Фæстаг азты бирæ ивындзинæдтæ цæуы нæ царды хорзæрдæм. Цæрджытæ æнæрахатгæ не сты, нæ горæт бонæй-бон кæй сыгъдæгдæр æмæ рæсугъддæр кæны, уый. Бирæ куыст цæуы йæ хæрзарæзт кæныныл. Ацы аз Инвестпрограммæйы фæлгæтты цы уынгтæ арæзт цæуынц, уыдоны куыст цæуы æнæрынцойæ. Уынгтæ арæзт кæй цæуынц, уый хорз хъуыддаг у, фæлæ горæты рæсугъддзинад хъахъхъæнын æмæ хуыздæр кæнын иууыл уыдонæй кæнгæ нæу. Уый бирæбæрцæй баст у махыл, чи дзы цæры, уыдонæй алкæуыл дæр. Æмæ, табу Хуыцауæн, бамбæрстой нæ адæм ацы хъуыддаг æмæ иу стæмтæй дарддæр ныр алы цæрæгæн хæдзары акомкоммæ дæр тротуартæ вæййынц сыгъдæг, зилынц æмæ сыгъдæгæй дарынц газонты дæр. Ныссадзынц дзы алыгъуызон дидинджытæ, декоративон бæлæстæ æмæ фистæгæй цæуджыты цæстæнгас сæхимæ здахынц. Æмæ канд здахгæ нæ, фæлæ сæ мидзæрдæйы раарфæ кæнынц ахæм хæдзæртты цæрджытæн. Ахæм рæcугъддзинад фенæн ис бирæуæладзыгон хæдзæртты раз дæр.
Горæты уынгты цы цъæхдарæнтæ æмæ алыгъуызон дидинджытæ сагъд ис, уыдонмæ æдзух кæсын, зилын хъæуы. Æмæ уыцы куыст та кæнынц хæрзарæзтады комбинаты цъæхдарæнты хайады кусджытæ. Уыдон хорз æмбарынц дидинджытæм рæстæгыл зылд куынæ цæуа, сæ хус сыфтæртæ сын куынæ ратонай, рæстæгыл сæ куынæ донхæр кæнай, уæд æнæ-рæстæджы кæй бахус уыдзысты. Уымæ гæсгæ сæм æдзух сæ цæст дарынц, зылдцух сæ нæ уадзынц.
Æмæ, уæдæ горæт, сæйраджыдæр, фидауы йæ уынгты рæсугъддзинадæй. Цæмæй мах æхцондзинад исæм, уый тыххæй йыл аудгæ дæр æмæ йæ рæсугъддæр хъуамæ нæхæдæг кæнæм, æмæ уæд, æцæ-гæйдæр, нæ горæт тæмæнтæ скал-дзæн. Нæ горæты уынгтæ дидин-вæлыст кæй кæнынц, уый зæрдæйæн æмæ цæстæн дæр хæссы стыр æхцондзинад æмæ йыл хъуамæ архайа нæ горæты алы цæрæг дæр.
Бестауты Валя
Comments are closed, but trackbacks and pingbacks are open.