Азæй-азмæ рæсугъддæр кæны нæ горæт. Рæсугъддæр та йæ кæнынц, сæ нымæц, фылдæрæй-фылдæр кæмæн кæны, уыцы хæрзарæзт уынгтæ, цæрæн хæдзæрттæ, æндæр æмæ æндæр нысаниуæджы объекттæ. Сæрмагонд хъусдард здæхт цæуы скъолайы агъоммæ кар уагдæттæм. Уыдонæй бирæтæ раууатмæ æрцыдысты хæсты азарæй æмæ бирæ ныййарджытæн фадат нал уыд сæ сывæллæтты рæвдауæндæттæм кæнынæн. Ныр уавæр фæивта хуыздæрæрдæм. Æрмæст фæстаг азты капиталон цалцæг æрцыдысты сывæллæтты фондз рæвдауæндоны. Æмæ, канд цалцæг не ‘рцыдысты, фæлæ ма сæ сифтонг кодтой хъæуæг инвентарь æмæ æндæр æрмæджытæй. Афтæмæй 750 сабийæн фæзынд бынæттæ рæвдауæндæтты.
Уыцы рæвдауæндæттæм ма ноджыдæр бафтдзæнис иу. Уый у Хъайтарты уынджы сывæллæтты 20-æм рæвдауæндон. Уым ныртæккæ цалцæггæнæн куыстытæ куыд цæуынц, уый бабæрæг кæныны тыххæй ардæм æрбацыдысты Хицауады Сæрдар Хъуылымбегты Доменти, горæты администрацийы сæргъ-лæууæг Æлборты Алан æмæ йæ хæдивæг Пухаты Димитр.
Рæвдауæндон Хъайтарты уынджы кæй ис, уымæ гæсгæ йыл æрцыд уæлдай стырдæр зиæнттæ. Уымæн æмæ уæд ууылты Никозы ‘рдыгæй æрбахызтысты гуырдзиаг æфсæдтæ æмæ сæ разæй цы æййæфтой, уыдон сыгътой æмæ пырх кодтой. Ацы рæвдауæндон дæр сыгъд кæй æрцыд, уымæ гæсгæ йæ хъуыд капиталонæй сцалцæг кæнын. Ам ныртæккæ кусджытæ кæнынц æмызмæлд, раивтой агъуыстæн йæ уæлхæдзар, бакодтой йыл пластикон рудзгуытæ, байсæрстой уал ын æддейæ йæ къултæ, цæмæй сæ уазæлттæ ма æрыййæфтаиккой. Ныр та æрæвнæлдтой мидæггагон куыстытæм. Къултæ сыгъд кæй æрцыдысты, уымæ гæсгæ кусджытæй иутæ хафынц рæвдауæндоны къултæ, цæрттæ. Иннæтæ архайынц электрохæххытæ уадзыныл. Кусджытæй иутæ та æрæвнæлдтой къулсæрдæн куыстытæм.
Зæгъын хъæуы уый æмæ ацы объект цалцæг кæнынмæ кæй æрæвнæлдтой фарон. Финансон фæрæзтæ йын хицæн цæуынц паддзахадон бюджетæй. Аразгæ та йæ кæны горæты администраци. Ныртæккæ объекты кусы 29 адæймаджы. Уыдонæй 20 бæрц сты бынæттон кусджытæ. Администрацийы сæргълæууæджы хæдивæг Пухаты Димитр куыд зæгъы, афтæмæй объект кæронмæ арæзт фæуыдзæн фидæн азы февралы мæйы æмæ йæ дуæрттæ æрбакæндзæн 150 сывæллонæн.
Йæ раныхасы Хъуылымбегты Доменти банысан кодта, зæгъгæ, горæты ахуырады хайады сæргълæууæг куыд банысан кодта, афтæмæй бынæттæ нæ фаг кæны 200 сывæллоны бæрцæн. «Æмæ æхсызгон хъуыддаг у нæ сывæллæтты бæрц азæй-азмæ кæй фылдæр кæны, уый. Уымæ гæсгæ Президент Тыбылты Леонид хæслæвæрд радта, цæмæй æрвылаз дæр цалцæг æмæ арæзт цæуой иу кæнæ дыууæ рæвдауæндоны æмæ сывæллæттæн фадат уа, скъолайы агъоммæйы хъомылад исынæн. Рæвдауæндонæн рахицæн æрцыд 13 милуан сомы бæрц, цæмæй кæронмæ арæзт æрцæуа уымæй ноджыдæр нæ къухты бафтдзæнис иу рæвдауæндон», – загъта Хъуылымбегты Доменти.
Уырдыгæй Хицауады Сæрдар æмæ йе ‘мбæлццæттæ ацыдис æмæ бабæрæг кодтой нæ горæты 13 коммунары уынджы цалцæггæнæн куыстытæ куыд цæуынц, уый. Горæты администрацийы сæргълæууæг Æлборты Алан куыд банысан кодта, афтæмæй уынгæн ивд æрцыдысты йæ коммуникацион хæххытæ. Бæстон ист æрцыдис уынгæн йæ уæлцъар, бакодтой йыл асфальтмæ цæттæгæнæн куыстытæ, сæвæрдтой йыл асфальты иу цъар, фæлæ чысыл фæкъуылымпы сты, асфальтаразæн заводы асфальт кæй нæ уагътой, уымæ гæсгæ. Ныр ыл сæвæрдзысты дыккаг фæлтæр дæр. Арæзт æрцыдысты фæндагæн йæ дыууæ фарсæрдыгæй тротуартæ дæр. Ам ма ивд цæуы цы дыууæуæладзыгон цæрæн корпус дзы ис, уый уæлхæдзар дæр. Зæгъын хъæуы уый æмæ æппæт ацы куыстытæ арæзт кæй цæуынц горæты администрацийæн йæхи тыхтæй. Хъуылымбегты Доменти куыд загъта, афтæмæй ацы уынджы сырæзт алкæмæн дæр у уæлдай æхсызгондæр. «Ацы уынг у нæ горæты зæронддæр уынгтæй сæ иу. Нæ зæрдыл нын лæууын кæны рагон горæт. Хæссы 13 коммунары ном. Уыдон тта сæ цард радтой нæ адæмы сæрибардзинады сæрвæлтау. Æмæ уымæ гæсгæ хæсджын стæм, цæмæй йын йæ арæзтадмæ нæ хъус дарæм, аив æмæ йæ рæсугъд кæнæм. Уыцы хæрзиуæгон хъуыддаг та ацы аз нæ къухты бафтыд, æмæ æхцон-дзинад æрхаста канд уынджы цæрджытæн нæ, фæлæ махæй алкæмæн дæр. Йæ хуыз скалдта, бирæ мысинæгтæ йæ номимæ баст кæмæн сты, уыцы зæронд хид дæр. Æцæг ыл стыр уæзласæн машинæтæ ма хъуамæ цæуой», – йæ ныхасы кæрон балхынцъ кодта Хицауады Сæрдар.
Бестауты Валя
Comments are closed, but trackbacks and pingbacks are open.