13-æм январы РХИ-йы Мыхуыр æмæ информацийы комитеты уазджытæ уыдысты Хъалонтæ æмæ фиддонты комитеты сæрдар Къадзты Владимир æмæ Паддзахадон таможнæйон комитеты сæрдар Цхуырбаты Мурат. Уыдон журналистты зонгæ кодтой 2016 азæн сæ бакæнгæ куысты фæстиуджытимæ.
Пресс-конференцийы рæстæджы Къадзты Владимир æмæ Цхуырбаты Мурат бæстонæй æрдзырдтой канд къухы бафтгæ æнтыстытыл нæ, фæлæ 2017 азы сæ куыстмæ ногæй бахæссинаг цы сты, уыдæттыл дæр.
Куыд зонæм, афтæмæй 2016 аз иттæг æнтыстджын уыд Хъалонтæ æмæ фиддонты комитетæн. Комитеты къухдариуæггæнæг куыд банысан кодта, афтæмæй æнтыстытæ сæ къухы бафтыдысты административон мадзæлттæ æмæ æнгæс структурæтимæ æмархайды механизмтæ кæй фæхуыздæр сты, афтæ ма республикæйы иумæйаг экономикон уавæр кæй фæбæрзонддæр, уый руаджы. «2016 аз Хъалонты фиддонтæй республикæйы бюджетмæ бацыд 784 милуан 156 мин сомы. Ивгъуыд аз 1 январæй йæ тыхы бацыд хъалонты ног кодекс æмæ уый фæрцы къухты бафтыдысты ахæм бæрзонд бæрæггæнæнтæ. 2015 азмæ абаргæйæ нæ республикæйы регистраци æрцыдысты цалдæр амалиуæггæнæджы. Республикæйы къухдариуæгады æххуысæй скуыста реалон сектор, стæй ма реализаци æрцыд цалдæр проекты дæр. Æппæт уыдæттæ хорз фæстиуæг радтой хъалонтæ æмбырд кæныны базæйæн», – загъта Къадзты Владимир.
Уый ма куыд загъта, афтæмæй 2017 азы Хъалонтæ æмæ фиддонты комитетæн йæ зæрды ис сæ куысты гъæд фæбæрзонддæр кæнын æмæ ног тарифтыл бакусын. «Нæ сæйраг хæсыл нымайæм паддзахадон бюджеты æфтиæгты хай фæфылдæр кæнын æмæ инвестицион климат фæхуыздæр кæнын», – дзырдта Хъалонты æмæ фиддонты комитеты сæргълæууæг.
«2016 азы Паддзахадон та-можнæйон комитет республикæйы бюджетмæ бахаста 36 милуан æмæ 157 мин сомы», – загъта журналисттæн ацы комитеты сæргълæууæг Цхуырбаты Мурат.
Уый куыд банысан кодта, афтæмæй 2015 азимæ абаргæйæ 2016 аз бюджетмæ бацыд 13 милуан сомы фылдæр. Уымæй дарддæр ма Цхуырбаты Мурат куыд загъта, афтæмæй 2017 азы Хуссар Ирыстоны таможнæйон службæ ноджы фæфылдæр кæндзæнис уыцы фиддонтæ 65 милуан сомы онг.
«Хуссар Ирыстон æмæ Гуырдзыстоны арæныл Ленингоры районы уадзæн пункт «Раздæ-хæн»-ы бынаты ис гæнæн æмæ байгом уа таможнæйон уадзæн пункт», – загъта Цхуырбаты Мурат.
Уæ зæрдыл уын лæууын кæнæм Ленингоры районы уадзæн пункт «Раздæхæн» йæ куыст кæй райдыдта 2010 азы. Ацы пунктыл æрвылбон дæр хизынц 700 адæймаджы бæрц. Сæ фылдæр кæнынц коммерцион архайд ласынц дыргътæ æмæ халсартæ Гуырдзыстоны территорийæ. Уый фæстæ сæ реализаци кæнынц республикон базарадон объектты.
«Раздæхæн»-ы таможнæйон контролы пункт нæй. Уый сæйраджыдæр ис уæрæсейæ, арæнхъахъхъæнджыты контролы бын. Арæнхъахъхъæнджытæн та ис æндæр функцитæ. Уымæ гæсгæ уыдон сæ хъус нæ дарынц, цал хатты рахызт уадзæн пунктыл иу кæнæ иннæ адæймаг æмæ цас бæрц продукци раласта (иу адæймагæн уагæвæрдмæ гæсгæ бар ис 50 кг ласынæн). Афтæмæй та хъахъхъæд нæ цæуы уадзæн пункты уагæвæрд.
«Фарон августы мæйы, мах хицауады уынаффæмæ гæсгæ сарæзтам мониторинг, куыд кусы уадзæн пункт, уый нысанæн. Хъуамæ сбæрæг кодтаиккам цас уæййæгтæ ласт цæуынц чи дзы хизы, сæйраджыдæр, уыдон. Зонæнтæ иууылдæр хаст цыдысты суагъæмæ. Фæстæдæр мах нымæцтæ бавдыстам хицауадмæ», – дзырдта Таможнæйон комитеты сæргълæууæг.
Цхуырбаты Мурат куыд фехъусын кодта, афтæмæй ацы аз «Раздæхæн»-ы бынаты æвæрд æрцæудзæн таможнæйон пост. «Ныртæккæ уæййæгтæ иууылдæр цæуынц ласт куыд хисæрмагонд, афтæ, иу адæймагæн нæй бар 50 кг фылдæр халсартæ æмæ дыргътæ æрбаласынæн. Пост бакæныны фæстæ таможнæйы кусджытæн сæ бон уыдзæн, сæ хъус дарын, цæмæй сыхаг республикæйæ цы продукци ласт цæуы, уыдон æнæ фиддонтæй ма ирвæзой республикæмæ, хъахъхъæд цæуой фитосанитарон домæнтæ», – дзырдта Цхуырбаты Мурат.
Уый ма дзырдта ноджы иу вазыгджын цауыл: гæнæн ис æмæ фидæны нæ республикæйы территорийыл, сæрмагондæй та «Раздæхæн»-ы байгом уа та-можнæйон пост Фæскавказ, Æввахс Скæсæн æмæ Азийы бæс-тæтæм транзитон транспортæн.
Таможнæйон комитеты сæргълæууæг ма куыд фехъусын кодта журналисттæн, афтæмæй Хуссар Ирыстон æмæ Уæрæсе сæвæрдзысты иумæйаг контролон пункт Дæллаг Зæрæмæджы.
«Фарон цы бадзырд бафыстæуыд, уымæ гæсгæ Хуссар Ирыстоны таможнæйы кусджытæ таможнæйон пост «Рукъ»-æй алæудзысты таможнæйон пост «Дæллаг Зæрæмæгмæ», – загъта Цхуырбаты Мурат.
Уый куыд бамбарын кодта, афтæмæй 2015 азы марты мæйы Хуссар Ирыстон æмæ Уæрæсейы таможнæты ‘хсæн бафыст æрцыд бадзырд. Уый фæлгæтты Интеграци æмæ æмцæдисады программæ æххæст кæныны нысанæн 2017 азы кæронмæ «Рукъ»-ы пост хаст æрцæудзæн Цæгат Ирыстоны территоримæ. «Нæ коллегæтæ хæсдзысты службæ уæрæсейаг таможнæйы æмрæнхъ. Уый та бæрæг фæрогдæр кæндзæнис амалиуæггæнджыты архайд, фæкъаддæр уыдзæн уыдон уа-дзын æмæ сæ гæххæттытæ бæстон кæныны рæстæг. Хуссарирыстойнаг æмæ уæрæсейаг таможнæйон кусджытæ кусдзысты иу хатæны. Зæгъæм, уæрæсейаг таможнæйы кусæг базайрагæн экспорт куы араза уыцы гæххæтытæн, уæд РХИ-йы таможнæйы кусæг та уыцы базайрагæн сараздзæн импорт.
Уæрæсейаг-хуссарирыстойнаг арæныл базайрæгтæ æмæ уæргътæ иумæйаг контролæй дарддæр ма таможнæйон къабазы бадзырд нысан кæны хуссарирыстойнаг таможнæйон органтæ кæй рахиздзысты Евразиаг цæдисы закъондæттынадмæ таможнæйон хъуыддаджы.
Бадзырдмæ гæсгæ ма Хуссар Ирыстоны таможнæйон органтæ рахиздзысты Уæрæсейы Федерацийы таможнæйон органты цы штатон программæ æмæ технологитæ ис, уыдонмæ. Уыцы таможнæйы цы таможнæйон операцитæ уагъд цæуы, уыцы хъуыддагмæ.
Уазæгты Марфа
Comments are closed, but trackbacks and pingbacks are open.