Галаты Барисы номыл Хуссар Ирыстоны кафт æмæ зарды паддзахадон ансамбль «Симд»-æн сæ архайд фæстаг рæстæджыты кæй фæактивондæр, уый æнæрахатгæ нæу. Бæрæг у сæ концертты нымæцæй дæр. Ныр та сæхи цæттæ кæнынц гастролон балцмæ горæт Краснодармæ.
Ансамбль «Симд»-ы аивадон къухдариуæггæнæг Коцты Сергей нын куыд загъта, уымæ гæсгæ ныридæгæн алыбон дæр кæнынц репетицитæ, цæмæй сæ концертон программæ уа æмбæлон æмвæзадыл арæзт æмæ уый фæстæ 15 ноябры уæлдæрбанысангонд горæты ратдзысты концерт. «Артисттæ дæр æмæ ансамблы разамонджытæ дæр ацы хъуыддагыл сæмбæлдыстæм стыр цинимæ, уымæн æмæ паддзахадон ансамблæн æнæмæнгхъуыддаг сты гастролон балцытæ. Уæрæсейы æндæр æмæ æндæр регионты сценæтыл ралæууын у кæцыфæнды артисты бæллиц дæр æмæ зæрдиагæй нæхи цæттæ кæнæм гастролтæм. Лæмбынæг хъусдард здахын алы кафæджы арæхстдзинадмæ дæр æмæ сын афтæмæй бараст кæнын сæ рæдыдтытæ. Кусæм æмæ архайæм, цæмæй нæ ансамблы арæхстдзинад уырыссаг сценæмæкæсджытæн уа цымыдисон, æввахсдæр базонгæ уой ирон адæмы культурæимæ. Уыцы иурæстæджы ма гастролтæм сæхи цæттæ кæнынц ансамблы хор дæр, уыдонимæ та кусы Саппиаты Залинæ. Мах нæ программæмæ бахастам нæ репертуары хуыздæр хореографион номыртæ æмæ ма йæм фæстаг хатт кæй бахастам, уыцы кафт — „Калинка-Лезгинка“, кæцыйы æрæджы сæххæст кодтам М. Годенкойы номыл Красноярскы паддзахадон кафты академион ансамблимæ иумæ. Мæ хъуыдымæ гæсгæ, уырыссаг сценæмæкæсджытæн æхсызгон уыдзæнис уырыссаг кафт ирон ансамблы æх-хæстæй куы феной, уæд», — банысан кодта ансамблы аивадон къухдариуæггæнæг.
Паддзахадон ансамбль «Симд» ма 18-æм октябры Хетæгкаты Къостайы номыл паддзахадон драмон театры сценæйыл равдыстой хæрзаудæн концерт. Цы æхцайы фæрæзтæ дзы æрбамбырд уа, уыдон æххуысы хуызы æрвыст æрцæудзысты Донбассы уæвæг ирыстойнаг хæстонтæн.
ЦХУЫРБАТЫ Лариса
Comments are closed, but trackbacks and pingbacks are open.