Президент Тыбылты Леонид йæхимæ райста Боливариаг Республикæ Венесуэллæ æмæ Республикæ Никарагуайы Республикæ Хуссар Ирыстоны Уæлвæткон æмæ Æххæстбар-джын минæвар Козаты Наримимæ. Фембæлды ма хайад райста Республикæ Хуссар Ирыстоны Фæсарæйнаг хъуыддæгты министр Джиоты Мурат.

«Цытджын Нарим Захары фырт, махмæ цы зонæнтæ ис, уымæ гæсгæ æз æмæ Фæсарæйнаг хъуыддæгты министр Джиоты Мураты хæслæвæрд æххæстгонд æрцыд. Ды радтай æууæнчы грамотæ Венесуэллæйы Президент Николас Мадуройæн. Уый ууыл дзурæг у, æмæ мах фæдфæдылонæй цæуæм Республикæ Хуссар Ирыстон æмæ Боливариаг Республикæ Венесуэллæйы ‘хсæн бадзырдтæ æххæст кæныны фæндагыл», — загъта Президент.

Бæстæйы сæргълæууæг банысан кодта, зæгъгæ Хуссар Ирыстоны дипломатон кусжыты раз æвæрд ис бæрнджын хæс, æмæ бузныг загъта Козаты Наримæн æхсæнпаддзахадон бадзырдтæ æххæст кæныны ‘рдæм ахсджиаг къадзæф кæй сарæзта, уый тыххæй. Уый загъта бузныджы ныхæстæ Боливариаг Республикæ Венесуэллæйы разамынад æмæ адæмы номыл Республикæ Хуссар Ирыстоны паддзахадон хæдбардзинад банымайыны тыххæй, æмæ банысан кодта, зæгъгæ, дыууæ бæстæйы æхсæн цы æмахастытæ сæвзæрд, уыдонæн хъуамæ дарддæр дæр уа хорз размæцыд.

«Абон мах фæндвидар стæм, цæмæй нæ бæстæты æхсæн бадзырдтæ дзаг кæнæм ног мидисæй. Нарим Захары фырт, дæ разы лæууы ахсджиаг хæс. Фидарæй мæ уырны, дæ дипломатон фæлтæрддзинад æмæ ахуырдзинад ахъаз кæй уыдзысты нæ бæстæты адæмты хæрзиуæгæн», — загъта Тыбылты Леонид.

Боливариаг Республикæ Венесуэллæ æмæ Республикæ Никарагуайы Республикæ Хуссар Ирыстоны Уæлвæткон æмæ Æххæстбарджын минæвар Козаты Нарим йæхи ‘рдыгæй фехъусын кодта Президентæн Венесуэллæмæ йæ къуырион балцы фæстиуджыты тыххæй.

«10-æм августы æз радтон æууæнчы грамотæты халдихтæ Венесуэллæйы Фæсарæйнаг хъуыдтæгты министр Делси Родригесæн, æмæ уый фæстæ мах ацыдыстæм Мирафлоресы галуанмæ. Уыцы ран æз, номхыгъдмæ гæсгæ æртыккаг рады, грамотæтæ радтон Республикæ Венесуэллæйы Президент Николас Мадуройæн. Йæ бæрзонддзинад Республикæ Хуссар Ирыстоны Президент Тыбылты Леониды номæй æз уымæн бузныджы æмæ стыр цыты ныхæстæ загътон нæ бæстæйы хæдбардзинад банымайыны тыххæй. Æууæнчы грамотæтæ раттыны фæстæ Николас Мадуро хъæрмудæй аныхас кодта мах,  10 паддзахады минæваримæ. Фембæлд уыди тынг зæрдылдаринаг æмæ фæстиуæгджын», — фехъусын кодта уый.

Козаты Нарим ма радзырдта, йæ балцы рæстæджы уый кæй федта Уго Чавесы мавзолей Каракасы.

РХИ-йы Президент æмæ

Хицауады пресс-службæ

Comments are closed, but trackbacks and pingbacks are open.