Хуссар Ирыстоны кæронмæ фæхæццæ кæны фæззыгæнд культурæты æфснайæн кампани. 25 июлы Хуссар Ирыстоны фермерон хæдзарадтæ æрæвнæлдтой тыллæг æфснайынмæ.

2017 азы Хуссар Ирыстоны байтыдæуыд 2477,5 гектары, уыдонæй 612 гектары уыдысты фæззыгæнд мæнæу, 1500 — уалдзыгæнд мæнæу, 1496 гектары — уал-дзыгæнд хъæбæрхор, 49 гектары — сысджы, 9 гектары — нартхор нæмыгæн, 7 гектары — хъæдур æмæ 64,5 — бирæазон кæрдæджытæ.

Зайæгойкуысты æмæ меха-низацийы управленийы хистæр Мулдарты Игоры ныхæстæм гæсгæ, ныртæккæ  Хуссар Ирыс-тоны куыстытæ  цæуынц планмæ гæсгæ æмæ реализацигонд æрцæудзысты æххæст  гуырахстæй.

«Тыллæг æфснайд ныртæккæ ис йæ тæмæны, тынг карзæй æнкъардæуы нæмыгонтææфснайæн техникæйы хъуагдзинад. Фæлæ зындзинæдтæм нæ кæсгæйæ, тыллæгæфснайд кæронмæ бахæццæ уыдзæн планмæ гæсгæ», — загъта Мулдарты Игорь.

Тыллæгæфснайæн кампанийы архайынц аст иуæджы нæмыгонтææфснайæн техникæ, уыдонæй Знауыры районы — цыппар комбайны, æртæ комбайны — Ленингоры районы æмæ иу та — Цхинвалы районы.

Знауыры æмæ Цхинвалы районты ма бафснаинагæй баззад 20 гектары бæрц.

Техникæ йæ потенциал раджы кæй бахардз кодта, уый фæстиуæгæн комбайнтæ тагъ фехæлынц æмæ уый дæр тынг æндавы тыллæгæфснайды æм-гъуыдыл. Фæлæ ГП «Ирагропромсервис»-ы инженертæ æмæ механизатортæ тырнынц техникæ оперативонæй сцалцæг кæныныл.

Развæлгъау информацимæ гæсгæ, тыллæгæрзадæй хуыздæр бæрæггæнæнтæ ис Ленингоры районæн, цыран тыллæг æфснайд æрцыд 1135 гектарыл. Знауыры районы байтыдты иумиаг фæзуат у 930 гектары.

Тыллæгæфснайды кампани фæуыдзæн къуырийы кæрон, уый фæстæ арæзт æрцæудзæн фæстиуджытæ.

Дунеон информацион агентад “Хуссар Ирыстон”

Comments are closed, but trackbacks and pingbacks are open.