7-æм ноябры Республикæ Хуссар Ирыстон-Паддзахад Алинийы нысан кодтой Таможнæйы службæйы кусæджы бон. Ныр уыдон сæ профессионалон бæрæгбон нысан кæнынц 25-æм хатт.

Таможнæйон комитеты куыстæн стыр нысаниуæг ис паддзахад æмæ адæмы националон интерестæ æмæ экономикон æдасдзинад сифтонг кæныны хъуыддаджы. Уый арæзт æрцыд 1992 азы уæды Уæлдæр Советы сæрдар Цыбырты Людвигы барамындмæ гæсгæ. Уæдæй нырмæ ацы паддзахадон орган æмгуыст кæны Уæрæсейы Таможнæйон службæимæ.

Нырыккон царды уавæрты таможнæйы кусджытæй домдæуы стыр бæрндзинад, æвæллайгæ архайд, удуæлдайдзинад æмæ профессионализм. Абон таможнæйы цы 84 кусæджы кусы, уыдон архайынц Паддзахадон казнæ æххæст кæныныл æмæ уымæй сæ хайбавæрд хæссынц  республикæйы  дарддæры рæзты хъуыддагмæ.

Сæ профессионалон бæрæгбоны фæлгæтты бæстæйы сæргълæууæг цытджын æгъдауæй йæхимæ райста таможнæйы кусджыты.

«Зæгъын уын арфæйы ныхæстæ уæ бæрæгбоны сæраппонд. Уе ‘вæллайгæ фæллойы тыххæй уын бæрæгбонон арфæ кæнын. Зæгъын уын æнæниздзинады, хæрзиуджыты фæндиæгтæ уæ вазыгджын æмæ бæрнæвæрæг куысты, нæ райгуырæн бæстæйы хæрзиуæгæн! Сымахæн бантыст уæ куысты ног æмвæзадмæ рахизын æмæ уый та æмткæй фæзынд нæ республикæйы экономикæйыл», — дзырдта Бибылты Анатоли.

Уый ма куыд дзырдта, афтæмæй фарон ацы æмгъуыды дæргъы Сæйраг таможнæйон управленийы комитет паддзахады бюджетмæ цы æхцайы фæрæзтæ бахаста, уыдон нымæц ацы аз у бæрæг фылдæр. Фиддонты фæфылдæрæн та,   ахъаз уыдысты æрбаласгæ уæзтæм хъусдарды гъæд кæй фæхуыздæр, уый. Акцизтæ дæр цы продукцийæн лæвæрд цæуы, уыдон дæр хорз æфтиæгтæ хæссынц бюджетмæ. «Ныр уый ахъаз уыдзæнис, ног азæй сывæл-лæттæн цы æххуысы фæрæзтæ фидæм, уыдон дыууæ хатт фæфылдæр кæнынæн», — загъта Президент.

Уый ма загъта, цæмæй РХИ-йы Сæйраг таможнæйон управлени æмгуыст кæна Уæрæсейы Федерацийы Сæйраг таможнæйон управлениимæ. Æрмæстдæр уыдон æххуысæй суыдзæнис нæ бон, вазыгджын хæстæ сæххæст кæнын, таможнæйы фадыджы профессионалон æмвæзадмæ рахизын.

Уый фæстæ Сæйраг таможнæйон комитеты кусджытæ  цалдæрæй  Президенты къухæй райстой майдантæ «За службу на страже мира РЮО» и «В ознаменование 25 летия РЮО», афтæ ма Кады грамотæтæ æмæ Бузныджы гæххæттытæ.

РХИ-йы Сæйраг таможнæйы управленийы сæргълæууæг Цхуырбаты Мурат цыбыртæй æрдзырдта афæдзы мидæг таможнæйон управлени цы куыстытæ бакодта, уый фæдыл «Бюджетмæ Фиддонтæ фæфылдæр кæныныл кусдзыстæм дарддæр дæр, æрбаласæггаг продукцимæ лæмбынæгдæр цæудзæнис хъусдард. Кæд таможнæйыл хæлцадон продукци ласыны фиддонтæ нæ фæфылдæр сты, уæддæр хорз æфтиæгтæ хæссынц”, — дзырдта Цхуырбаты Мурат.

Сæйраг таможнæйон управленийы сæргълæууæг ма куыд дзырдта, афтæмæй Гуырдзыстонимæ арæныл Ленингоры районы «Раз-дæхæн»-ы баконд æрцæудзæн таможнæйон пункт. «Куыд зонæм, афтæмæй уырдыгæй арæныл цы продукци ласт цыд Хуссар Ирыстонмæ, уыдонæн хъалон фыст нæ цыд. Пункт бакæныны хъуыддаг та фадат ратдзæнис, продукцийы гъæд æмæ гуырахстыл контроль кæнынæн. Уыцы арæ-ныл кæд цалдæр азы ласт цæуы продукци, уæддæр хъалон кæй нæ фыстой, уый тыххæй паддзахады бюджетмæ  фиддонтæ нæ цыд», — дзырдта Цхуырбаты Мурат.

Президент цымыдис кодта республикæйы Сæйраг таможнæ-йон управлени лимиттæм гæсгæ республикæйæн æдде чи ахуыр кодта, уыцы студентты фæрцы æвзонг специалисттæй ифтонг цæуы, æви нæ.

«Нырмæ таможнæйы хаххыл ахуыр цы студенттæ фесты æмæ Ирыстонмæ чи æрыздæхт, уыдон иууылдæр ифтог æрцыдысты, хицауады æххуысæй нын цы уæлæмхас штатон иуæгтæ хицæн æрцыдысты, уыдон фæрцы. Ныртæккæ та Уæрæсейы уæлдæр ахуыргæнæндæтты цы студенттæ ахуыр кæны, уыдон дæр куыддæр Хуссар Ирыстонмæ æрыздæхой, афтæ кусын райдайдзысты тамож-нæйы органты. Æвзонг специалисттæ æрвылхатт дæр размæдзыддæр вæййынц техникон æгъдауæй», — дзырдта Цхуырбаты Мурат.

Уый ма Президентæн фехъусын кодта, тагъд Зæрæмæджы Уæрæсейы Федерацийы Сæйраг таможнæйон управленийы уадзæн пункты нæхи таможнæйон кусджытæ дæр хайад кæй исдзысты, уый.

Кæронбæттæны РХИ-йы Сæйраг таможнæйон управленийы сæргълæууæг Цхуырбаты Мурат комитеты номæй йæ кусджыты схорзæхджын кодта Кады грамотæтæй. Иу къорд афицерæн та лæвæрд æрцыд уæлдæр цин.

Уазæгты Марфа

Comments are closed, but trackbacks and pingbacks are open.