ФЕМБÆЛД –ÆМГУЫСТАДЫ РАЗМÆЦЫДЫ ХÆРЗИУÆГÆН

Президент Бибылты Анатоли фембæлд Уæрæсейы Федерацийы  Æдасдзинады Советы нымæрдары хæдивæг Рашид Нургалиевимæ, кæцы Хуссар Ирыстонмæ æрцыд кусæгон балцы.

Президент «æгас цу» загъта уазæгæн æмæ банысан кодта, зæгъгæ, Рашид Нургалиев Хус-сар Ирыстонæн бирæ сарæзта æмæ уый та республикæйы æппæт адæммæ æвзæрын кæны бузныджы æнкъарæнтæ.

«Ды цы проекттæм дардтай дæ хъус, уыдонæн уыд стыр æнтыст. Уый тыххæй дæ мах стыр бузныг стæм. Дæ абоны æрцыд дæр баст у дыууæфарсон ахастыты рæзтимæ, фыццаг рады дыууæ паддзахады мидхъуыддæгты ми-нистрадты хаххы фæдыл, дарддæры плантæ аразыны, резервон электроадæттæн хахх рауадзыны фæдыл, кæцытæ Хуссар Ирыстонæн сты стратегион æгъдауæй ахсджиаг», – фехъусын кодта Президент.

Бибылты Анатоли банысан кодта, зæгъгæ, абоны бон проблемæтæ цъус не сты, фæлæ республикæйы къухдариуæгад уæрæсейаг фарсы хъæппæрисæй æппæт дæр аразы, цæмæй комфортон уавæртæ арæзт æрцæуа Хуссар Ирыстоны территорийыл цæрынæн.

«Ам ма банысан кæнын хъæуы республикæйы æмбæстæгты куыстмыздтæ фæфылдæр кæныны тыххæй уынаффæ, кæцы райст æрцыд Уæрæсейы Федерацийы Президент Владимир Путинимæ фембæлды рæстæджы. Æппæт уыдæттæй мах тынг райгонд стæм, уымæн æмæ уыдон ахъаз сты æнæхъæнæй дæр республикæйы нормалон уавæрæн», – банысан кодта уый.

Уыимæ ма Президент бахахх кодта, зæгъгæ,  нырма скъуыддзаг нæу «пагонджын адæй-мæгты» куыстмызд фæфылдæр кæныны фарст.

«Ацы категоримæ хауынц, Паддзахадон æдасдзинады комитеты, Таможнæйон служ-бæйы, Уæлвæткон уавæрты министрады, прокуратурæйы æмæ къорд æндæр структурæты чи кусы, уыцы æмбæстæгтæ, кæцыты куыстмызд нæ хæццæ кæны Цæгат Кавказы Федералон зылды куыстмыздты æмвæзадмæ», – загъта Бибылты Анатоли æмæ бахатыд уазæгмæ, цæмæй уыцы фарст райса йæ хъусдардмæ.

Фембæлды рæстæджы Президент банысан кодта æртæ азы дæргъы Инвестицион прог-раммæйы реализацийы æнтыстджын цыд.

«Хуссар Ирыстоны къухдариуæгад цы къахдзæфтæ аразы, кæцыты фарс хæцы Уæрæсейы Федерацийы  дæр, уыдон здæхт сты республикæйы рæзтмæ, цæрджыты цард комфортондæр саразынмæ. Сæйраг хъусдард здæхт у социалон-экономикон фадыгмæ», – загъта Президент.

Бибылты Анатоли ма хъусдард аздæхта, коронавирусы пандемийы алыварс цы уавæр ис, уымæ дæр. Президент банысан кодта, зæгъгæ, уый бирæ проблемæтæ æвзæрын кæны æмæ бирæ адæймæгты цард ахаста.

«Нырма знон мах йæ фæстаг фæндагыл афæндараст кодтам зынгæ политикон архайæг Цоциты Барис Елиозы фырты, кæцы низæн нæ бафæрæзта. Коронавирус у ахæм сидт, кæцыйы ныхмæ хъуамæ бафæразæм», – банысан кодта уый. Уыимæ иумæ уый бахахх кодта, зæгъгæ, ныртæккæ республикæйы алы æмбæстагæн дæр фадат  ис вакцинæ сараза уæрæсейæг «Спутник V»-йæ.

Йæ рады Рашид Нургалиев фехъусын кодта, зæгъгæ, балцы рæстæджы бирæ бакусын хъæуы.

«Абон Хуссар Ирыстон æмæ Уæрæсейы Федерацийы ‘хсæн къухтæ æрфыстæуыдзæн Сразыдзинадыл, кæцы фæахъаз уыдзæн информаци кæрæдзийæн дæттынæн, фыдракæндтæ аиуварс кæнынæн. Уый тынг ахсджиаг у», – фехъусын кодта Уæрæсейы Федерацийы Æдасдзинады Советы нымæрдары хæдивæг.

Дыккаг фарст та, кæцыйыл уынаффæ цæудзæн Рашид Нургалиевы балцы рæстæджы, у Информацион-координацион центры фæлгæтты экспертизæты фарст.

«Информацион-координацион центры куысты фæлгæтты арæзт цæуы  уæлæмхас бокс автотранспортон экспертизæйы тыххæй. Уый фæстæ Информацион-координацион центры иууылдæр уыдзæн цæттæ», – фехъусын кодта уый.

Рашид Нургалиев ма банысан кодта квалификациджын кадрты равзарыны ахсджиагдзинад.

Æдасдзинады Советы нымæрдары хæдивæг хъусдард аздæхта серьезон проблемæмæ, кæцы баст у коронавирусы инфекци парахат кæнынимæ.

«Абоны бон Уæрæсейы Федерацийы æххæст хъомысæй цæуы каронавирусы инфекцийы ныхмæ вакцинаци коллективон иммунизацийы тыххæй. Хъыгагæн, объективонæй банысан кæнын хъæуы, бирæ уды зиæнттæ кæй æрцыд, уый. Мах, нæ делегацийы уæнгтæ, иууылдæр мæсæллæй зæгъæм Цоциты Барисы амæлæты тыххæй. Уый уыд ахæм адæймаг, кæцы вазыгджын рæстæджыты ныхас кодта тынг профессионалонæй, æмæ, Хуссар Ирыстоны интерестæ хъахъхъæнгæйæ, уыд тынг компетентон», – йæ ныхасмæ бафтыдта уый.

Дарддæр дыууæ фарсы уынаффæ кодтой  дарддæры хæслæвæрдтыл æмæ сæ аскъуыддзаг кæныны фæндæгтыл, уыцы нымæцы энергетикон æдасдзинады фæдыл дæр.

Фембæлды кæрон Бибылты Анатоли æмæ Рашид Нургалиев хайад райстой Республикæ Цæгат Ирыстон-Аланийы фæдыл Мидхъуыддæгты æмæ Республикæ Хуссар Ирыстоны Мидхъуыддæгты министрады ‘хсæн Дыууæфарсон  Уынаффæйыл къухтæ æрфыссыны церемонийы.

Хуссар Ирыстоны æрдыгæй йæ къух æрфыста мидхъуыддæгты министры хæстæ рæстæгмæ æххæстгæнæг Пухаты Мераб, Цæгат Ирыстоны æрдыгæй та – Республикæ Цæгат Ирыстон-Аланийы мидхъуыддæгты министр Михаил Скоков.

Уый размæ Рашид Нургалиев æмæ Бибылты Анатоли дидинджытæ сæвæрдтой Фыдыбæстæ хъахъхъæнджыты мемориалыл.