Ацы аз, сентябры мæйы 65 азы æххæст кæны поэт, прозаик Гуыцмæзты Алешы райгуырдыл. Ивгъуыд къуыри Цхинвалы районы Джеры хъæууон библиотекæ æмæ Культурæйы хæдзары кусджытæ Гуыцмæзты Алфезæ æмæ Æлборты Таня бацæттæ кодтой мадзал — юбилейон мысæн изæр.

Мадзалы хайад райстой Алешæн йæ райгуырæн комы цæрджытæ, æввахс хъæуты скъолаты ахуыргæнджытæ æмæ ахуыргæнинæгтæ, Цхинвалы районы администрацийы культурæйы хайады сæргълæууæг Гаглойты Ростик æмæ ацы хайады кусджытæ. Хуынд æрцыдысты Ирыстоны Фысджыты Цæдисы æмсæрдар Хъазиты Мелитон, Республикæ Хуссар Ирыстоны Культурæйы министры хæдивæг Дзеранты Джульеттæ, Культурæйы министрады библиотекон хъуыддæгты фæдыл сæйраг специалист Дриаты Нателæ, Гуыцмæзты Алешæн йæ идæдз Кокойты Эльзæ, поэт Туаты Ленæ.

Мадзал байгом кодта библиотекæйы сæргълæууæг Гуыцмæзты Алфезæ. Уый банысан кодта, зæгъгæ, ацы аз Гуыцмæзты Алешыл сæххæст уыдаит 65 азы. Уый ацы комы райгуырд. Кæд уый не ‘хсæн нал ис, кæд ын знаджы нæмыг аскъуыдта йæ цардбæллон уд, уæддæр йæ фæлгондз æдзухæй дæр ис нæ цæстыты раз, йæ ном, йæ хъуыдытæ, йæ уацмысты хъайтартæ цæрынц немæ. Уыдон нæ кæнынц царды сæ фæдыл размæ. Хъал нын кæнынц нæ зæрдæты рухс æнкъарæнтæ.

Гуыцмæзты Алешы цард æмæ сфæлдыстадыл цыбыртæй æрдзырдта Цхинвалы районы культурæйы хайады Централон библиотекæйы директор Уалыты Нанули.

Ирыстоны Фысджыты Цæдисы æмсæрдар Хъазиты Мелитон уыд Алешы æввахс æмбал. Йæ раныхасы уый æрымысыд цалдæр цауы фыссæджы цардæй. Анализ ын скодта йе сфæлдыстадон фæндагæн. Банысан кодта, зæгъгæ, Алешы роман «Дæ уды фарн» (журналон вариант «Матрона»), кæцы тæлмац æрцыд уырыссаг æвзагмæ, гæнæн ис, æвæрд æрцæуа советон æмæ фæсарæйнаг классикты серьезон уацмысты æмрæнхъ. Алеш æнтыстджын куыст кодта сывæллæтты литературон жанры. Фыста сын æмдзæвгæтæ, ра-дзырдтæ, аргъæуттæ.

Фыссæгæн йæ царды фæстаг азты трагикон цаутæ нал радтой фадат æххæстæй йæ курдиат райхалынæн.

— Йæ адæмы фидæн уыд йæ катай, йæ мæт, — зæгъы Хъазиты Мелитон. — Бирæ бантыст Алешæн, фæлæ йын ноджы фылдæр бантыстаид, абон æй чи зоны, уымæй ноджы фылдæр адæм æй зониккой.

Сценæмæ рахызт фыссæджы идæдз Кокойты Эльзæ. Йæ зæрдæ уынгæг кодта, афтæмæй раарфæ кодта æмæ бузныджы ныхæстæ загъта мадзалы организатортæн, æрæмбырдуæвджытæн, мадзалы хайадисджытæн. «Алеш уарзта Ирыстоны, фæндыд æй, ирон дзырд кæддæриддæр нæргæ уа æмæ алчи дæр хъуамæ ууыл архайа, цæмæй ноджыдæр нæргæ уа æмæ йæ нæ кæстæрты кæстæртæм дæр дæттæм», — загъта Кокойты Эльзæ.

Гуыцмæзты Алешы цард æмæ сфæлдыстады тыххæй ма сæ хъуыдытæ загътой республикæйы Культурæйы министры хæдивæг Дзеранты Джульеттæ, районы администрацийы культурæйы хайады сæргълæууæг Гаглойты Ростик.

Дменис, Сатихъар æмæ Хелцуайы библиотекæты активон чиныгкæсджытæ Гуыззыдтаты Сослан, Дыгъуызты Моникæ æмæ Виктория, Асаты Заринæ, Джиголаты Марат æмæ Моникæ æмæ æндæртæ аив бакастысты æмдзæвгæтæ.

Мадзал музыкалон номыртæй барæсугъд кодтой Цхинвалы районы администрацийы культурæйы хайады зарæггæнджыты къорд «Арвырон» (Джиголаты Ларисæ, Хацырты Земæ), фæндырдзæгъдæг Æлборты Шоренæ, зарæггæнæг Хуыгаты Джамболат.

Нæ уацхæссæг

Comments are closed, but trackbacks and pingbacks are open.