18-æм майы горæт Цхинвалы бирæпрофилон колледжæй дардмæ хъуыстысты ирон муызкæйы æхцон зæлтæ. Уыцы бон ахуырадон уагдоны уыд æцæг бæрæгбон. Æхцон музыкæйы зæлты бын колледжы кæртмæ бахизгæйæ, адæймаджы зæрдæ æнкъардта æнахуыр позитивон эмоцитæ.
2010 азы Цхинвалы хъæууонхæдзарадон техникумы базæйыл цытджын æгъдауæй байгом æрцыд бирæпрофилон колледж. Не ‘взонг республикæйæн ацы колледжы байгом уыд æнæмæнгхъæуæг, уымæн æмæ 2008 азы августы æгъатыр хæсты фæстиуæгæн пырх æмæ сыгъд æрцыд Цхинвал. Иу уысммæ сæ цæргæ-цæрæнбонты фыдæбон арты æвзæгты хай баисты, куыд горæт Цхинвалы, афтæ нæ республикæйы районты хъæуты сæдæгай цæр-джытæн. Сыгъд æмæ пырх æрцыдысты уагдæттæ, куыстуæттæ дæр. Ныппырхгонд инфраструктурæ, хæдзæртты сæндидзын, ногæй саразыны тыххæй та хъуыд алыгъуызон квалификациджын специалисттæ. 2008 азы нæм кæд æххуысмæ фæзындысты æндæр адæмы хаттыты минæвæрттæ, уæддæр дæ хъуыддагыл дæхæдæг куыд батыхсай, афтæ æцæгæлон, æрцæуæггаг адæймаг кæцæй батыхсдзæн. Бынаты бæрзондквалификациджын кадртæ куы уа, уæд иумиагæй нæ республикæ цырддæр темптæй сæндидздзæн, йæ раздæры хуыз тагъддæр æрцахсдзæн.
Банысан кæнын хъæуы уый дæр, æмæ цыбыр рæстæгмæ ног ахуырадон уагдон кæй ссис популярон æвзонг адæймæгты ‘хсæн æмæ абон йæ рауагъдонтæ æнтыстджынæй кусынц республикæйы арæзтадон объектты, æндидзынгæнæн процессмæ сæ хайбавæрд хæсгæйæ. «Гом дуæртты боны» ахуырадон уагдонмæ фæуазæг сты РХИ-йы Президенты Администрацийы минæвæрттæ, РХИ-йы Ахуырады министры хæстæ æххæстгæнæг Гасситы Натали, йæ хæдивæг Гаглойты Элиса, дзыллон информацийы фæрæзты минæвæрттæ æмæ æндæр уазджытæ. Уыдоныл се ‘ппæтыл дæр колледжы коллектив сæмбæлд рæдау фысымау æмæ сын сæрыстырæй æвдыстой профессионалон-техникон кадрты куырдадзты афæдзы дæргъы сæ бакæнгæ куысты фæстиуджытæ. Колледжы ис 12 ахуыры хайады, куыд зæгъæм, хæринагаразæг, кондитеры, слесары, электрикы, токары, автомобилтæ цалцæг кæныны фæдыл слесары, хуыйæджы, æхсæнадон хæлцы продукцийы технологи æмæ æндæртæ. Ногæй баконд цы дæсныйæдтæ æрцыдысты, уырдæм фæхуыдтой ног ахуыргæнджыты æмæ сын нæй кадрты хъуагдзинад.
Колледжæн цалынмæ сæхи æрмадзтæ арæзт не ‘рцыдысты, уæдмæ студенттæ кондадон практикæты цыдысты республикæйы арæзтадон фæзуæтты, бахъуыд-иу сæ Цæгат Ирыстонмæ ацæуыны сæр дæр. Карзæй лæууыд ахуырадон куырдадзтæ саразыны фарст æмæ 2016 азы ахуыры азы цытджын æгъдауæй сæ дуæрттæ байгом кодта арæзтадон объект. Хицæн уæрæх æмæ ирд хатæнты æрбынат кодтой алыгъуызон дæсныйадты куырдадзтæ. Уыдон иууылдæр ифтонг æрцыдысты нырыккон ифтонггæрзтæй, инвентарæй, ис уазал æмæ хъарм дон, хинайæнтæ, хъæрмадон системæ. Иу дзырдæй практикæ цæуынæн сын ис æппæт уавæртæ дæр. Дыууæуæладзыгон бæстыхайæн йæ иумиаг фæзуат у 980 кв метры. Колледж æмæ куырдадзты бæстыхайы ‘хсæн æвæрд æрцыд тротуарон плиткæ.
«Гом дуæртты боны» колледжмæ хуынд æрцыдысты нæ горæты скъолаты ахуыргæнинæгтæ, афтæ ма республикæйы районты, уыцы нымæцы Къуайсайы скъолаты ахуырдзаутæ дæр. Уагдоны коллектив ахуыргæнинæгты зонгæ кодта цы дæсныйæдтæ сæм ис, уыдонимæ. Сарæзтой сын экскурси куыд куырдадзтæм, афтæ ахуырадон корпусмæ дæр. «Гом дуæртты боны» нысан уыд, цæмæй нæ республикæйы рауагъдонтæ равзарой сæ фидæны дæсныйад æмæ сæ ахуыр адарддæр кæной Цхинвалы бирæпрофилон колледжы.
Хæринагаразæг, кондитеры хайады студенттæ сæ ахуыргæнджытимæ сцæттæ кодтой æмæ фынгтыл равæрдтой алыгъуызон хæрзад хæринæгтæ æмæ адджинæгтæ. Мæнæ куыд фæзæгъынц, сæ фынгтыл, дам, хæйрæджы цæстытæ дæр уыд. Афтæмæй ацы хайады студенттæ фенын кодой ахуыры азы аккаг зонындзинæдтæ кæй райстой æмæ сæ дæсныйадыл кусгæйæ, не ‘мбæстæгтæн æмбæлонæй кæй лæггад кæндзысты, уый.
Бирæпрофилон колледжы директоры хæстæ æххæстгæнæг Тыбылты Джульеттæ нын куыд загъта, уымæ гæсгæ ацы ахуыры азы колледжы ахуыр кодтой 147 студенты. Куы йæ афарстам, зæгъгæ, иууыл фылдæр студенттæ кæцы хайады ис, уæд нын сдзуапп кодта: «Иууыл фылдæр 32 студенты ис хæринагаразæг, кондитеры хайады. Дыккаг бынатыл цæуы электромонтажон хайад. Иууыл къаддæр, ома, æрмæстдæр иу студент ис агрономон хайады. Абон нæм фæуазæг сты нæ горæты æмæ районты скъолаты ахуырдзаутæ. Уырны мæ, уыдонæй бирæтæ сæ фидæны дæсныйад кæй райсдзысты, номхуындæй, нæ бирæпрофилон колледжы. Мах æрвылаз дæр саразæм «Гом дуæртты бон» æмæ афтæмæй нæхимæ æрбахонæм æвзонг адæймæгты. Уый фæстæ сæ бирæтæ свæййынц колледжы студенттæ».
Кондадон ахуыры фæдыл Цхинвалы бирæпрофилон колледжы директоры хæдивæг Хъуылымбегты Лонда загъта: «Хорз уаид æмæ нæ ахуырадон уагдонмæ ноджы фылдæр æвзонг адæймæгтæ куы цæуид сæ фидæны дæсныйад райсыны тыххæй. Колледжы арæзт æрцыдысты æппæт уавæртæ дæр алыгъуызон специалисттæ цæттæ кæнынæн. Уымæй дарддæр ма ифтонг цæуынц æмдзæрæндонæй, хъарм сихорæй. Табуафси, æрбацæут нæм, нæ фæфæсмон кæндзыстут».
Æнæхъæн ахуыры азы цы зонындзинæдтæ райстой, уый фæстиуджытæ фенын кодтой кафеларазджытæ, афтæ ма сварщикы æмæ иннæ хайадты студенттæ дæр. Сварщикы хайады студенттæй сæ иу – Дыгъуызты Хасан куырдадзы æрæвæрдта йæ дипломон куыст, уый ныридæгæн куыст ссардта нæ горæты. Иу дзырдæй, куырдадзтыл азилгæйæ, адæймаджы зæрдæ ради, уымæн æмæ уым практикæ цæугæйæ, сæ дæсныйады иттæг хорз специалисттæ суыдзысты сæдæгай æвзонг адæймæгтæ æмæ лæггад кæндзысты сæ радтæг Ирыстонæн.
Рауагъдонты ныхæстæм гæсгæ, уыдонæй бирæты бафæндыд ног ахуыры азы колледжмæ ахуыр кæнынмæ æрбацæуын.
Джиоты Екатеринæ
Comments are closed, but trackbacks and pingbacks are open.