Ацы азы августы райдианы Цхинвалы Дзулфыцæн комбинаты ног бæстыхайы райдайдзысты 72 сахатон бæстонгæнæн куыстытæ, персоналы ахуыркæнгæйæ. Уый тыххæй ИА «Рес»-æн фехъусын кодта Дзулфыцæн комбинаты директор Цхуырбаты Вадим. Йæ ныхæстæм гæсгæ, куыстуаты персонал куысты ногдзинæдтæ ахуыр кæндзæн ног бæстыхайы ног ифтонггæрзтыл.

«Бæстыхай арæзт цыд къаддæр кусæгдых æмæ къаддæр  энергийы хардзтæ бахынцгæйæ, уыимæ куысты нормæтæ бахъахъхъæнгæйæ, – банысан кодта директор. – Куыстытæ куы айтынг уой, уæд цыбыр рæстæгмæ куыстуат райдайдзæн кусын æххæст гуырахстæй».

Цхуырбаты Вадим фенын кодта дзулфыцæны ног ифтонггæрзты æмæ радзырдта йæ фадæтты тыххæй.

«Сæйраг цехы, фыццаг уæладзыджы, уагъд цæудзæн алыгъуызон дзултæ, фыццаджы фыццаг «Æхсырæй конд, Цхинвайлаг дзул». Дыккаг уæладзыгыл та  уыдзæн кондитерон цех тынг хорз куыстуатон фæзуæттæ æмæ ифтонггæрзтимæ», – банысан кодта               Цхуырбайы фырт.

Уый бамбарын кодта, зæгъгæ,  кусджытæ иууылдæр кусдзысты, куыстуаты кусджытæй сæрибар ничи æрцæудзæн.

«Ног бæстыхай куы скуса, уæд райдайдзысты зæронд бæстыхайы цалцæггæнæн куыстытæ. Цалцæггæнæн куыстыты фæстæ фæнд кæнæм уый дæр скусын кæнын æмæ уымæй рауæрæх кæндзыстæм куыстуат. Фидæны дзулфыцæн комбинаты ассортимент фæхъæздыгдæр уыдзæн æмæ кусæгон бынæттæ дæр фæфылдæр уыдзысты», – бынсан кодта директор.

Цхуырбаты Вадим сæрмагондæй банысан кодта, зæгъгæ, цехтæй сæ иуы æвæрд æрцыд пец, кæцы дунейы нымайынц иууыл хуыздæрыл. Ног цехы вентиляцийы системæ арæзт кæй æрцыд, уый фæстиуæгæн кусджытæн сæ куыст фæнцондæр уыдзæн.

Бæрæг куыд у, афтæмæй алыгъуызон дзулы продукцийæ дарддæр комбинат уадзы туаг æхсыры продукт – мацъони дæр.

Банысан кæнын хъæуы уый, æмæ уæрæсейаг компани ООО «СоюзСтройПроект» 2015 азы майы æрæвнæлдта Цхинвалы дзулфыцæн комбинаты ног бæстыхайы арæзтадмæ Республикæ Хуссар Ирыстоны социалон-эконо-микон рæзтæн ахъазгæнæг Инвестицион программæйы реализацийы фæл-гæтты.

Комбинаты зæронд бæстыхай арæзт æрцыд ивгъуыд æнусы æмбисы æмæ ныртæккæ ис  аварион уавæры. Гуырдзыстоны хæстон архайдтыты рæстæджы комкоммæ æхстытæ дæр бæстыхайæн ракодтой стыр зиан.

 

Comments are closed, but trackbacks and pingbacks are open.