16-æм августы РХИ-йы Культурæйы министрады цур Адæмон сфæлдыстады центр нæ горæты Анахарсисы номыл национ библиотекæйы кæсæн залы ауагъта фотоконкурс «Хуссар Ирыстон – 2019», зæгъгæ. Уый ныр уагъд æрцыд фæндзæм хатт. Ацы аз конкурс уагъд цыд ахæм номинациты: «Хуссарирыстойнæгтæ», «Цхинвал абон» æмæ «Хуссар Ирыстоны фенддаг бынæттæ æмæ рагон цыртдзæвæнтæ».

Фæндзæм республикон фотоконкурсы жюрийы уæнгтæ уыдысты: Ковалев Алексей – профессионалон къамисæг (жюрийы сæрдар); Цхуырбаты Тамерлан – РХИ-йы Нывгæнджыты цæдисы сæрдар; Гуыцмæзты Елизаветæ – Адæмон сфæлдыстады республикон центры директор, РХИ-йы культурæйы сгуыхт архайæг; Дзеранты Джульетæ – РХИ-йы Культурæйы министры хæдивæг, РХИ-йы культурæйы сгуыхт кусæг; Цхуырбаты Арианæ – нывкæнынады аивады фæдыл методист.

Конкурсы нысан æмæ хæс уыдысты Хуссар Ирыстоны цæрджыты сфæлдыстадон активондзинады рæзтæн ахъаз кæнын æмæ сын æххуыс кæнын. Конкурсы хайад райсын сæ бон уыд, къам исын чи уарзы, æрмæстдæр уыцы хæдархайгæ автортæн кармæ æмæ кæм цæры, цы архайы, уымæ нæ кæсгæйæ. Профессионалон нывисджытæн нæ уыд конкурсы хайад райсыны бар. Хайадисджытæй алкæцыйы куыстæн дæр центры кусджытæ бацæттæ кодтой табличкæтæ, кæцытæ æвæрд уыдысты къамты бынмæ. Карточкæты  фыст уыдысты къамы ном, кæд ист æрцыд, авторы мыггаг, ном æмæ кæд райгуырд, уый. Конкурсмæ йæ куыстытæ æрвитгæйæ, автор бар дæтты конкурсы организатортæн æрбавдисгæ æрмæгæй спайда кæнынæн ахæм нысæнттæн,  кæцытæ баст сты куыд конкурс ауадзынæн, афтæ уый фæстæ мадзæлтты дæр (нывты равдыстытæ, информацион буклеттæ, фотоальбомты тыххæй).

Конкурсы хайад райсыны тыххæй куырдиæттæ истой 14-æм августы онг. Уагæвæрдмæ гæсгæ æрмæг бавдисæг хъуамæ уыдаид куысты автор йæхæдæг, стæй дæр авторæн бар нæ уыд компьютерæй спайда кæнынæн. Мадзалы хайад райстой 16 адæймаджы, кæцытæй иу дæр нæ уыд профессионалон къамисæг. Иумиагæй æрбавдыстæуыд 96 къамы. «Хуссар Ирыстоны фенддаг бынæттæ æмæ рагон цыртдзæвæнты номинацийы – 43 къамы; «Цхинвал абон»-ы – 16 къамы æмæ «Хуссарирыстойнæгты» та – 34 къамы. Уыдон иууылдæр æвæрд уыдысты стъолтыл Анахарсисы номыл национ библиотекæйы кæсæн залы. Къамтæй алкæцыйы бын дæр цы табличкæтæ уыд, уыдоны жюрийы уæнгтæ сæвæрдтой баллтæ (аргъ сын кодтой фондзбаллон системæмæ гæсгæ). Уыдоны фæстæ та куыстытæн саргъ кодта жюрийы сæрдар Алексей Ковалев. Профессионалон, фæлтæрдджын къамисæг иу бакастæй бæрæг кодта куыстыты гъæд æмæ сын уый дæр сæвæрдта баллтæ.

Куыстытæй чи цас баллы райста, уый банымайгæйæ, фæбæрæг сты фотоконкурсы уæлахиздзаутæ. Дыууæ номинацийы фыццаг бынæттæ лæвæрд æрцыдысты Тедеты Анжелæйæн, фыццаг бынат ма бацахста Хетæгкаты Руслан. Дыккаг бынæттæ бацахстой Мæргъиты Ирбег, Туаты Мария, Элла Авагимова æмæ Бестауты Ларисæ. Дыууæ номинацийы æртыккаг бынат бацахста Джаджиты Аланæ. Афтæ ма æртыккаг бынæттæ фесты Джиоты Аленæ æмæ Уалыты Мальвинæйы. Фыццаг бынатыл ацæуæг конкурсанттæн лæвæрд æрцæудзысты фæйнæ фондз мин сомы, дыккаг бынатæн – 3 мин сомы æмæ æртыккаг бынæттæн та – 2 мин сомы. Иумиагæй сисгæйæ, конкурсы хайадисджытæ иууылдæр хорзæхджын æрцæудзысты дипломтæ æмæ зæрдылдарæн лæвæрттæй. Призон бынттæ чи бацахста, уыцы конкурсанттæ та – Кады грамотæтæ æмæ призтæй.

Фотоконкурсы хатдзæгтæм гæсгæ, 26-æм августы, Хуссар Ирыстоны хæдбардзинад банымайыны боны цытæн,  Къостайыхъæуы уагъд æрцæудзæн къамты равдыст «Остановись, мгновение, ты родное», зæгъгæ. Равдысты æвæрд æрцæудзысты ацы азы æмæ уый размæ азты конкурсты уæлахиздзауты куыстытæ. Афтæ ма центры кусджытæ сорганизаци кæндзысты «Ирон адæмон хъæзтытæ».

Адæмон сфæлдыстады республикон центры директор Гуыцмæзты Елизаветæйы ныхæстæм гæсгæ, фотоконкурс уагъд цæудзæн æрвылаз дæр. Уый та хорз фадат у, къамтæ исын чи уарзы, уыдонæн сæ курдиат равдисынæн æмæ дарддæры рæзтæн.

ДЖИОТЫ Екатеринæ

Comments are closed, but trackbacks and pingbacks are open.