17 июлы Хуссар Ирыстоны мобилон бастдзинады компани «МегаФон  Южная Осетия»-йы къухдариуæгад фыццаг хатт пресс-тур сарæзтой журналисттæн, 2016-2017 азтымобилон бастдзинады хызæджы куыст фæхуыздæр кæныны сæйраг этап кæй фæцис, уый сæраппонд, афтæ ма «МегаФон  Южная Осетия»-йы техникон директор Федор Горгоцкий куыд загъта, афтæмæй Хуссар Ирыстонмæ компанийы æрцыдыл 13 азы сæххæсты цытæн. Дзыллон информацийы фæрæзтæ, компанийы къухдариуæгад æмæ бастдзинады комитеты минæвæрттæ бынæтты бабæрæг кодтой цыппар бындурон базæйон станцты Цхинвалы æмæ Хуссар Ирыстоны районты.

Пресс-туры минæвæрттæ фыццаг бабæрæг кодтой микрорайон «Шанхай»- ы базæйон станцы, уый фæстæ та -Гъуырымбелайы, Малдайы æмæ Знауыры поселочы базæйон станцты. Алы базæйон станцы цур дæр уагъд цыдысты 3G æмæ 4G хызæджы мобилон интернеты тагъддзинады фæдыл тесттæ æмæ бæрæг цыд хъæлæсон бастдзинады гъæд.

Ӕдæппæт сарæзтой авд сбарсты æмæ «Остелеком»-ы минæвæрттæ куыд загътой, афтæмæй, сбарстыты фæстиуджытæ дзурæг сты,интернеты тагъддзинад оптималон кæй у, ууыл.

«Остелеком»-ы техникон директор Федор Горгоцкий радзырдта Хуссар Ирыстоны Мегафоны фæзынды тыххæй.

«Компани «Остелеком»йæ фыццаг базæйон станц Хуссар Ирыстоны территорийыл скусын кодта 13 азы размæ. Уал азы дæргъы станцты нымæц схызт 130 онг. «Мегафон — Хуссар Ирыстон» нымад цæуы хæххон операторыл, хæхтыл та бастдзинад аразын у зын æмæ вазыгджын. Оптимизацийы дыккаг этапы скусдзысты 3G стандарты дыууæ станцы Хуыцъейы хъæуы æмæ горæт Къуайсайы», — загъта Федор Горгоцкий.

Уый ма радзырдта республикæйы хызæджы ранæуæгы сæйраг этапты тыххæй, афта ма бастдзинад æмæ интернеты гъæдыл модификаци куыд бандæвта, уый тыххæй.

Йæ ныхæстæм гæсгæ, бирæтæ банкъардтой интернеты гъæд кæй фæхуыздæр, фæлæ нырма республикæйы ис ахæм районтæ, цыран интернеты гъæд æмбæлон æмвæзадыл нæу. Перспективæйы фæнд цæуы Цхинвалы алы микрорайоны дæр базæйон станцтæ саразын, уымæн æмæ интернеты лæггæдты домынад фылдæрæй фылдæр кæны.

«Цæмæй Цхинвалы дæр æмæ республикæйы районты дæр гъæдджындæр бастдзинад уа, уый тыххæй мах уынæм æртæ здæхты. Фыццаг у горæты микрорайонты бастдзинады хызæг фæхуыздæр кæнын, уымæн æмæ уым проблемæтæ ис интернетимæ, уыцы микрорайонтæм хауынц Цæрæн массив, БАМ æмæ Мæскуыйаг микрорайон. Уыцы микрорайонты фæнд кæнæм базæйон станцты ног объекттæ саразын. Уыцы объекттæ куы сырæзой, уæд фæхуыздæр уыдзæн интернеты гъæд. Иуæй-иу цæрæн пунктты дæр арæзт æрцæудзысты ног базæйон станцтæ. Уый зæгъæн нæй, æмæ республикæйы интернет бынтон лæмæгъ у, фæлæ 4G нырма нæу æмбæлон æмвæзадыл. Ныртæккæ 4G йы бæрæггæнæнтæ сты 70 мегабайт секундмæ. Уый тынг хорз бæрæггæнæн у, гæнæн ис, Европæйы бæрæггæнæнтимæ йæ абарæм, фæлæ районты интернет лæмæгъ кæй у, уый тыххæй абоненттæн сæ фылдæр пайда кæнынц 3G-йæ, афтæмæй ууыл стырдæр уæз цæуы», — банысан кодта Горгоцкий.

Уый куыд загъта, афтæмæй ныртæккæ куыст цæуы 4G дих кæныны проблемæ аскъуыддзаг кæныныл.

«Раздæр интернетимæ цы проблемæтæ уыд, уыдон нал сты, раст у, нырма ис проблемон районтæ, фæлæ сæ скъуыддзаг кæнæм. Уæлдæр æй куыд банысан кодтон, афтæмæй Мегафон хæххон операторыл нымад кæй у, уый дæр бахынцын хъæуы», — загъта Горгоцкий.

Мобилон бастдзинад æмæ интернеты ногдзинæдты тыххæй лæмбынæгдæр радзырдта РХИ-йы Бастдзинад æмæ дзыллон коммуникациты комитеты сæргълæууæджы хæдивæг Къæбысты Георги, кæцы Хуссар Ирыстоны телекоммуникацион структурæйы куысты хайад иста йæ райдианы фыццаг бонæй фæстæмæ æмæ йæм бахаста стыр хайбавæрд.

«Ӕз сæрыстыр дæн, кæй дæн республикæйы телекоммуникацион структурæйы райрæзты хайадисæг йæ сырæзтæй фæстæмæ. 13 азы мидæг компани «Мегафон — Хуссар Ирыстон» у мобилон бастдзинады фыццаг æмæ иунæг оператор. Фыццаг уæвын æрмæст стыр кад нæу, фæлæ ма у егъау бæрндзинад дæр. Уавæрæй спайда кæнгæйæ мæ бузныг зæгъын фæнды МегаФонæн, модернизацийы тыххæй се стыр нысаниуæгджын хъуыддаджы тыххæй, кæцыйыл уыдон фæфыдæбон кодтой цыппар мæйы дæргъы. Уый у республикæйы бастдзинады базæйон станцты се’ппæты дæр зæронд ифтонг-гæрзты ногтæй раивын. Фæндвидарæй зæгъæн ис, уыцы хъуыддагмæ кæй æнхъæлмæ каст алчи дæр, уымæн æмæ бастдзинады хызæгы модернизацийы фæстиуæгæн абоненттæ райсдзысты бастдзинады гъæдджындæр лæггæдтæ. Мобилон бастдзинады инфраструктурæ райрæзын æмæ фæхуыздæр кæнынæй Компани йæ хайбавæрд хæссы республикæйы рæзтмæ дæр, уымæн æмæ уый у телекоммуникациты ахæм сферæ, кæцыйæн, Республикæ Хуссар Ирыстоны хæдбардзинад банымайыны фæстæ ис сæрмагонд нысаниуæг», — загъта Къæбысты Георги.

Уый ма банысан кодта, зæгъгæ, 2010 азæй фæстæмæ МегаФон республикæйы бюджетмæ бахаста фондз милуан сомы æмæ кæддæриддæр тырныдта йæ лæггæдты гъæд фæхуыздæр кæнынмæ.

«2013 азы райдиан скуыста 4G интернет. Йæ райдианæй фæстæмæ 4G-йæн цы тагъдады фадæттæ хъуамæ уа, уыдон æххæст хъомысæй нæ куыстой, фæлæ компани æппæт дæр арæзта, цæмæй интернеты куыст фæхуыздæр уыдаид, уый тыххæй. Ручъы тъунелы цæгат порталы онг арæзт æрцыд автоволоконон хахх, фæлæ финансон фæрæзтæ кæй нæ уыд, уый тыххæй автоволоконон хахх дарддæр нал аивæзтæуыд. Уый фæстиуæгæн Хуссар Ирыстоны интернеты лæггæдты аргъ нырма у бæрзонд. Ныфс мæ ис, искуы уæддæр Инвестпрограммæмæ хаст æрцæудзысты Цæгат Ирыстоны онг автоволоконон хахх саразыны хæрдзтæ, ныфс мæ ис, æмæ уый фæстæ интернеты аргъ уыдзæн Цæгат Кавказы республикæты æргъты бæрц», — загъта уый.

Телефоны трафик тагъд кæй фæуы, уый тыххæй Республикæйы цæрджыты æдзухон хъасты фæстиуæгæн компанийы минæвæрттæ афтæ бамбарын кодтой, зæгъгæ, абоненттæ лæмбынæгдæр хъуамæ базоной бастдзинады лæггæдты, афтæ ма телефонмæ хъуамæ бахæссой бæрæг программæ, кæцы-иу ахицæн кæндзæн рекламæтæ æмæ æндæр æнæхъуа-джы лæггæдтæ, цæмæй уыцы лæггæдтыл трафик æнæхъуаджы ма хардз кæна.

«Остелеком»-ы минæвæрттæ ма бафиппайдтой, зæгъгæ, абонентæй алчи нæ зоны гаджетты фæстæ æмбæхст цы ис, уыдон.  Уыдон бамбарын кодтой, ома, æдзух интернеты искæцы фарсмæ куы кæсай кæнæ интернет гомæй куы баззайы, уæд уый фæстиуæгæн дæр æнæхъуаджы хардз кæны трафик. Уыдон ныфс бавæрдтой, зæгъгæ, цадæггай бастдзинады æппæт лæггæдты аргъ дæр æрныллæг уыдзæн, фæлæ уыцы фарст нырма ахуыр кæнынц, уымæн æмæ йæ не скъуыддзаг кæны æрмæст компани «МегаФон — Хуссар Ирыстон».

Осиаты И.

Comments are closed, but trackbacks and pingbacks are open.