2-æм февралы РХИ-йы Генералон прокурор Дзæгъиаты Уырызмæг горæты администрацийы æмæ горæты прокуратурæйы органты кусджытæн базонгæ кодта горæты ног снысангонд прокурор Дзабиты Артуримæ.
Райдианы, Генералон прокурор куыд загъта, афтæмæй «Прокуратурæйы органтæ сты нæ республикæйы барадхъахъхъæнæг системæйы ахсджиаг сконды хай. Сæ сæйраг нысан у закъоны уæлбикъондзинад хъахъхъæнын, паддзахад æмæ æхсæнады интерестæ, æмбæстæгты бартæ æмæ сæрибардзинæдтæ нывыл кæнын. прокуратурæйы сæргъ чи лæууа, уый хъуамæ йæ сæйраг хæсыл нымайа коррупци æмæ æндæр хуызы фыдракæндты ныхмæ æнæкомпромиссон тох, адæймæгты бартæ æмæ сæрибардзинад хъахъхъæнын, царды алы къабазы дæр раст фæндæгтæ агурын. Бæрзонд компетентондзинад, службæйон хæсыл æнувыддзинад, намысджын уæвын æмæ принципиалондзинад ахъаз сты функционалон хæстæ æмбæлон бæрзонд профессионалон æмвæзадыл æххæст кæны-нæн».
Дзæгъиаты Уырызмæг ма куыд загъта, афтæмæй фæстаг рæстæджы горæты прокуроры бынат уыд вакантон. Бакæнгæ куыстытæн бæрндзинад, стæй профессионалон æвзыгъд-дзинад кæй нæ фаг кодта, уый тыххæй-иу тæрхондонæй фæстæмæ æрвыст æрцыдысты уголовон хъуыддæгтæ. Мах рагæй архайдтам, цæмæй горæты прокуратурæйы сæргъ сæвæрæм æрыгон, куыстыл æнувыд, йæ разылæууæг хæстæ намысджынæй æмæ арæхстджынæй чи æххæст кæна, иннæтæн дæр цæвиттон чи æвдиса, ахæм адæймаджы.
Уый фæстæ Генпрокурор базонгæ кодта Администрацийы æмæ прокуратурæйы кусджыты Дзабиты Артуры тыххæй зонæнтимæ:
Дзабиты Артур Аликы фырт райгуырд 1984 азы 22-æм августы Цæгат Ирыстон-Аланийы. 1990 азы бацыд Дзæуджыхъæуы 17-æм иумæйаг ахуыргæнæн скъоламæ. Скъола æнтыстджынæй фæуыны фæстæ ахуырмæ бацыд Цæгат Ирыстоны Паддзахадон университеты юридикон факультетмæ. 2007-2008 азмæ службæ кодта Уæрæсейы Федерацийы тыхон структурæты.
2009 азæй куыста РХИ-йы Юстицийы министрады, тæрхоны приставты æххæстгæнæгæй. Ам уый йæхи равдыста æнæкомпромисон, царды æппæт къабæзты дæр закъондзинад хъахъ-хъæнгæйæ. Йæ разылæууæг хæстæ æнтысгæйæ скъуыддзаг кæныны тыххæй, стæй стыр фæндвидардзинад æвдисыны тыххæй уый иу æмæ дыууæ хатты хорзæхджын не ‘рцыд Кады грамотæтæй.
2012 азы конд æрцыд кусынмæ прокуратурæйы органтæм. Ам уый æххæст кодта коррупцион фæдыздæхты хайады фæдагурæджы хæстæ. 2015 азæй та куыста Генералон прокуратурæйы Коррупцион фæдыздæхты хайады хистæр фæдысгарæгæй.
Дзабиты Артур Аликы фырт ма йæ службæйон хæсыл æнувыд кæй у, стæй йæ зонындзинæдтæ æмæ фæлтæрддзинадæй раст кæй пайда кæны, уый сæраппонд дæр хорзæхджын æрцыд бузныджы фыстæ-джытæй.
2016 азы Дзабиты Артур йæ квалификаци фæбæрзонддæр кæныны тыххæй уыд Мæскуыйы.
2017 азы 2-æм февралы РХИ-йы Генералон прокуратурæйы уынаффæмæ гæсгæ, Дзабиты Артур Аликы фырт нысан æрцыд горæт Цхинвалы прокурорæй.
Фыццаг, Дзабиты Артурæн арфæ ракодта Дзæгъиаты Уырызмæг:
«Мæн уырны, ды æппæт бæрндзинадимæ кæй æххæст кæндзынæ, цы хæстæ дыл æвæрд æрцыд, уыдон. Горæты прокуратурæйы куысты фæстиуджытæ хъуамæ дзуапп дæттой нæ адæмы домæнтæн», – дзырдта генпрокурор.
Уый фæстæ та, ног снысангонд прокурорæн раарфæ кодта горæты Администрацийы сæргълæууæг Æлборты Алан.
«Айс мын мæ иууыл зæрдæбындæр æмæ хъармдæр арфæтæ. Горæты прокуратурæйы куыст хъуамæ цæуа барадон фæдыздæхты. 2017 азы мах уардзыстæм, не ‘мбæстæгтæй рады чи лæууы, уыдонæн сæ цæрæнуатон фарстытæ фæхуыздæр кæныны тыххæй, фатертæ. Цæмæй нысанмæздæхтæй уæрст æрцæуой фатертæ, уый тыххæй нæ бахъæудзæн де ‘ххуыс дæр. Æппæт уыдæттæ дæуæн æмæ дæ кусджытæн уыдзысты фыццаградон, кæцыты æнтысгæйæ æххæст кæныныл æз тынг æууæндын дæуыл, уымæн æмæ дæм ис фаг фæлтæрддзинад æмæ куыстуарзондзинад», – загъта Æлборты Алан.
Уазæгты Марфа
Comments are closed, but trackbacks and pingbacks are open.