Хетæгкаты Къостайы номыл Цæгат Ирыстоны паддзахадон университеты ЮНЕСКО-йы залы уагъд æрцыдысты Сыгъдæг Георгийы V-æм епархиалон бакастытæ. Сорганизаци сæ кодта Дзæуджыхъæуккаг епархи, Хетæгкаты Къостайы номыл паддзахадон университет, Абайты Васойы номыл Цæгат Ирыстоны гуманитарон æмæ социалон иртасынæдты институт, Цæгат Ирыстон-Аланийы истори æмæ археологийы институты æххуысæй, – хъусын кæны Алайнаг епархи «Чырыстон Ирыстон»-ы официалон сайт.

Пленарон рабадты хайад райстой паддзахадон æмæ æхсæнадон архайджытæ, аргъуаны службæгæнджытæ, Цæгат æмæ Хуссар Ирыстоны сфæлдыстадон æмæ зонадон интеллигенцийы минæвæрттæ. Бакастытæ гом кæнгæйæ, епископ Леонид раарфæ кодта æрæмбырдуæвджытæн национ бæрæгбон Джиуæргуыбайы – сыгъдæг хъизæмаргæнæг Георги Уæлахизхæссæджы цытæн, æмæ зæрдыл æрлæууын кодта, зæгъгæ, æнæмæнгхъæуæг у æрмæст сыгъдæг удты тыххæй мысынад бахъахъхъæнын нæ, фæлæ ма нæ ивгъуыдмæ лæмбынæгдæр ахаст дарын.

Республикæ Хуссар Ирыстоны Президент Тыбылты Леониды арфæйы адрес бакаст дины фарстыты фæдыл РХИ-йы Президенты æххæстбарджын Хуыбиаты Соня. «Хорз зындгонд у, Республикæ Хуссар Ирыстоны адæмы царды Чырыстонадæн цахæм нысаниуæг ис, уый. Аланийы цæгат æмæ хуссары хæдбардзинад æмæ иудзинадмæ фæндаг равзаргæйæ, нæ бæстæйы æмбæстæгтæ уыимæ иумæ фехъусын кодтой чырыстон диныл æнувыд кæй сты, уый фæдыл дæр, кæцыйы тыххæй, рагон æвдисæнадтæ æмæ нырыккон зонадон бæрæггæнæнтæм гæсгæ, алантæ фехъуыстой уартæ апостолты рæстæджытæй. Номхуындæй, 1100 азы размæ Чырыстон дин официалонæй райсгæйæ, Алани бацыд йæ рæстæджы раззагон бæстæты нымæцмæ æмæ цæрæнбонтæм ссис хурскæсæн-чырыстон дунейы æнæбайсгæ хай», – дзырдæуы Хуссар Ирыстоны Президент Тыбылты Леониды арфæйы.

Республикæ Цæгат Ирыстон-Аланийы Парламенты Сæрдар А.Мачнев бакаст Цæгат Ирыстоны Сæргълæууæг Битарты Вячеславы арфæйы адрес.

«Ирыстоны-Аланийы, цыран чырыстонады традицитæ сты историон æгъдауæй арф æмæ хъæздыг, чырыстон этикæйы бындуртæ баззадысты не ‘хсæнады хæрзæгъдаудзинады ориентиртæ æмæ монон бындурæй. Уымæн æвдисæн сты, X-æм æнусæй фæстæмæ æрмæст Уæрæсейы территорийыл бахъахъхъæдгонд аргъуантæ нæ, фæлæ ма ирон адæмы алыварсон монон цард дæр, кæцыйæн чырыстонад ссис йæ культурон бынтæй сæ иу, æмæ ирдæй æвдисы ирон адæмы цардыуаг.

Ирон адæмы хуыздæр минæвæрттæ алы æмæ алы рæстæджыты стыр хайбавæрд бахастой райгуырæн зæххыл чырыстонад сфидар кæнынмæ. Уыдон сты зынгæ рухстуаджытæ: Ирыстоны сылгоймæгты ахуырады бындурæвæрæг, протоиерей Колыты Аксо; историк, протоиерей Гутуты Алекси; ирон аивадон прозæйы бындурæвæрджытæй сæ иу, аргъуаны службæгæнæг Гæдиаты Секъа æмæ, кæй зæгъын æй хъæуы, ирон адæмы сæрхъызой – стыр Хетæгкаты Къоста.

Абон чырыстон аргъуаны нысаниуæг рæзы, уый ногæй кæны авторитетондæр æмæ æхсæнадон æгъдауæй нысаниуæгджын институт, кæцы цæттæ у монон-хæрзæгъдау æмбæстæгтæ хъомыл кæныны сæ бирææнусон фæлтæрддзинад бацамонынмæ нæ, фæлæ ма активонæй паддзахадимæ æмархайд кæнынмæ дæр», – дзырдæуы республикæйы Сæргълæууæджы арфæйы.

Хетæгкаты Къостайы номыл Цæгат Ирыстоны паддзахадон университеты къухдариуæгады номæй раныхас кодта ректор Огъуаты А.

Уый фæстæ та докладтимæ раныхас кодтой: Епископ Леонид – «Алайнаг чырыстонад сæндидзын кæнын»; РЦИ-Аланийы истори æмæ археологийы институты директор, историон зонæдты доктор, профессор Бзарты Руслан – «Алани-Ирыстоны Чырыстонады историон æмæ культурон нысаниуæджы тыххæй»; историон зондæты кандидат, РЦИ-Аланийы национ ахастыты фарстыты фæдыл министр Цуциты А. – «Дæргъæвсы зæппадзы Чырыстон дзуар».

Пленарон рабадты фæстæ куыст адарддæр тымбыл фынгты форматы. Æрæмбырдуæвджытæ æруынаффæ кодтой аргъуан, паддзахад æмæ æх-сæнады æмархайдыл Аланийы культурон бынтæ бахъахъхъæныны тыххæй æмæ Сыгъдæг фыст æмæ хуыцауы службæты текст ирон æвзагмæ ратæлмац кæныны проблемæтыл. Алайнаг сылгоймæгты моладзандоны моладзан Георги (Бестауты) радзырдта сыгъдæг тексты ирон æвзагмæ ратæлмац кæныны историйы æмæ практикæйы Хуыцауæн службæйы се спайда кæныны тыххæй.

Форумæн хатдзæгтæ аразгæйæ, епископ Леонид банысан кодта бакастыты нысаниуæджы тыххæй, куыд гом фæзуат, афтæ, цыран аргъуаны службæгæнджытæ, ахуыргæндтæ æмæ паддзахадон структурæтæ иумæ æруынаффæ кæнынц Ирыстоны истори æмæ культурæимæ баст уæрæх темæтыл. «Ахсджиаг у, цæмæй нæ дискусситæ дæттой реалон, бæрæг фæстиуджытæ, уымæ гæсгæ æнæмæнгхъæуæг у æрмæст уынаффæ кæнын нæ, фæлæ ма саргъ кæнын, ныридæгæн арæзт цы æрцыд, уымæн. Æрмæстдæр уæд цæудзыстæм размæ Ирыстоны зæххыл Чырыстонад сфидар кæныны хъуыддаджы», – банысан кодта епископ.

РХИ-йы информацион портал

Comments are closed, but trackbacks and pingbacks are open.