Хуссар Ирыстоны фæлхасгæнджыты бартæ æмæ хæрзиуджытæ хъахъхъæныны къабазы хъусдарды фæдыл комитет, архайæг санитарон закъондæттынадмæ, афтæ ма «Грипп æмæ æндæр карз респираторон вирусон инфекциты профилактикæйы фæдыл мадзæлтты комплексон план»-мæ гæсгæ иумийагæй республикæйы уадзы мониторинг карз респираторон вирусон инфекциты æмæ гриппы низты фæдыл.

2019 азы 1-æм кварталы дыууæ хатты регистраци æрцыд грипп æмæ карз респираторон вирусон инфекциты низты фæтынг (6 къуыри – 04.02. – 10.02. æмæ 11 къуыри -11.03. – 17.03.).

Æнæсезонон рæстæджы дохтыртæм чи бахатыд, уыдоны нымæц кæй фæкъаддæр, уый хынцгæйæ, РХИ-йы фæлхасгæнджыты бартæ æмæ хæрзиуджытæ хъахъхъæныны къабазы хъусдарды фæдыл комитет 2-æм кварталы 19-æм къуырийæ (06.05. – 12.05.) рахызт æрвылкъуырион мониторингмæ.

3-æм кварталы 37-æм къуырийæ (09.09. – 15.09.) банысанчындæуыд низты чысыл рæзт. Уыимæ банысан кæнын хъæуы, зæгъ-гæ, низты  фæззыгон сезонон рæзт кæй райдыдта 2 къуырийы раздæр, 2018 азы аналогон рæстæгмæ абаргæйæ. Аивгъуыйгæ 42 къуырийы (14.10 – 20.10.) республикæйы хосгæнæн-профилактикон уагдæттæм ме-дицинон æххуысмæ чи бахатыд, уыдоны нымæц уыд 264 адæймаджы, уыцы нымæцы: горæты цæрджытæ – 257 (97%) æмæ хъæууон цæрджытæ – 7 адæймаджы. Сæйраджыдæр, рынчын кæнынц сывæл-лæттæ – 245 адæймаджы (92%). Чи фæрынчын, уыцы сывæллæтты иумийаг нымæцы 80 проценты сты скъолайы кары агъоммæ-йы сывæллæттæ (0 – 2 азы онг – 40%, 3 азæй  6 азы онг – 40%) æмæ скъолайы кары сывæллæттæ 20% (7 азæй 15 азы онг). 2019 азы январæй  абоны онг Хуссар Ирыстоны фæлхасгæнджыты бартæ æмæ хæрзиуджытæ хъахъхъæныны къабазы хъусдарды фæдыл комитеты регистраци æрцыд æнæрынчындоны пневмонийы 117 цауы, уыцы нымæцы: 1-æм кварталы – 57 адæймаджы, 2-æм кварталы – 35 адæйма-джы, 3-æм кварталы – 14 адæймаджы, 4-æм кварталы (октябрь) – 11 адæймаджы.

Æппæт рынчынтæ дæр, сæйраджыдæр, сты æнæрынчындоны пневмониимæ, гриппы ныхмæ прививкæтæ чи нæ сарæзта æмæ медицинон æххуысмæ рæстæгыл чи нæ бахатыд, ахæм адæймæгтæ.

РХИ-йы фæлхасгæнджыты бартæ æмæ хæрзиуджытæ хъахъхъæныны къабазы хъусдарды фæдыл комитет зæрдыл лæууын кæны, зæгъгæ, ныртæккæ республикæйы Æнæниздзинад хъахъхъæныны ми-нистрад сорганизаци кодта компани гриппы ныхмæ цæрджыты иммунизацийы тыххæй. Вакцинæйы сконды сты грипп «А» æмæ «Б» вирусты штаммтæ, кæцытæ зилдух кæндзысты ацы сезоны дæр. Вакцинаци уагъд цæуы æнæаргъæй. Кæй фæнды, уыдонæн се ‘ппæтæн дæр сæ бон у гриппы ныхмæ прививкæ саразыны тыххæй горæт Цхинвалы  æмæ республикæйы районты хосгæ-нæн-профилактикон уагдæттæм бахатын. Абоны бон æппæт дунейы дæр гриппæй æмæ йæ фæтынгæй хи бахизыны иунæг амал у прививкæ. Адæймаг, прививкæ саразыны фæстæ, æгæрыстæмæй, гриппæй куы фæрынчын уа, уæддæр низы фæтынг уыдзæн тынг ныллæг. Æнæниздзинад хъахъхъæныны дунеон организацийы бæрæг-гæнæнтæм гæсгæ, сезонон грипп æнæа-ивгæйæ уыд æмæ баззад æппæт адæймагадæн мæлæтхæссæг тæссагдзинадæй. Вирус кæд бахъыгдары æппæт органты дæр, уæддæр арæхдæр бандавы зæрдæ-дадзинты æмæ рæуджыты системæтыл. Грипп æмæ карз респираторон вирусон инфекциты низты фæдыл тасдзинады къорды уæлдай тынгдæр сты сывæллæттæ, сывæрджын сылгоймæгтæ, ацæргæ адæм, ома, уыцы адæймæгты къорд, кæцытæн сæ иммунитет у ныллæг.  Грипп уæлдай тæссагдæр у, зæрдæ-дадзинты æмæ улæфæн системæтæ, сæкæры диабет, уæлдай уæзы –  хроникон низтæй рынчын адæймæгтæн. Ахæм адæймæгтæ арæхдæр фæрынчын вæййынц уæззаудæр вирусон пневмонийæ. Адæймаг афоныл куынæ бахата дохтыртæм кæнæ та хæдзары йæхицæн йæ-хæдæг куы хос кæна, уæд уый æркæны мæлæты цаутæм дæр. Хъыгагæн, 2019 азы ахæм цаутæ нæ республикæйы уыд цалдæр.

Ныййарджыты хъусдард здахæм уымæ,  æмæ грипп æмæ карз респираторон вирусон инфекцийæ уæлдай тынгдæр кæй рынчын кæнынц сывæллæттæ. Арæхдæр бинонтæм инфекци æрбахæссы сывæллон скъолайæ кæнæ скъолайы кары агъоммæйы уагдæттæй, цыран вæййы бирæнымæц сывæллæттæ. Уымæ гæсгæ нæ хъæуы гриппæй рынчын сывæллоны скъоламæ кæнæ сабидонмæ уадзын. Уый гæнæн ис æмæ февзæрдæр кæна æрмæст йæхи æнæниздзинад нæ, фæлæ ма грипп бахæцын кæна иннæ сывæллæттыл дæр.

Æнæмæнгхъæуæг у зæрдыл дарын, грипп æмæ карз респираторон вирусон инфекциты профилактикæйы æнæспецификон методты тыххæй: иммунитет фидардæр кæнын: раст хæлц хæрын, физкультурæйæ архайын, ног халсæрттæ æмæ дыргътæ хæрын, витаминтæ нуазын; хи-сæрмагонд гигиенæйы фæткойтæ  хъахъ-хъæнын; рынчын адæймагимæ контакты рæстæджы иу хатт йедтæмæ пайдагæнæн кæмæй нæй, ахæм маскæтæ дарын; регулярон æгъдауæй хатæн уымæл хæцъилæй æфснайын, уæлдæф æм уадзын. Кæд уæддæр фæрынчын стут æмæ уын ис ахæм симптомтæ, куыд: бæрзонд тæвд, сур хуыфæг, иумийаг лæмæгъдзинад  (риссынц хæцъæфтæ æмæ æрхджытæ), уæд уын фидарæй рекомендаци кæнæм, цæмæй уæхицæн уæхæдæг ма хос кæнат, фæлæ æвæстиатæй фæдзурат фадыгон дохтырмæ кæнæ та тагъд медицинон æххуысы бригадæмæ, кæцытæ бынаты сбæрæг кæндзысты хоскæныны дарддæры тактикæ.

КОЦТЫ Маринæ,

Хуссар-Ирфæлхасхъусдарды

комитеты сæрдар

Comments are closed, but trackbacks and pingbacks are open.