Фембæлд агрохолдинг «Евродон»-ы хицауимæ

РХИ-йы Президент Тыбылты Леонид йæхимæ райста аргосæудæджерадон холдинг «Евродон»-ы генералон директор Уанеты Вадимы. Паддзахады сæргълæууæгæн амалиуæггæнæг фехъусын кодта Хуссар Ирыстоны дзидзакуыстгæнæн заводы арæзтад куыд цæуы, уый тыххæй.

Уанеты Вадимæн бæрæгбонты тыххæй раарфæ кæнгæйæ, Президент банысан кодта, зæгъгæ, «уый у, Хуссар Ирыстоны хæрзвадат инвестицион климат аразынæн чи ахъаз кæны, уыдонæй сæ иу, кæцы æнæдызæрдыгæй, æндавы республикæйы цæрджыты царды æмвæзадыл».

Тыбылты Леонид бацымыдис кодта объект эксплуатацимæ лæвæрд кæд æрцæудзæн, уымæ. «Арæзтадон куыстытæ æххæст цæуынц графикмæ гæсгæ. Хъуыды кæнын афтæ, æмæ марты завод кусын кæй райдайдзæн», – загъта Уанеты Вадим.

Уый ма банысан кодта, зæгъгæ, заводы цы специалисттæ кусдзысты, уыдон сæрмагонд ахуыр рацыдысты Уæрæсейы Федерацийы æмæ загъта, зæгъгæ, дзидзкуыстгæнæн завод бынæттон цæрджытæй куыстæй сифтонг кæндзæн 40 адæймаджы бæрцы, сæ куыстмызд уыдзæн уæрæсейаг куыстмызды æмвæзадыл, æмæ Хуссар Ирыстоны уагъд продукци та æххæстæй цæттæ цæудзæн бынæттон хомысæй.

«Махæн нæ бон суыдзæн нæ рауадзгæ продукцийæ æрмæст нæ республикæйы сифтонг кæнын нæ, фæлæ ма ласт цæудзæн Уæрæсемæ дæр», – загъта амалиуæггæнæг.

Фембæлды кæрон Президент агрохолдингы сæргълæууæджы схорзæхджын кодта Хæлардзинады орденæй æмæ «Республикæ Хуссар Ирыстоныл 25 азы сæххæсты цытæн» майданæй æмæ йын загъта дарддæры æнтыстыты фæндиæгтæ.

Уый фæстæ Тыбылты Леонид æмæ Уанеты Вадим бабæрæг кодтой арæзтцæуæг заводы, цыран амалиуæггæнæг бынаты фенын кодта æмæ паддзахады сæргълæууæгæн уæлдай лæмбынæгдæрæй радзырдта, ныртæккæ объекты цы куыстытæ æххæст цæуынц, уыдоны тыххæй. Уанеты Вадимы ныхæстæм гæсгæ, ныртæккæ объекты кусынц 40 адæймаджы, бæстыхайы æххæст цæуынц мидæггагон куыстытæ. «2-3 къуырийы фæстæ æрбаласдзыстæм ифтонггæрзтæ. Заводы ма фæнд кæнæм магазин бакæнын дæр, цыран уæй цæудзæн дзидзайы ног продукци. Куыстуатæн йæ бон уыдзæн боны мидæг дыууæ тоннæйы онг продукци уадзын. Проекты аргъ у 156 милуан сомы. Цы кредитон фæрæзтæ райстам, уыдоны хъуамæ раздахæм аст азмæ, науæд ист æрцæудзысты нæ компанийæ», – загъта уый. Уанеты Вадим ма банысан кодта, зæгъгæ, республикæйы къухдариуæгад æххæст гуырахстæй æххæст кæны объектмæ коммуникацитæ бауадзыны хæстæ.

Президентæн ныхас кодта аразджытимæ аныхас кæнын æмæ сын федта сæ куысты фæстиуджытæ. Тыбылты Леонид банысан кодта, зæгъгæ, заводы куыст ахъаз кæндзæн республикæйы фосдарды хæдзарады рæзтæн. «Адæм куы феной завод кусын райдыдта, уæд сæ бон суыдзæн сæ фос уыдонæн уæй кæнын æмæ бынаты æхцайы фæрæзтæ исын. Æнæдызæрдыгæй, уый у стимул фосдарды хæдзарады архайынæн», – загъта Президент.

РХИ-йы Президенты официалон сайт