Куыд ма хъусын кодтам, афтæмæй Мæхъæлы республикæйы Магасы горæты уагъд æрцыд Цæгат Кавказы дзыллон информацийы фæрæзты 5-æм форум «Россия — 2018. Кавказский ракурс». Форуммæ фыццаг хатт хуынд æрцыдис Республикæ Хуссар Ирыстон дæр. Делегацийы сконды уыдысты РХИ-йы Информаци æмæ мыхуыры паддзахадон комитеты сæрдар Хъотайты Мария, информацион агентад «Рес»-ы директор Уазæгты Юри æмæ РХИ-йы Президенты Администрацийы мидæггагон политикæйы фæдыл управленийы хистæры хæдивæг Джуссойты Алан. Форум цы æмвæзадыл ацыд æмæ дзы дзырд цы фарстытыл цыдис, уыдæтты тыххæй нын цыбыртæй радзырдта Хъотайты Мария. Йæ ныхæстæм гæсгæ, ахæм форумты хайадист регионалон дзыллон-иформацион фæрæзтæн фадат дæтты кæрæдзиимæ сæ фæлтæрддзинад дих кæнынæн, кæрæдзийæн амонын, афтæ ма æндæр республикæты журналистты фæлтæрддзинад ахуыр кæнынæн. Форум уагъд цыд æртæ боны Мæхъæлы республикæйы, горæт Магасы. Хъотайты Мария куыд банысан кодта, афтæмæй форумы хайад райстой Цæгат Ирыстон, Кæсæг-Балхъар, Дагъыстан, Хъæрæсе-Черкеск, Цæцæн æмæ Мæхъæлы республикæты минæвæрттæ. Хуссар Ирыстон æмæ æфсымæрон Абхазы республикæ форуммæ хуынд æрцыдысты фыццаг хатт. Уый кæд фæндзæм юбилейон форум уыд, уæддæр регионты æмвæзадыл уагъд цыд фыццаг хатт. Раздæр уагъд цыд горæт Пятигорскы: «Мах фыццаг хатт уым хайад кæй истам, уымæ гæсгæ нæм форум уадзыны рæстæджы æрдардтой æмбæлон хъусдард. Ныхасы бар нын радта тымбыл фынджы сæргълæууæг Юнус-Бек Евкуров. Форумы фыццаг бон дзы хайад райста Мæхъæлы республикæйы сæргълæууæг Юнус-Бек Евкуров. Форум уагъта Уæрæсейы федералон телеканалы зынгæ журналист Дмитрий Щугалев, афтæ ма дзы хайад истой Уæрæсейы Паддзахадон Думæйы минæвæрттæ. Стыр хъусдард здæхт цыдис дзыллон информацийы фæрæзтæ регионты цы проблемæтыл сæмбæлынц, уыдонмæ. Æз бирæ раныхæстæм байхъуыстон, алкæмæн дæр дзы хатдзæгтæ арæзтон, æмæ йæ мæхицæн банысан кодтон иннæтæм абаргæйæ, нæ республикæйы дзыллон информацийы минæвæрттæн сæ зонындзинæдтæ ныллæгдæр æмвæзадыл кæй не сты. Æз æркастæн, зæгъæм, Дагъыстаны, Цæцæны бынæттон газеттæм æмæ мæ банысан кæнын фæнды, нæ паддзахадон газеттæ сæ мидисмæ гæсгæ, сæ арæзтмæ гæсгæ фæстæдæр кæй нæ лæууынц Цæгат Кавказы регионалон газеттæй. Фæлæ, уый ууыл дзурæг нæу, æмæ нæ журналистикæйы фадыджы размæ цæуын нæ хъæуы, нæ зонындзинæдтæ ноджыдæр хъуамæ уæрæхдæр кæнæм, азæй азмæ хуыздæр кæнæм.

Форумы программæйы ма уыд культурон мадзæлттæ дæр, уагътой нын экскурситæ, зонгæ нæ кодтой бынæттон националон традицитимæ. Алкæцы регионæн дæр, форум цы бæстыхайы уагъд цыд, уым фойейы æвæрд уыд стендтæ, цыран æвдыст цыдысты сæ газеттæ æмæ чингуытæ. Уæлдæр  куыд банысан кодтон, афтæмæй Хуссар Ирыстон фыццаг хатт кæй иста форумы хайад, æмæ форумы организаторты ‘рдыгæй фæдзæхст кæй не ‘рцыдыстæм, уымæ гæсгæ нын фадат нæ фæцис нæ бынæттон газеттæ æмæ чингуытæ немæ ахæссын. Фæлæ, æнæмæнгæй,  иннæ азмæ нæхи хуыздæр бацæттæ кæндзыстæм. Иууыл хуыздæр дзы уыцы стендтæй банымадтой Республикæ Цæгат Ирыстон-Аланийы стенд. Уый иумæйагæй федтой, куыд форумы цытджын уазджытæ, афтæ ма Цæгат Кавказы хъуыддæгты фæдыл министр Лев Кузнецов æмæ Республикæ Цæгат Ирыстон-Аланийы сæргълæууæг Битарты Вячеслав. Уый уыд форумы дыккаг бон», — банысан кодта Хъотайты Мария.

Комитеты сæрдар ма куыд загъта, афтæмæй форумы рæстæджы презентаци уыд ног спутникон телеканал «Осетия-Ирыстон»-æн. Уый Мария банымадта зынгæ цауыл.

— Æз уым базонгæ дæн мæ цæгатирыстойнаг коллегæ Гæбæлаты Мадинæимæ æмæ баныхас кодтам, 2018 азы нæ республикæты журналисттæн иумæйаг пресс-туртæ уадзыныл. Афтæ ма æрдзырдтам нæ дыууæ паддзахадон газеттæ «Хурзæрин» æмæ «Рæстдзинад»-ы проблемæтыл æмæ сæ аиуварс кæныныл. Иумæйагæй, форум ацыдис бæрзонд æмвæзадыл æмæ æнæмæнгхъæуæгыл нымайын ахæм фембæлдтытæ, — йæ ныхас балхынцъ кодта Хъотайты Мария.

Танделаты Виленæ 

Comments are closed, but trackbacks and pingbacks are open.