Ирон адæм тынг курдиатджын кæй сты, уый бæрæг у æрмæст уымæй дæр, æмæ чысылнымæц нацийы минæвæрттæ сæ алыгъуызон курдиатæй дунейæн сæхи кæй базонын кодтой, уыцы нымæцы — музыкалон къабазы дæр. Оперон зарæггæнджытæ Джиоты Вероникæ, Амага Готти, Пæрæстаты Сослан æмæ æндæрты сфæлдыстадимæ базонгæ сты дунейы алы бæстæты. Уыдон сæ диссаджы курдиатæй сном кодтой куыд сæхицæн, афтæ сæ радтæг Ирыстонæн дæр. Арæх æрцæуынц сæ уарзон Цхинвалмæ дæр.

Цхинвалмæ та радон хатт æрцыд скрипкæйæдзæгъдæг Тадтаты Григори дæр. Уый æрвылсæрд дæр æрцæуы йæ уарзон горæтмæ æмæ, гæнæн уæвгæйæ, æнæхъæн сæрд арвиты Цхинвалы. 18-æм июлы информацион агентад «Спутник Хуссар Ирыстоны» зынгæ ирон музыкант йæ пресс-конференцийы рæстæджы фембæлд хуссарирыстойнаг журналисттимæ. Курдиатджын музыкант журналисттæн радзырдта йæ дарддæры плæнтты æмæ концертты тыххæй. Уый у æппæтуæрæсейаг æмæ дунеон конкурсты лауреат. Григори нырма кæд хæрзæвзонг у, уæддæр ныридæгæн фæуд кæны Санкт-Петербурджы консерватори. Уымæн йæ къухты бафтыд квартет «Ciever» — фыццаг скрипкæ суæвын æмæ Мариинаг сценæйыл ралæууын, Европæйы консерваторитæй цалдæрмæ ахуырмæ бацæуын, æмæ уæддæр Мæскуыйы консерватори равзарын. Уый æрæджы æрыздæхт Америкæйы йæ гастролон турæй. «Америкæйы горæттæм музыкалон турмæ мах фæхуыдта Леопальда Ауэрайы ассоциацийы „Уырыссаг фестивалы“ центры сæрдар Алла Арановская. Мах концерттæ радтам Вашингтоны Капитолийы, Урс хæдзары, Калифорнийы университеты студенттæн, скъолаты. Æртæ къуырийы дæргъы нæ музыканттæ уыдысты 16 горæты æмæ сын бантыст 25 концерты радтын. Сæйраджыдæр, цагътам классикон музыкæ, афтæ ма кабардинаг композитор Мурат Кабардоковы уацмыстæ. Алы ран дæр ныл æмбæлдысты тынг хъарм зæрдæйæ. Сценмæкæсджытæ уыдысты, куыд уырыссаг, афтæ америкæйаг студенттæ дæр. Нæ концерттæй сæ иумæ æрбацыд не ’мфыдыбæстæйон, ирон, кæцы тынг рагæй цæры Америкæйы. Мах ныхас кодтам æрдæг сахаты бæрц нæ мадæлон ирон æвзагыл. Уый мæм æрбацыд концерты фæстæ æмæ нал æфсæст мадæлон æвзагыл ныхас кæнынæй», — ра-дзырдта курдиатджын музыкант.

Америкæйы ма æвзонг коллективы концерттæй сæ иумæ æрбацыдысты дунейæн зындгонд квартет «Эмерсон»-ы музыканттæ дæр. Уый у дунейы иууыл хуыздæр квартет, кæцыйæн уæлдай хицæн бынат ис банымад коллективты ’хсæн. Квартетыл цæуы 30 азы, у «Гремми»-йы 9 премийы хицау. «Махæн стыр æхсызгонæй нæ къухты бафтыд уыдонæн сæ репетицитæм бацæуын дæр. Квартет „Эмерсон“-ы музыканттæ фæндон бахастой, цæмæй фидæны радтæм иумиаг концерт, кæцы махæн уаид стыр кад», — банысан кодта Тадтаты Григори.

Не ‘мтуг ирон музыкантæн йæ диссаджы курдиатæй йæ ном зындгонд у цхинвайлаг публикæйæн. Йæ фыд у Цхинвалæй рацæугæ, йæ мад та у æрдæгуырыссаг, æрдæгпольшæйаг. Гриша йæ алы концерты размæ дæр сценæмæкæсджытæн йæхи базонгæ кæны куыд ирон адæймаг, афтæ. «Ныртæккæ у афтæ, æмæ концерты размæ музыкант базонгæ вæййы публикæимæ. Радзуры сын йæхи æмæ музыкалон программæйы тыххæй. Ахæм рæстæджы æз сценæмæкæсджытæн радзурын, ирон уидæгтæ мын кæй ис, уый тыххæй. Мæнæн уый тынг ахсджиаг у. Квартеты мæ коллегæтæ нымайынц афтæ, æмæ мæ музыкалон номырты кæй ис цырддзинад, агресси. Æвæццæгæн, уый у ирон энергетикæ», — дзуры музыкант.

8-æм августы фыдохы бонты æмæ 26-æм августы Республикæ Хуссар Ирыстоны хæдбардзинад банымайыны боны скрипач фæнд кæны концерттæ радтын йæ хо пианисткæ Аннæ æмæ Мариинаг театры артист Цыбырты Шотайы хайадистæй. «Абон не ’мфыдыбæстæйонтæ æнтыстджынæй ахуыр кæнынц Санкт-Петербурджы консерваторийы. Уыдон сты: Плиты Мурат, Тедеты Геогри, Албегаты Георги. Хорз уаид, уыдон дæр куы æрцæуиккой Цхинвалмæ, цæмæй махæн не ’ппæтæн дæр ацы ахс-джиаг бонты ралæу-уиккам иумæ хуссарирыстойнаг сценæмæкæсæджы раз. 8-æм августы, æвæц-цæгæн, сæххæст кæн-дзынæн Бах кæнæ Вивальдийы, ома, уæлдай серьезондæр уацмыстæ æмæ 26-æм августы та италиаг аритæй хъæлдзæгдæр чи сты, уыдоны», — загъта Тадтаты Григори.

Æвзонг музыкант ныридæгæн ралæууыд Уæрæсе, АИШ, Польшæ, Узбекистан æмæ æндæр бæстæты сценæтыл. Фидæны фæнд кæны уыцы бæстæты нымæц фæфылдæр кæнын. Григоримæ пресс-конференцийы рæстæджы журналисттæ фарстатæ лæвæрдтой, куыд йе сфæлдыстады алы æмæ алы аспекты фæдыл, афтæ ма æндæр фарстытæ дæр. Дзырдтой публикæйы уарзондзинады, публикæимæ иумиаг æвзаг ссарыны, солон карьерæйы æмæ бирæ æндæр фарстыты тыххæй. Тадтаты Григори стыр хъармзæрдæйæ дзырдта йæ ахуыргæнæг Александр Стангы тыххæй. Дзырдта ма италиаг музыкант Франческо Руджерийы тыххæй дæр.

Музыканты ныхæстæм гæсгæ фидæнмæ консерваторийы фæудмæ рауагъдон программæйы хуызы фæнд кæны ирон композиторты сфæлдыстад сахуыр кæныны æмæ национ аранжировкæйы уацмыстæ саразын. Йæ зæрдæмæ тынг цæуынц композитортæ Æлборты Феликс, Хаханты Дудар æмæ Плиты Жаннæйы уацмыстæ æмæ куыд баныфс æвæрдта, афтæмæй сæ сахуыр кæндзæн.

Пресс-конференцийы кæрон Тадтаты Гриша ацагъта италиаг виртуоз Франческо Руджерийы диссаджы инструментыл, кæцыйыл цæуы 400 азы.

Чертхъоты Жаннæ

Comments are closed, but trackbacks and pingbacks are open.