Республикæ Хуссар Ирыстоны Президент Бибылты Анатоли фембæлд Республикæ Сальвадоры Президент Сальвадор Санчес Серенимæ.

Фембæлд уагъд æрцыд Боливариаг Республикæ Венесуэлæмæ Бибылты Анатолийы балцы  фæлгæтты.

Бибылты Анатоли, Сальвадор Санчесæн раарфæ кæнгæйæ, банысан кодта, зæгъгæ  йын æхсызгон у йемæ базонгæ уæвын, кæцы уагъд æрцыд Венесуэлæйы сæрибаруарзаг зæххыл.

«Мах кæрæдзийыл  бирæ цыдæртæ бæтты, уыцы нымæцы, куыд Хуссар Ирыстоны, афтæ Сальвадоры тох сæрибардзинад æмæ хæдбардзинады сæраппонд. Уыцы тохы Сальвадоры адæм, кæй зæгъын æй хъæуы, стыр кад скодтой сæхицæн. Ныфс мæ ис, нæ зонгæдзинад хæлардзинадмæ кæй ахиздзæн, æмæ æрмæст не ‘хсæн нæ, куыд Президенттæ, фæлæ Сальвадор æмæ Хуссар Ирыстоны адæмты ‘хсæн дæр».

Сальвадор Санчес Серен йæхи рады  банысан кодта, Сальвадоры Республикæ кæй рæзын кæны хæларадон адæмимæ ахастытæ æмæ ахæм политикæ уадзы дунейы æппæт бæстæтимæ дæр.

«Нæ политикæ гом у дунейы æппæт бæстæтæн дæр. Мах афтæ нымайæм æмæ адæймагады рæзт уыдзæн æрмæстдæр хæлардзинады бындурыл. Демæ ахæм фембæлд уагъд æрцыд фыццаг хатт æмæ нын тынг ахсджиаг у. Ныфс нæ ис, нæ ахастытæ дарддæр дæр кæй рæздзысты æмæ ссардзыстæм механизмтæ, цæмæй уыцы ахастытæ дарддæр дæр рæзой», – загъта Сальвадоры Президент.

Бибылты  Анатоли   банысан кодта, зæгъгæ, Хуссар Ирыстон æппæт партнертæн дæр у æнувыд хæлар. Уый цæвиттонæн æрхаста Ирыстоны æмæ Уæрæсейы бирææнусон хæлардзинад, кæцы райдыдта 1774 азы. Президент ма радзырдта уыцы бæстæты тыххæй, кæцытимæ Хуссар Ирыстон йæ ног историйы сфидар кодта æхсæнпаддзахадон ахастытæ.

Comments are closed, but trackbacks and pingbacks are open.