Хуссар Ирыстоны оперативон уавæрыл æруынаффæ кодтой Мидхъуыддæгты министрады æрвылкъуырион оперативон æмбырды.
Мидхъуыддæгты министрады пресс-службæ куыд хъусын кæны, уымæ гæсгæ министрады службæты æмæ дæлхæйтты хистæртæ æрбавдыстой сæ докладтæ республикæйы Президент Бибылты Анатолийы æмæ Мидхъуыддæгты министрады къухдариуæгады хæслæвæрдтæ æххæст кæныны фæдыл сæ бакæнгæ куысты тыххæй. Æмбырды рæстæджы ма йæ хайадисджытæ æруынаффæ кодтой ивгъуыд къуырийы ведомствойы архайды фæстиуджытыл.
Республикæйы оперативон уавæры тыххæй докладтæм байхъусгæйæ, Мидхъуыддæгты министр Наниты Игорь банысан кодта фыццаградон хæстæ фыдракæнддзинады ныхмæ тохы æмæ æхсæнадон фæтк сифтонг кæныны фæдыл.
«Æнæмæнгхъæуæг у куыст адарддæр кæнын уыцы хæслæвæрдтæ сæххæст кæныны фæдыл, кæцытæ сты паддзахады сæргълæууæг æмæ Мидхъуыддæгты министрады къухдариуæгады контролы бын. Фыццаджыдæр, уыдон сты, наркотикты æнæзакъонон æрзылды ныхмæ тох фæтыхджындæр кæнын, раздæр саразгæ фыдракæндтæ раргом кæныны, экономикон фыдракæндты ных-мæ тох, æмбæстæгты улæфæн бынæтты æхсæнадон фæтк æмæ фæндаджы змæлды æдасдзинад сифтонг кæныны фарстытæ», – загъта министр.
Уый ма банысан кодта, зæгъгæ, æнæмæнгъхъæуæг у, раздæр тæрхон кæуыл æрцыд, уыцы адæймæгтыл контроль фæтыхджындæр кæнын æмæ сæ афоныл профилактикон хыгъды сæвæрын. Мидхъуыддæгты министр æвæрццаг аргъ скодта мидхъуыддæгты горæты æмæ районты управленитæн, хæдбардзинад банымайыны боны цытæн бæрæгбонон мадзæлттæ уадзыны рæстæджы æхсæнадон фæтк сифтонг кæныны тыххæй.
«Нымайын афтæ, уæ разы æрæвæргæ хæслæвæрдтæ æххæст æрцыдысты æмæ æмбæстæгты æдасдзинад ифтонг æрцыд», – банысан кодта ведомствойы сæргълæууæг.
Æмбырды рæстæджы Мидхъуыддæгты министр стыр хъусдард аздæхта ног ахуыры азы райдианы цытæн мадзæлттæ уадзыны рæстæджы æхсæнадон фæтк æмæ æдасдзинад сифтонг кæныны фарстытæм.
«Ног ахуыры азы размæ æнæмæнг-хъæуæг у скъолатæ æмæ сывæллæтты цæхæрадæттæ бабæрæг кæнын æдас-дзинады нысанæн», – бахæс кодта министр службæтæ æмæ дæлхæйтты хистæртæн.
Афтæ ма фæндаджы змæлд сифтонг кæныны æмæ сывæллæтты травматизмы профилактикæйы нысанæн æркастæуыд фæндæгтыл машинæты тагъд змæлд ма ‘руадзыны фарстытæм, кæцытæ сты ахуырадон уагдæттæм æввахс. Æмбырды рæстæджы министр уæлдай тынгдæр рахицæн кодта службæйон дисциплинæ халыны факттæ.
«Фæстаг рæстæджы сарæх сты мидхъуыддæгты органты кусджыты ‘рдыгæй автотранспорт расыгæй скъæрыны цаутæ. Æз бахæс кодтон Мидхъуыддæгты министрады хисæрмагонд æдасдзинады хайадæн рейдон мадзæлттæ ОМОН æмæ Паддзахадон автоинспекцийы кусджытимæ ауадзыны тыххæй, ахæм барадон фæтк халыны цаутæ сбæрæг кæныны æмæ дарддæр мидхъуыддæгты органты ахæм кусджыты кусыны фарстмæ æркæсыны тыххæй, кæцытæ гуымир æгъдауæй фехæлдтой службæйон дисциплинæ», – загъта министр.
Наниты Игорь бахæс кодта районты мидхъуыддæгты управлениты хистæртæн, цæмæй фæтыхджындæр кæной æдасдзинады мадзæлттæ динон бæ-рæгбонты размæ.
Æмбырды рæстæджы Наниты Игорь бузныджы ныхæстæ загъта Мидхъуыддæгты министрады Милицийы сæрмагонд нысаниуæджы къордæн, кæцытæ хайад райстой хæстон хæцæнгарзæй æхсыны фæдыл Уæрæсейы чемпионаты.
«ОМОН-ы цыппар кусæджы хайад райстой практикон æхстæй турниры æмæ бацахстой призон бынæттæ. Ахæм ерысты хайад исынæн ис стыр нысаниуæг иумиагæй паддзахады имиджæн», – кæронбæттæны банысан кодта Наниты Игорь.
Comments are closed, but trackbacks and pingbacks are open.