Цхинвалы киноконцертон зал «Чермен»-ы Хуссар Ирыстоны скъолаты рауагъдонтæн фембæлд уыд Цæгат Кавказы хæххон-металлургион институты профессортæ-ахуыргæнджыты æмæ студентты делегациимæ.
Фембæлды хайад райстой Хуссар Ирыстоны Хицауады Сæрдары хæдивæг Пухаты Эрик, Хуссар Ирыстоны Уæрæсейы Федерацийы Уæлвæткон æмæ Æххæстбарджын минæвар Къарджиаты Эльбрус, Хуссар Ирыстоны Ахуырады министрады минæвæрттæ министр Гасситы Наталийы сæргълæудæй.
Пухаты Эрик бузныг загъта Цæгат Кавказы хæххон-металлургион институты къухдариуæгадæн, Хуссар Ирыстонæй ацæугæ студенттæм лæмбынæг хъусдард кæй дары, уый тыххæй.
«Æхсызгон нын у, уæ уæлдæр ахуыргæнæндоны хуссарирыстойнаг студенттæ аккаг фæстиуджытæ кæй æвдисынц, уый. Мæн фæнды уыдонæн стыр æнтыстыты фæндиæгтæ зæгъын сæ равзаргæ дæсныйады. Хуссар Ирыстон рæзы æмæ размæ цæуы æмæ йæ хъæуы квалификациджын специалисттæ», — загъта Пухаты Эрик.
Йæ рады Къарджиаты Эльбрус дæр æрсидт хистæркъласонтæм, цæмæй æнæ ахъуыдыгæнгæйæ ахуыр кæнынмæ бацæуой Цæгат Кавказы хæххон-металлургион институтмæ.
«16-аздзыдæй æз бацыдтæн Цæгат Кавказы хæххон-металлургион институты электромеханикон факультетмæ æмæ мæ банысан кæнын фæнды, уым кæй райстон æрмæст зонындзинæдтæ нæ, фæлæ ма организаторон архайды фæлтæрддзинад дæр. Бузныджы ныхæстæ зæгъын мæ фæнды мæ зæрдæмæ æввахс Цæгат Кавказы хæххон-металлургион институты коллективæн, традици сын кæй ссис æрвылаз дæр ардæм æрцæуын æмæ республикæйы фæсивæдæн бæрæгбон лæвар кæнын», — банысан кодта Къарджиаты Эльбрус.
Мадзалы рæстæджы, Цæгат Кавказы хæххон-металлургион институты хуссарирыстойнаг студенттæй ахуыры хуыздæр йæхи чи равдыста, уыдон, афтæ ма сæ ныййарджытæ дæр хорзæхджын æрцыдысты грамотæтæ æмæ арфæйы фыстæджытæй.
Цæгат Кавказы хæххон-металлургион институты проректор Гæбæраты Олег бахахх кодта, зæгъгæ, хуссарирыстойнаг рауагъдонтæй ахуыры сæхи хуыздæр чи равдисы, уыдон свæййынц нæ уæлдæр ахуыргæнæндоны хуыздæр студенттæ.
«Мах цæттæ кæнæм специалистты, кæцытæ Хуссар Ирыстонмæ æрыздæхгæйæ, кусдзысты æмæ йæ сæндидзын кæндзысты», — загъта Гæбæраты Олег.
Йæ рады Гасситы Натали, сæйраджыдæр, банысан кодта, зæгъгæ, ирон уæлдæр ахуырадон зонад схызт бæрзонд къæпхæнмæ.
«Тагъд рæстæджы Хуссар Ирыстоны паддзахадон университет йæ къахыл куы слæууа, ног бæстыхай нын куы уа, уæд æмбæлдзыстæм нæ Цæгат Кавказы хæххон-металлургион институты коллегæтимæ алыгъуызон конференциты, семинарты, кæрæдзимæ æрвитдзыстæм студенттæ æмæ ахуыргæнджыты. Цæгат Кавказы хæххон-металлургион институты рауагъдонтæ сæ бынат ссардзысты Хуссар Ирыстоны ахуырадон, экономикон, политикон архайды системæты. Хорзæхтæ дæттыны рæстæджы не скъолаты рауагъдонтæй, ахæм диссаджы студентты чи бацæттæ кодта, уыцы ахуыргæнджытæй æз сæрыстыр уыдтæн. Хуссар Ирыстоны педагогтæ, цыт æмæ кад сымахæн!» — банысан кодта Гасситы Натали.
Мадзалы рæстæджы Цæгат Кавказы хæххон-металлургион институты студенттæ æрæмбырдуæвджытæн равдыстой концертон программæ.
Comments are closed, but trackbacks and pingbacks are open.