæн фидарæй уырны, сымах раст фæндаг кæй равзардзыстут, бæрзондквалификациджын специалисттæ кæй суыдзыстут æмæ Райгуырæн бæстæйы хæрзиуæгæн кæй кусдзыстут», — рауагъдонтæн загъта Президент.

Тыбылты Леонид банысан кодта, зæгъгæ, бæстæйы къухдариуæгад стыр хъусдард здахы республикæйы фæсивæдмæ.

«Æдзух рæзынц æмæ эксплуатацимæ лæвæрд цæуынц ахæм объекттæ, цыран фæсивæд сæ сæрибар рæстæг æрвитынц пайдаимæ, — загъта Президент. Кусын райдыдта Национ музей, арæзт цæуы драмон театр, нæ разы цы бирæ хæстæ æмæ плæнттæ ис, уыдон мах æххæст кæндзыстæм».

Паддзахады сæргълæууæг банысан кодта, зæгъгæ, куыст цæуы, æвзонг бинонтæн æмæ уæззау уавæрты цы бинонтæ цæрынц, уыдонæн районы фатертæ саразыныл.

Тыбылты Леонид ма банысан кодта, зæгъгæ, куыст цæуы республикæйы демографион уавæр фæхуыздæр кæныны программæйыл дæр.

Терегуаны астæуккаг скъолайы директор Тадтаты Ритæ бузныджы ныхæстæ загъта Хуссар Ирыстоны Президент Тыбылты Леонидæн, йæ хъус сæм кæй дары, уый тыххæй. Рауагъдонтæн та загъта æнæниздзинад, цъæх арвы бын цæрын æмæ рæствæндаджы фæндиæгтæ.

Дарддæр Тыбылты Леонид фæуазæг Знауыры поселочы астæуккаг скъоламæ æмæ ба-нысан кодта, зæгъгæ, иннæ скъолаты ‘хсæн Знауыры скъола кæддæриддæр уыд сæрмагонд бынаты.

«Абон æз аскъуыддзаг кодтон скъола фæуыны тыххæй, сæрмагондæй, Знауыры районы скъолаты рауагъдонтæн раарфæ кæнын, уымæн æмæ Знауыры район мæ район у, ацы скъола дæр æввахс лæууы мæ зæрдæмæ», — загъта Тыбылты Леонид.

Дарддæр Президент раарфæ кодта æмæ фæндарасты ныхæстæ загъта рауагъдонтæн, загъта сын æнæниздзинады æмæ цъæх арвы бын цæрыны фæндиæгтæ.

«Нæ цард вазыгджын у, æмæ алы хатт алцы хорз æмæ æнцонæй нæ рауайы, вæййы зындзинæдтæ дæр, кæцытимæ хъæуы тох кæнын, æмæ уымæ хъуамæ уат цæттæ, — загъта Тыбылты Леонид. Алы къахдзæфыл дæр хъуамæ хъуыды кæнат, тырнут зонын-дзинæдтæм, æнæ зонындзинæдтæй цард æххæстбæрцон нæ вæййы».

Скъолайы директор Хуыгаты Валентинæ бузныджы ныхæстæ загъта уазджытæн сæ хъусдарды тыххæй.

«Леонид Харитоны фырт, дæуæн скъолатæ иууылдæр дæ зæрдæмæ æввахс сты, фæлæ дын ацы скъола, æвæццæгæн, тынг æввахс у, стыр бузныг дын, абон ацы цытджын бæрæг-оны  махимæ кæй дæ, уый тыххæй», — банысан кодта Хуыгаты Валентинæ.

Дарддæр скъолайы директор рауагъдонтæн загъта, зæгъгæ, абон уыдон æрлæудзысты хæдбар царды фæндагыл, цыран сæм æнхъæлмæ кæсынц бирæ цымыдисон фæндæгтæ.

«Равзарут уæ зæрдæйæн æввахс професси, кусут цæсгомджынæй нæ республикæйы хæрзæбонæн, — загъта скъолайы директор. Сабыр арвы бын цæрут, æцæг адæймагон амонд — уæ хай, амонд у уæхи сæрмагонд тыхтыл æу-уæндын. Сымах нæ цин, нæ сæрыстырдзинад, нæ фидæн стут. Рæствæндаг ут, зынаргъ рауа-гъдонтæ!».

Дарддæр паддзахады сæргълæууæг раарфæ кодта Бехъмары астæуккаг скъолайы рауагъдонтæн, загъта сын æнæниздзинады, амонды цардвæндаджы æнтыстыты фæндиæгтæ.

Паддзахады сæргълæууæг банысан кодта, зæгъгæ, цæмæй фæсивæд сæ сæрибар рæстæг хуыздæр æрвитой, уый тыххæй ацы хъæуы арæзт æрцæудзысты уавæртæ, сæрмагондæй, хъæууон администрацийы зæронд бæстыхайы бынаты фæнд цæуы Культурæйы хæдзар саразын.

Уыимæ иумæ ма сын Тыбылты Леонид ныфс бавæрдта, хъæуы кæй бакондæуыдзæн тренажерон зал.

* * *

Хуссар Ирыстоны Президент ма бацыд  Мидхъуыддæгты министрады Знауыры районон хайадмæ дæр. Йемæ уыдысты Президенты паддзахадон уынаффæгæнæг Цоциты Барис, Знауыры районы администрацийы сæргълæууæг Джиоты Рустем, Президенты Администрацийы Контролон управленийы къухдариуæггæнæг Къодоты Таймураз.

Йæ визиты рæстæджы Президент ныхас кодта Мидхъуыддæгты министрады районон хайады кусджытимæ, федта, цы бæстыхайы кусынц, уый дæр.

Коллективимæ ныхас кæнгæйæ,  Тыбылты Леониды бацымыдис кодта æрцæугæ цауты статистикæ æмæ куысты процессмæ. Бæстыхай фенгæйæ, паддзахады сæргълæууæг банысан кодта кусæн бынаты фæтк æмæ дисциплинæ хъахъхъæныны æнæмæнгхъæуындзинад.

 

 

 

***

Алы адæймагæн дæр йæ царды вæййы ахæм цаутæ, кæцыты цæрæнбонтæм йæ зæрдыл бадары. Нæ горæты скъола-интернаты ахуырдзаутæн дæр ахæм зæрдылдарæн цау суыдзæн 25-æм майы фæстаг дзæнгæрæг. Уыдон 1-æм сентябры нал баздæхдзысты се скъолатæм æмæ сæ ахуыргæнджыты раз нал æрлæудзысты. Уыдонмæ æнхъæлмæ кæсы ног цард. Чи сæ университеты, институты, техникумы къæсæрæй бахиздзæн, чи та сæ уайтагъд фæллойы фæндагыл ныллæудзæн.

25-æм майы Цхинвалы скъола-интернаты кæртæй хъуыстысты бæрæгбонон музыкæйы зæлтæ. Скъола уыд бæрæгбонвæлыст. Бæрæгбонон атмосферæйы æнкъардæуыд куыд цины, афтæ æрхæндæджы æнкъарæнтæ дæр. Цины уый тыххæй, æмæ сæм дарддæр æнхъæлмæ кæсы рæсугъд сомбон, хъыджы та уымæн, æмæ сæ нæ фæнды сæ уарзон скъолайæ, сæ уарзон ахуыргæнджытæй фæхицæн кæнын, уымæн æмæ скъолайы ахуыры азтæ зæрдæйæн æхцондæттæг сты, иууыл æвæлмастдæр азтæ вæййынц. Ацы уалдзыгон бон скъоладзаутæ уæлдай рæсугъддæр вæййынц, сæ цæсгæмттыл фæхъазы уæздан мидбылхудт.

Бæрæгбонон мадзалмæ фæуазæг сты РХИ-йы Хицауады Сæрдар Хъуылымбегты Доменти, Парламенты депутат Къозонты Алан, Ахуырады министрады минæвæрттæ, рауагъдонты ныййарджытæ. Фæстаг дзæнгæрæджы бæрæгбон уагъд æрцыд скъола-интернаты актон залы.

Мадзал амыдтой скъолайы æвзонг ахуыргæнджытæ Буковская Анжела æмæ Прокопенко Олеся, кæцытæ рауагъдонты фæхуыдтой сценæмæ. Уыдон сæ ахуыргæнджытæн дзырдтой арфæйы ныхæстæ æмдзæвгæты хуызы. Сценæйы экраныл æвдыст цыдысты, рауагъдонтæ 1-æм къласы цы нывтæ систой, уыдон æмæ уый фæстæ та — ныры нывтæ. Ацы ахуыры азы скъола-интернаты уыд 10 рауагъдоны — авд чызджы æмæ æртæ лæппуйы.

Рауагъдонтæн арфæйы ныхæстæ загъта Хицауады Сæрдар Хъуылымбегты Доменти: «Ацы бæрæгбон диссаджы бæрæгбон у. Сымахæй алчидæр бæллыд скъола тагъддæр фæуынмæ, фæлæ уый афтæ нæ нысан кæны æмæ ферох кæнат уæ ахуыргæнджыты. Абон куыд Уæрæсейы, афтæ Хуссар Ирыстоны рауагъдонтæн дæр айзæлдзæн фæстаг дзæнгæрæг. Арфæ уын кæнын Президент Тыбылты Леониды номæй дæр. Сымах равзарын хъæуы ахæм фæндаг, кæцы суыдзæн уæ фидæны рæсугъд хъысмæт. Фæнды мæ, цæмæй уæ алчи дæр йæ фидæн равзара æнæ рæдыдæй. Кæддæр мæнæн дæр ацы скъолайы айзæлыд фæстаг дзæнгæрæг æмæ абоны онг дæр мæ зæрдыл лæууы уыцы бон. Цард кæд тынг цымыдисон у, уæддæр  вазыгджын у. Уый домы бирæ тыхтæ, бирæ энерги хъуамæ бахардз кæнат уæ дарддæры царды. Макуы агурут æнцон цард. Уæ алы æнтысты тыххæй дæр хъуамæ архайат æппæт тыхтæй дæр. Сымах суыдзыстут стыр адæймæгтæ, фæлæ макуы ферох кæнут уе скъола, уæ Ирыстоны», — загъта Хъуылымбегты Доменти.

Сценæмæ схызтысты 1-æм къласы ахуырдзаутæ, уыдон арфæйы ныхæстæ загътой рауагъдонтæн æмдзæвгæты хуызы æмæ сын балæвар кодтой сувениртæ. Рауагъдонтæ дæр сын бакодтой зæрдылдарæн лæвæрттæ. Рауагъдонтæн ма раарфæ кодта сæ фыццаг хъомылгæнæг Джиголаты Заремæ. Бирæ хъарм ныхæстæ загъта уый йæ уарзон ахуырдзауты адресыл. Сценæмæ фæхуыдтой рауагъдонты хъомылгæнджытæ Тедеты Заринæ æмæ Гæбæраты Венерæйы. Уыдоны дæр сæ хъомылгæнинæгтæн бафæндыд фидæны царды æппæт хæрзиуджытæ. Тедеты Заринæ загъта, зæгъгæ, дæргъвæтин скъолайон азты махæн сымах систут хи хъæбулты хуызæн æмæ нæ сымахæн уæ фидæны царды бафæнддзæн æрмæстдæр æнтыстытæ æмæ хорздзинæдтæ. Уый фæстæ рауагъдонтæ сæ хъомылгæнæг Гæбæраты Венерæйы  схорзæхджын кодтой «Быхсындзинады тыххæй» номинацийæ, Тедеты Заринæйæн та — «Мады аудындзинады тыххæй» номинацийæ. Алыгъуызон номинацитæй ма схорзæхджын кодтой сæ иннæ ахуыргæнджыты дæр.

Уый фæстæ рауагъдонтæн раарфæ кодта Парламенты депутат Къозонты Алан: «Зынаргъ рауагъдонтæ, мæ зæрдæ уын зæгъы иууыл хуыздæр фæндиæгтæ. Уæ фидæны царды цахæм-фæнды фæндаг ма равзарат, уæддæр уыцы фæндагыл сæмбæлдзыстут зындзинæдтыл дæр, Хуыцау зæгъæд æмæ уыцы зындзинæдты сæрты æнцонтæй цы хизат алы хатт дæр».

Бæрæгбонон мадзалы рæстæджы ахуыргæнинæгтæ равдыстой музыкалон номыртæ. Традицимæ гæсгæ рауагъдонтæ дидинджытæ балæвар кодтой ахуыргæнджытæ æмæ ныййарджытæн. Ныййарджыты номæй раныхас кодтой Битеты Беллæ æмæ Козаты Анжелæ. Банысан кæнын ма хъæуы уый дæр, æмæ скъола-интернаты кæй ахуыр кæнынц бирæсывæллонджын бинонты сывæллæттæ æмæ мадæй кæнæ фыдæй сидзæртæ. Рауагъдонтæн ма арфæйы ныхæстæ загътой скъолайы директор Тедеты Роланд, ахуыры хайы сæргълæууæг Чертхъоты Иринæ,  ирон æвзаджы ахуыргæнæг Тедеты Соня, Ахуырады министрады минæвар Гаглойты Розæ æмæ æндæртæ. Скъола-интернаты организатор Харебаты Маринæ алыгъуызон хорзæхтæй схорзæхджын кодта рауагъдонты.

Уый фæстæ рауагъдонтæ эстафетæ радтой 10-æм къласы ахуыргæнинæгтæн сувенир-дæгъæлы хуызы. Мадзалы кæронбæттæны рауагъдонтæн айзæлыд фæстаг дзæнгæрæг. Банысан кæнын хъæуы уый дæр, æмæ бæрæгбонон мадзал кæй рауад тынг цымыдисон, бæрæгæй зынд, йæ организатортæ йыл тынг хорз кæй бакуыстой, уый.

Джиоты Екатеринæ

 

 

* * *

Скъолайы ахуыры азтæ зæрдæйæн æхцонхæссæг сты, кæддæриддæр нæ мысынады баззайынц, фæстаг дзæнгæрæг та иууыл æнæферохгæнинаг свæййы.

Фæстаг дзæнгæрæджы бон нæ горæты «Мæскуыйаг» микрорайоны 1-æм астæуккаг скъолайы ахуыргæнджытæ, ахуыргæнинæгтæ æмæ сæ ныййарджытæ 25 майы фæндараст кодтой æвзонг чызджыты æмæ лæппуты. Уыдон ацы аз уыдысты 21 рауагъдоны, кæцытæн се ‘ппæтæн дæр сæ цæсгæмттыл хъазыдис цины æмæ уыцы рæстæджы æрхæндæджы æнкъарæнтæ, чи та-иу сусæгæй йæ цæссыгтæ дæр асæрфта.

Цытджын мадзалмæ сæм фæуазæг сты нæ республикæйы Ахуырады æмæ зонады министр Гассситы Натали, РХИ-йы Парламенты Сæрдары хæдивæг Тедеты Руслан, РХИ-йы Юстицийы министры хæстæ æххæстгæнæг Бестауты Маринæ. Рауагъдонтæн ма арфæ кæнынмæ æрбацыдысты, сæйраджыдæр, сæ ныййарджытæ æмæ сæ хиуæттæ, афтæ ма скъолайы æппæт  ахуыргæнджытæ æмæ скъоладзаутæ.

Рæсугъдвæлыст залмæ рауагъдонтæ хæрзкондæй гæлæбутау пæрпæргæнгæ цыдысты æмæ уал зæрдылдарынæн истой сæ къамтæ. Зæлыдысты музыкæйы æхцон зæлтæ æмæ сын сæ бæрæгбонæн лæвæрдта хъæлдзæгдзинад. Мадзал арфæйы ныхæстæй байгом кодта ма-дзаламонæг, скъолайы ахуыргæнæг Хуыгаты Альбинæ.  Æрæмбырдуæвджыты размæ хуынд æрцыдысты рауагъдонтæ. Цытджын æгъдауæй фæстаг дзæнгæрæджы бон нысан кæныны мадзалмæ хаст æрцыдис нæ паддзахадон тырыса æмæ айзæлыдысты гимны зæлтæ.

Рауагъдонтæн хорз фæндиæгтимæ арфæ кæнынмæ рахызтис сæ къласгæс, ирон æвзаг æмæ литературæйы ахуыргæнæг Цхуырбаты Изæ: «Абон сымахæн у уæ фæстаг дзæнгæрæджы бон æмæ уын арфæ кæнын. Ацы скъола сымахæн уе ‘ппæтæн дæр уыдис, куыд уæ дыккаг хæдзар, афтæ. Уымæн æмæ ам æрвыстат бирæ рæстæг. Скъолайы сымах ахуыр кодтой, фыццаджыдæр, хорз адæймæгтæ рацæуыныл æмæ, кæй зæгъын æй хъæуы, фаг зонындзинæдтæ райсыныл. Мæн сымахæн кæддæриддæр фæндыдис хорздзинад, цæмæй алы хатт дæр истаиккат фæндзтæ æмæ скъолайы фæстæ уе ‘ппæт дæр бацæуат уæлдæр ахуыргæнæндæттæм. Æз фидарæй зонын уый, æмæ сымах скъолайы цы зонындзинæдтæ райстат, уыдонæй кæй пайда кæндзыстут уæ ахуыры  дарддæры фæндæгтыл», — банысан кодта  Цхуырбаты Изæ.

Уый фæстæ нæ буц рауагъдонтæн арфæ ракодта скъолайы директор Гобозты Русудан. «Фæстаг дзæнгæрæг канд скъолайæн хæрзбон зæгъын нæу, уый у хъомыл цардмæ æрсидт. Мах абон сымах, нæ зынаргъ рауагъдонтæ, фæндараст кæнæм уæ уарзон скъолайæ æмæ ут арфæйаг æмæ фæндараст. Сымахмæ æнхъæлмæ кæсынц, куыд Хуссар Ирыстоны паддзахадон университет æмæ æндæр ахуыргæнæндæттæ, афтæ Уæрæсейы Федерацийы горæтты уæлдæр ахуыргæнæндæттæ дæр. Мæ зæрдæ уын зæгъы стыр æнтыстытæ уæ фидæны ахуыры æмæ царды. Абон сымахæй бирæтæ тыхсынц, уымæн æмæ у скъолайы уæ фæстаг дзæнгæрæджы бон. Фæндараст кæнут уæ фидæны цардмæ. Мах сымах тыххæй æппæт дæр арæзтам, цæмæй уæ хорз адæймæгтæ рацæуа, цæмæй уат Ирыстонæн патриоттæ. Уе ‘хсæн ис уырыссæгтæ дæр æмæ уыдон дæр скъолайы фæстæ сæрбæрзондæй, афтæ цы зæгъой,  зæгъгæ, ахуыр кодтам æмæ стæм Хуссар Ирыстоны 1-æм астæуккаг скъолайы рауагъдонтæ. Зынаргъ рауагъдонтæ, алы хатт дæр  хъуыды кæнут царды хорз саразыныл, искæмæн баххуыс кæныныл æмæ царды раст фæндагыл лæууын иууыл сæйрагдæр кæй у, ууыл. Мæ фæдзæхст ма уын ноджыдæр у, цæмæй алы хатт дæр тырнат хорз ахуыр кæнынмæ æмæ суат нæ республикæйы сомбоны дæсны специалисттæ. Кæддæриддæр кад кæнут уæ ныййарджытæн æмæ уæ райгуырæн бæстæйæн», — банысан кодта скъолайы директор Гобозты Русудан æмæ йæ арфæйы ныхасы фæстæ рауагъдонты схорзæхджын кодта дипломтæ æмæ кады грамотæтæй.

Рауагъдонтæн хорз фæндиæгтимæ арфæ кæнынмæ рахызтысты фыццагкъласонтæ, бакастысты сын хъæлдзæг æмдзæвгæтæ æмæ уый фæстæ традицимæ гæсгæ рауагъдонтимæ кæрæдзийæн бакодтой зæрдылдарæн лæвæрттæ. Бæрæгбонон мадзалы рауагъдонтæ сæхæдæг дæр сæххæст кодтой цалдæр ирон кафты. Се ‘ппæт дæр акафыдысты «Симд».

Иуæндæс азы дæргъы æрыгон лæппутæ æмæ чызджытæн сæ зонындзинæдтæ чи нæ бавгъау кодта æмæ сæ ахуыры фæндагыл чи лæууын кодта, уыцы ахуыргæнджытæн ныййарджыты номæй бузныджы ныхæстæ загътой Гæбæраты Иринæ æмæ  Кива Юрий.

Рауагъдонтæн ма арфæйы ныхæстæ загътой, РХИ-йы Парламенты Сæрдары хæдивæг Тедеты Руслан, РХИ-йы Юстицийы министры хæстæ æххæстгæнæг Бестауты Маринæ æмæ æндæртæ.

Ацы рæсугъд, æвзонг фæсивæд сæхæдæг дæр иуæндæс азы дæргъы сын зонады æмæ царды сæ дарддæры фæндæгтæ чи амыдта, уыцы ахуыргæнджытæн дзырдтой бузныг æмæ ныфс бавæрдтой, се скъолайы æмæ Хуссар Ирыстоны кад дæр дæлæмæ кæй не ‘руадздзысты æмæ сценæмæ кафынмæ рахуыдтой сæ   ахуыргæнджыты.

Мадзалы кæрон рауагъдонтæн айзæлыд фæстаг дзæнгæрæг.

Фæндараст фæут, 2016 азы рауагъдонтæ, зæрдæрухс æмæ æнæниз ут кæддæриддæр!

Цхуырбаты Ларисæ

 

* * *

«Хæрзбон, скъола» загътой нæ горæты 6-æм иумæйагахуырадон скъолайы 64 рауагъдоны. Уыдон сæ ахуыргæнджытæ æмæ ныййарджытимæ иумæ бæрæгбонвæлыстæй æрæмбырд сты скъолайы кæрты. Абон уæлдай рæсугъд æмæ хъæлдзæгдæр уыдысты ацы скъолайы рауагъдонтæ.

Цытджын мадзалмæ æрбацыдысты æмæ рауагъдонтæн раарфæ кодтой Президенты Адми-нистрацийы къухдариуæггæнæджы хæдивæг Пухаты Къоста æмæ ацы скъолайы рауагъдон, Парламенты комитеты сæрдар Коцты Олеся.

6-æм скъолайы директор Людмила Александрова зæрдæбын арфæ ракодта рауагъдонтæн: «Нæ зынаргъ рауагъдонтæ! Ныр сымах абонæй фæстæмæ стут фидæны цардаразджытæ. Ацæудзыстут хицæн æмæ хицæн фæндæгтыл — чи уæ суыдзæн дохтыр, чи — махау ахуыргæнæг. Инженер, аразæг, хуыйæг æви политик — уæддæр уын мæ зæрдæ зæгъы, цæмæй уат æцæг адæймæгтæ. Макуы бацæут, ныфс уæ чи æвæры, уыдоны зæрдæхудты. Царды уæм зындзи-нæдтæ æнхъæлмæ кæсдзæнис, фæлæ-иу ссарут ахæм тыхтæ уæхимæ, цæмæй сыл уæлахиз кæнат. 6-æм скъолайæ бирæ хорз рауагъдонтæ рацыд. Уыдонæй бирæтæ систы Райгуырæн бæстæйы аккаг хъæбултæ. Сымах дæр уыдон бафæзмут, сæрыстыр уæ куыд уой канд уæ ныййарджытæ нæ, фæлæ мах дæр! Кæмфæнды ма уат, цыфæнды горæты ма цæрат, уæддæр уæ рох ма уæт уе скъола. Æрцæут æмæ-иу нæ бабæрæг кæнут, мах уæм æппынæдзух æнхъæлмæ кæсдзыстæм», — дзырдта скъолайы директор.

Мадзалы ма раныхас кодтой ацы азы рауагъдонтæ, иууыл фыццаг скъолайы дуарæй сæ къах куы æрбавæрдтой, уæд сыл ныййарæг мадау цы райдиан кълæсты ахуыргæнджытæ сæмбæл-дысты уыдон. Уыдон æрымысыдысты, ныры рауагъдонтæ, уæд куыд чысылтæ уыдысты, куыд арæзтой фыццаг къахдзæфтæ зонындзинæдты дунемæ æмæ ныр тагъд цардаразджытæ куыд суыдзысты.

Ныхасы рацыдысты рауагъдонты къласгæс-тæ. Уыдон дæр дзырдтой, рауагъдонтæй алчи дæр йæхирдыгонау курдиатджын кæй у æмæ, æнæмæнг, фидæны сæ хъуыддаджы хорз дæснытæ кæй суыдзысты. Рауагъдонтæ сæхæдæг дæр арфæтæ кодтой сæ ахуыргæнджытæн æмæ сын ныфсытæ æвæрдтой, куыд сын амыдтой, афтæ аккаг æмбæстæгтæй кæй басгуыхдзысты. 6-æм скъолайы рауагъдонтæн ма раарфæ кодтой ацы скъолайы фыццагкъласонтæ дæр. Уый фæстæ 11-æм къласы рауагъдонтæ, традицимæ гæсгæ ацыдысты Мыкалгабырмæ сæхи бафæдзæхсынмæ.

Рæстфæндаг ут! Ирыстоны дзуæрттæ уын се ‘ппæт дæр æххуысгæнæг уæт!

Уазæгты М.

Comments are closed, but trackbacks and pingbacks are open.