Фондз азы бирæ нæу, фæлæ бирæ у

Республикæ Хуссар Ирыстоны Ветеринарон æмæ фитосанитарон хъусдарды паддзахадон службæ æвзонг организаци у, арæзт æрцыд 24 октябры 2017 азы. Службæйы сæйраг хæстæ сты ветеринарийы фадыг контроль кæнын, хосгæнæн фæрæзтæй куыд пайда кæнын хъæуы, уымæ хъус дарын, низ рапарахат кæныны рæстæджы карантин бакæнын, зайæгойты хъахъхъæнын, æдасæй пестицидтæ æмæ агрохимикаттæй пайда кæнын, нæмыгон культурæты гъæд æмæ сæ æдасдзинадæй ифтонг кæнын.

Ветеринарон æмæ фитосанитарон хъусдарды службæ ацы аз банысан кодта йæ сырæзты фыццаг юбилей. Разамынад ын кæны хъæууон хæдзарады министрады специалист Гуыцмæзты Маирбег. Ацы службæ цы куыст кæны, уымæн фæстиуджытæ аразгæйæ, Маирбег банысан кодта, зæгъгæ, Хуссар Ирыстоны «Югосельхознадзор» аразы æмæ араздзæн æппæтдæр фосы низты ныхмæ тох кæнынæн. Раздæр бруцеллез, лейкоз æмæ рæуджыты низты ныхмæ стурвосæн кæд рæстæгæй рæстæгмæ уагъд цыд иртасæнтæ, уæд ныртæккæ та æдзухæй. Ацы службæйы инициативæмæ гæсгæ уыцы иртасæнтæ бахастой эпизоотикон мадзæлтты ныхмæ планмæ.

Эпизоотикон мониторингы фæлгæтты лабораторон иртасæнтæ нæ республикæйы территорийыл уагъд цæуынц серологи, токсикологи, афтæ ма ветеринарон-санитарон экспертизæтæ аразыны фæдыл, уымæн æмæ ацы азты уыдон нымæц бæрæг фæфылдæр.

Хъæууон хæдзарады министрад ацы иртасæнты бындурыл бахæссы барасткæнинæгтæ эпизоотикон профилактикон мадзæлтты планмæ.

Æмбарынгæнæн куыст бакæныны фæстиуæгæн дзидза æмæ æхсыры продукцийæн йæ 98 проценты Хуссар Ирыстонмæ ласт цæуы ацы службæйы хъусдардæй, æмбæлон ветеринарон бæлвырдгæнæн гæххæттытæ саразыны фæстиуæгæн.

Ветеринарон æмæ фитосанитарон хъусдарды службæйы къухдариуæггæнæг ма куыд банысан кодта, уымæ гæсгæ къухдариуæгады æххæсткæнынадон æмбæлон органтимæ æмархайды руаджы паддзахадон уадзæн пункттæ «Рукъ» æмæ «Раздæхæн»-ы уагъд цæуы Республикæ Хуссар Ирыстоны территори хъахъхъæныны фæдыл мадзæлтты комплекс ома, хъусдарды бын продукци æдасдзинады домындзинæдтæн дзуапп куы нæ дæтта, уæд ын нæй республикæмæ æрбауадзæн.

«Югоссельхознадзор»-ы службæ æдзух æмархайд кæны «Россельхознадзор» æмæ Уæрæсейы Федерацийы субъектты ветеринарон службæтимæ. Æмархайды сæйраг здæхтытæ сты сæ хъусдарды продукци, хæлцадон продуктты гъæд æмæ æдасдзинады лабораторон мониторинг. Уæрæсейы Федерацийы компетентон органтæн эпизоотикон ивындзинæдты тыххæй хъусын кæнынц æдзухдæр.

Гуыцмæзты Маирбег ма нын куыд радзырдта, афтæмæй æмархайд кæнынц Дзæуджыхъæу, Налцыкк æмæ Кропоткины горæтты ветеринарон лабораторитимæ. «Югоссельхознадзор»-ы цæрæгойты низтæ сбæлвырд кæныны хайады кусджытæ сæ квалификаци æдзух бæрзонддæр кæныны нысанæн рацæуынц Дзæуджыхъæуы республикон ветеринарон лаборатори æмæ Краснодары крайы Кропоткины ветеринарон лабораторийы курсытæ.

Ныхасгæнæг банысан кодта, зæгъгæ, арæзт бирæ æрцыд, фæлæ ууыл æрлæууæн нæй, уымæн æмæ нырма бирæ ис аразинаг.

Ацы службæйы сырæзтæн арфæ ракодта Хицауады Сæрдар Джуссойты Константин:

«Ветеринарон æмæ фитосанитарон службæтæн ахсджиаг нысаниуæг ис аграрон комплексы эффективон куыст кæныны æмæ Хуссар Ирыстоны фæлхасадон æмæ биологон æдасдзинад ифтонг кæныны хъуыддаджы.

Хъæздыг традицитæ æмæ нырыккон методтæй пайдагæнгæйæ сымах райсут компетентон æмæ бæрнон уынаффæтæ республикæйы территорийыл эпизоотикон стабилон уавæр ифтонг кæныны фæдыл.

Ныфс мæ ис, æмæ дарддæр дæр уæ куыст кæндзыстут намысджынæй æмæ профессионалон æгъдауæй бæстон цæудзысты, службæйы раз цы хæстæ ис, уыдон», – дзырдæуы Сæрдары арфæйы.

Къæбулты Маринæ