Хуссар Ирыстоны паддзахадон университеты студентты иу хай, куыд зонæм, афтæмæй ацы аз хайад истой Сочийы уагъдцæуæг фæсивæды æмæ студентты XIX дунеон фестивалы. Уыдон цавæр тæлмæнтимæ æрæздæхтысты, куыд райгондæй баззадысты сæ балцæй, уый тыххæй 13-æм ноябры æд къухдариуæггæнджытæ фæуазæг сты информацион агентад «Спутник»-ы пресс-центрмæ.
ХИПУ-йы студентты къордæн фестивалмæ цæугæйæ къухдариуæг кодтой университеты ахуыргæнджытæ Мамиты Бэлæ, Плиты Сослан æмæ фæсивæдон организаци «Иууон Алани»-йы сæрдар Коцты Михаил.
Пресс-конференцийы рæстæджы фестивалы хайадисæг делегацийы къухдариуæггæнджытæ дæр бæстон æрдзырдтой сæ балцы тыххæй. Мамиты Бэлæ сæйраджыдæр журналистты базонгæ кодта фестивалы программæимæ:
– Фестивалмæ нæ фæсивæды минæвæрттæ ацыдысты 26 адæймагæй. Ацы студенттæ ма активон хайад исынц нæ университеты æмæ республикæйы культурон æмæ æхсæнадон царды. Сæ фылдæр ма хайад истой Уæрæсейы Федерацийы горæтты цæуæг алыгъуызон фæсивæдон форумты.
Ацы фестивалмæ ацæугæйæ ныл хорз зæрдæйы æнкъарæнтимæ сæмбæлдысты йæ организатортæ. Куыд æй федтам, уымæ гæсгæ дзы хайад райстой дунейы бирæ бæстæтæ. Нæ делегацийы уæнгтæ дзы бирæ бæстæты хайадисджытимæ схæлар сты.
Фæсивæдон æмæ студентон фестивалы программæ уыдис тынг цымыдисон, ахуырадон æмæ бирæ æндæр ахæм зонындзинæдтæ кæм райстаис, ахæм. Фæсивæд дзы зонгæ кодтой ног технологитæ, журналистикæ, æхсæнадæмон бартæ æмæ ноджы бирæ æндæр къабæзты ногдзинæдтимæ. Алы студентæн дæр йæ бон уыдис йæ зæрдæмæ æввахс фæдыздæхт равзарын. Уый фæстæ-иу алкæцы адæймаг дæр йæ равзаргæ фæдыздæхтмæ гæсгæ, хъуыста лекцитæм. Уыдон фæлгæтты-иу кастысты видеороликтæм дæр. Видеороликы автор-иу уыдис æвзонг адæймаг æмæ-иу бæстон равдыста йæ равзаргæ фæдыздæхты темæ. Уый фæстæ та-иу йæхæдæг диалогы хуызы лæмбынæг æрныхас кодта лекцимæ æрбацæуджытимæ. Зæгъæм, дард скæсæйнаг бæстæты университеттæй сæ иуы студент, адæмы размæ рахаста йæхи бакуыстгонд къахы протезы проект, кæцы уый æры-мысыд йæхæдæг æмæ йæ фыццаг хатт равдыста ацы форумы.
Æз мæхæдæг цымыдис кæнын журналистикæйы дæсныйадмæ æмæ хъуыстон ацы фæдыздæхтмæ хауæг лекцитæм. Мæ зæрдæмæ тынг фæцыдысты УФ-йы Бастдзинад æмæ дзыллæйон коммуникациты минстр Николай Никифоров æмæ Уæрæсейы банктæй сæ иуы президент æмæ разамынады сæрдар Герман Грефы лекцитæ.
Афтæ ма дзы уыди бирæ хиирхæфсæн программæтæ дæр.
Фæсивæдон æмæ студентон фестивалы тыххæй ма йæ хъуыдытæ загъта Плиты Сослан дæр. Уый та банысан кодта, зæгъгæ, ахæм æнгæс фестивалты æмæ форумты фæлгæтты фæсивæд базонгæ вæййынц стыр æмæ зынгæ адæймæгтæ æмæ политиктимæ. Уыдонæн та уый фадат дæтты, цæмæй бамбарой, уыдон дæр кæй сты зæххон адæм æмæ сæ бафæзмой, æмæ цæмæй сæ фидæны царды тырной размæ, – загъта йæ раныхасы Плиты Сослан.
Сæ балцы тыххæй Коцты Михаил та загъта, зæгъгæ, фæсивæдон организаци «Иууон Алани» дæр райста активон хайад ацы фестивалы. Махæн нæ организаци Уæрæсейы горæтты арæх райсы хайад ахæм форумты. Фæлæ Сочийы уагъдцæуæг XIX фæсивæдон фестиваль нырыккон историйы у иууыл егъаудæр æмæ нысаниуæгджындæр. Фæсивæдæн сæ бон фембæлын уыдис алыгъуызон зынгæ адæймæгтимæ. Нæ фæсивæды минæвæрттæ ацы форумы хайад истой, спортивон, аивадон, ахуырадон æмæ æндæр ахæм фæдыздæхтыты æмæ сæхи равдыстой тынг хорз.
Нырæй фæстæмæ нæм æнхъæлмæ кæ-сынц бирæ æндæр форумтæ дæр, æмæ мæ ныфс ис, уыдоны дæр нæ фæсивæд сæхи кæй равдисдзысты тынг хорз.
Фæсивæдон æмæ студентон фестивалы сæ хайадисты тыххæй сæ зæрдæйы баззайгæ тæлмæнтæ æз фæраздæронæй дзырдтой пресс-конференцимæ æрбацæуæг студенттæ. Уыдонæн сæ фылдæр куыд банысан кодтой, уымæ гæсгæ ацы балц цæрæнбонтæм баззайдзæн сæ зæрдæты.
Делегацийы уæнгтæй сæ иу – Гатыгкоты Каринæ йæ раныхасы банысан кодта, зæгъгæ, фестивалы бирæ хæлæрттæ ссарынæй уæлдай ма, уый цыбыр рæстæгмæ райста, царды йын тынг чи фæахъаз уыдзæн, ахæм бирæ зонындзинæдтæ.
Нæ делегацийы уæнгтæ ма куыд банысан кодтой, уымæ гæсгæ, сын уæлдай æхсызгон уыдис фæсарæйнаг бæстæтæй бирæтæн Хуссар Ирыстон æнæзонгæ кæй нæ уыд, уый. Уалыты Алыксандр йæ раныхасы банысан кодта, зæгъгæ, йын йæ къухы испайнæгтæ нæ паддзахадон тырыса куы федтой, уæд æй æвиппайды базыдтой æмæ ма 2008 азы хæсты цауты тыххæй дæр дзырдтой. Афтæ ма нæ историимæ хорз зонгæ уыдысты италиаг æмæ сириаг минæвæрттæ дæр.
Пресс-конференцийы хайадисæг минæвæрттæ ма банысан кодтой, зæгъгæ, ма уыдон бузныджы ныхæстæ загътой Венесуэлæйы делегацийы минæвæрттæн нæ республикæйы хæдбардзинад нын кæй банымадтой, уый тыххæй. Уыдон дæр хорз зонгæ уыдысты нæ адæмы историимæ, æмæ нын тынг æхсызгонæй айстой нæ бузныджы ныхæстæ. Нæ делегацийы уæнгтæ ма загътой, зæгъгæ, ацы аз нæ университетыл 85 азы кæй сæххæст ис, уый-иу фестивалы хайадисджытæ куы базыдтой, уæд-иу нын загътой бирæ арфæйы ныхæстæ æмæ зæрдæйы фæндиæгтæ.
Афтæмæй Ирыстоны æндæр бæстæты раз æвдыст æрцыд, куыд хæстæфхæрд бæстæ нæ, фæлæ куыд размæцæуæг хæдбар паддзахад.
Бирæ хорз тæлмæнтæ ма фæдзырдтой фестивалы хайадисджытæ пресс-конференцийы рæстæджы. Уыдон се ‘ппæт дæр бузныджы ныхæстæ загътой нæ республикæйы Президент Бибылты Анатолийæн, Хуссар Ирыстоны минæварад «Россотрудничество»-йæн, фæсивæдон политикæ, спорт æмæ туризмы хъуыддæгты фæдыл комитетæн, ХИПУ-йы ректор Тедеты Вадим æмæ æндæртæн, фестивалы хайад райсыны се ‘ххуысы тыххæй.
Фæсивæдон æмæ студудентты дунеон XIX фестиваль уагъд æрцыд ацы аз Сочийы 14-22 октябры. Хайад дзы райстой 187 бæстæйы минæвæрттæ, йæ хайадисджыты нымæц та уыдис 30 мин адæймаджы бæрц.
Туаты Ларисæ
Comments are closed, but trackbacks and pingbacks are open.