Газеты редакцимæ арæх æрбацæуы фыстæджытæ не ‘мбæстæгтæй. Уыдоны æхсæн вæййы бузныджы фыстæджытæ, фæлæ сæ фылдæр та — Хицауады чиновниктæм фарсты хуызы, иу кæнæ иннæ фарстæн æмбарынгæнæн дзуаппытæ райсыны охыл.

Æрæджы нæм Ленингоры районы иумæйаг ахуыргæнæндон скъолайæ æрбацыд ахæм фыстæг: «Газет «Хурзæрин»-ы зынаргъ редакци! Ленингоры районы ахуыргæнджытæ дæм сæ хъаст хæссынц иу фарсты фæдыл: ивгъуыд аз декабры мæйы информацион фæрæзты фæрцы базыдтам, скъолайы ахуыргæнæндæттæн 2016 азы 1-æм январæй сæ мызд кæй фæфылдæр. Фæстæдæр газеттæ «Хурзæрин» æмæ «Южная Осетия»-йы фæрстыл уыд хъусынгæнинаг, ацы хъуыддаг кæй нæ хауы конфликтон зонæйы цæрæг хъæуты цæрджытæм. Бузныг уæ уаиккам, ацы фарстæн нын уæ газеты фæрстыл дзуапп куы радтаиккат», — фыссынц Ленингоры районы скъолайы ахуыргæнджытæ. Фыстæгыл ис 14 ахуыргæнæджы  къухфыст.

Ахæм сигнал райстам Дзауы районы Синагур æмæ Кировы скъолаты ахуыргæнджытæй дæр.

Дзуапп райсынмæ бацыдыстæм Ахуы-рад æмæ зонады министрадмæ. Уый фæдыл нын министры хæдивæг Лолоты Аслан афтæ загъта.

«Бæрæг куыд у, афтæмæй Уæрæсейы Федераци æмæ Хуссар Ирыстоны Æмцæдисад æмæ интеграцийы тыххæй бадзырдыл Владимир Путин æмæ Тыбылты Леонид 2015 азы 18 марты æрфыстой сæ къухтæ. Ацы Бадзырд РХИ-йы Парламент сратификаци кодта 2015 азы 3-æм апрелы æмæ УФ Паддзахадон Думæ та — уыцы аз 19 июны.

Æмцæдисад æмæ интеграцийы тыххæй цы бадзырдыл къухтæ æрфыстæуыд, уыцы пункттæй иу уыд: «Бюджетон къабазы кусджыты куыстмызд фæфылдæр кæныны тыххæй, Уæрæсейы Федерацийы æмæ Хуссар Ирыстоны ‘хсæн бакуыстгонд Сразыдзинады проектмæ бюджетон къабазы кусджыты куыстмызд фæфылдæр уыдзæн астæуккаг нымадæй 16 %».

Куыд зонæм, афтæмæй ацы пунктмæ бахаудысты ахуырад, æнæниздзинад хъахъхъæныны, культурæ, физкультурæ æмæ спорт, хъæууон хæдзарад æмæ дзыллон информацийы фæрæзтæ. Уыдонæн мызд ногæй нымад æрцыд 2016 азы райдайæнæй æмæ ацы нысанæн Уæрæсейы Федераци рахицæн кодта финансон æххуыс 195 милуан сомы. Æнæхъæн афæдз интенсивон куыст цыд уыцы æхцайы фæрæзтæ раст æмæ компетентонæй адих кæныныл. Финансты министрад ацы фарстыл кусгæйæ йæ сæйраг хæсыл нымадта республикæйы территорийыл иумæйагахуырадон скъолаты ахуыргæнджытæн сæ куыстмызд сæмхуызон кæныныл. Уый уымæн зæгъын æмæ бæрæг куыд у, афтæмæй гуырдзиаг-ирон хæст куы райдыдта, уæд конфликтон зонæйы цы хъæуты скъолатæ уыд, уыцы ахуыргæнджытæн сæ куыстмыздмæ æфтыд æрцыд 50 % уæлæмхас æхцайы фæрæзтæ. Уæдæй нырмæ ацы уагæвæрд ивд не ‘рцыд, суанг арæнхъахъхъæнджытæ куы слæууыдысты арæнтыл, уæддæр. Цалдæр азы размæ ахуыргæнджыты мыздмæ 13 % æфтыд куы æрцыд, уæддæр нæ бахаудысты уыцы категоримæ арæнмæ æввахс хъæуты цæрджыты скъолаты ахуыргæнджытæ. Уый цæмæн афтæ у, уый тыххæй иумæйаг скъолаты ахуыргæнджыты ‘хсæн æрцыд æмбарынгæнæн куыстытæ. Ныр та проектмæ гæсгæ бюджетон къабазы кусджыты мыздмæ 16 % куы бафтыд, уæд уый нæ бандæвта конфликты зонæйы хъæуты скъолаты ахуыргæнджытыл. Фæлæ уый арæзт æрцыд æрмæстдæр уый нысанæн, цæмæй астæуккаг нымадæй скъолаты ахуыргæнджыты куыстмызд уа иугъуызон», — дзуапп радта Ахуырад æмæ зонады министры хæдивæг Лолоты Аслан.

Фыстæджы иу абзацы та афтæ фыстæуы «Газет «Республика»-йы фæрстыл уацы Хæбæлаты Азæ зæгъы: «Повышение коснется врачей, преподавателей школ и ВУЗ-а». Ныр æй нал æмбарæм, æмбæлы нæм æви нæ ахуыргæнджытæм ацы мызды æфтыд?!»

Ацы фарсты тыххæй та нын Финансты министрады афтæ сдзуапп кодтой.

«Финансты министр цалынмæ ацы документыл не ‘рдзырдта, уæдмæ канд ахуырады къабазы нæ, фæлæ иннæ фадгуыты кусджытимæ дæр цыд æмбарæн куыстытæ, куыстмызд куыд фылдæр уыдзæн, уый фæдыл. Уымæ гæсгæ канд ахуыргæнджытæ нæ, фæлæ йæ алы æмбæстаг дæр зоны, уый Сразыдзинады проектмæ гæсгæ арæзт кæй æрцыд. Æмцæдисад æмæ интеграцийы тыххæй бадзырды фæлгæтты дзырд цæуы, бюджетон къабазы кусджытæн сæ мызд систематикон æгъдауæй кæй фылдæр кæндзæнис. Кæй зæгъын æй хъæуы, конфликтон зонæйы хъæуты цы скъолатæ ис, уыцы ахуыргæнджыты мыздмæ дæр нырæй фæстæмæ æфтдзæн, бюджетон къабазы кусджыты куыстмыздмæ куыд æфта, афтæ. Министр йæ раныхасы сæрмагондæй ацы категорийы кусджыты уымæн рахицæн кодта, æмæ цалынмæ куыстмыздмæ 16 % æфтыд не ‘рцыд, уæдмæ æмбарынгæнæн куыст æрцыд конфликтон зонæйы хъæуты ахуыргæнджытимæ. Ахæм куыст æрцыд йæ рæстæджы та горæты æмæ æндæр хъæуты скъолатимæ. Уæддæр горæты скъолаты ахуыргæнджытæй иуæй-иутæ разы нæ уыдысты, уыдон уыцы иу рæстæджы къласы 25-28 сывæллонимæ кусгæйæ, хъæуты ахуыргæнджытæй 50 % къаддæр куыстмызд кæй исынц».

Финансты министрады ма куыд загътой, афтæмæй конфликты зонæйы хъæуты ахуыргæнджытæ куыстмызд фæфылдæр кæныны фæткойтæ раст кæй нæ бамбæрстой, уым аххосджын у сæ районты ахуырады хайадтæ семæ æмбарынгæнæн куыстытæ кæй нæ бакодтой, уый тыххæй.

 

Уазæгты Марфа

Comments are closed, but trackbacks and pingbacks are open.