Не ‘мбæстæгтæ фæсарæнты

 

Ныртæккæ Китайы цæрæг не ‘мбæстаг æвзонг лæппу Хъотайты Батрадз, у канадаг цирк «Кавалия» æмæ Китайы интернационалон цирчы артист. Уый рæстæгмæ æрцыд йæ райгуырæн бæстæмæ æмæ йын 10-æм октябры нæ республикæйы Информаци æмæ мыхуыры комитеты пресс-центры уыд фембæлд бынæттон журналисттимæ. Фембæлды рæстæджы уый журналисттæн базонгæ кодта комитеты сæрдар Хъотайты Мария.

Батрадз бæстон æрдзырдта, дард Китаймæ бынтон æнæнхъæлæджы хуынд куыд æрцыд, уый тыххæй. Уæд, æртæ азы размæ уый куыста нæ республикæйы паддзахадон ансамбль «Симд»-ы. Уыцы рæстæджы йын йæ мобилон телефоны руаджы фехъусын кодтой, зæгъгæ, йæ хонынц кусынмæ Китайы стырдæр æмæ зынгæдæр циркмæ. Уыцы хабар нырма худæгау фæкаст Батрадзмæ, фæлæ лæмбынæг семæ куы аныхас кодта, уæд æй бафæндыдис Ирыстонæн æддейæ йæ тыхтæ бафæлварын. Йæхæдæг дæр ацы хъуыддагыл тынг фæдис кодта, абоны онг дæр æй нæ зоны, цæмæ гæсгæ йæм æрхауд ахæм амонд, цæмæй Китайы цирчы артист суыдаид.

Китайы  баззадис иу афæдз æмæ æрдæг, курдиатджын лæппу уыцы рæстæджы Китайы интернационалон цирчы уæвгæйæ, йæхиуыл куыста зæрдиагæй, кæд æй кафынмæ фæхуыдтой, уæддæр ма уый ноджы сахуыр ис бæхыл бадгæйæ алыгъуызон номыртæ æвдисын. Сахуыр ма кодта китайаг æвзаг дæр. Йæ архайдæй барухс кодта цирчы къухдариуæггæнæджы зæрдæ дæр æмæ йын аккаг аргъ скодтой йæ архайдæн циркмæ кæсджытæ дæр.

Китайаг интернационалон цирчы фæстæ та хуынд æрцыд æмæ абон йæ куыст кæны Китайы канадайаг цирк «Кавалия»-йы. Ныртæккæ та къух æрфыста контрактыл æндæр цирчы къухдариуæггæнджытимæ.

Журналистты ма бацымыдис кодта, зæгъгæ, сценæйыл кафын зындæр у æви цирчы аренæйыл архайын. Хъотайты лæппу ахæм дзуапп радта, зæгъгæ, дыууæ хъуыддаджы дæр хъæуы, сценæмæкæсæгæн зæрдæбынæй дæ арæхстдзинад радæттын, хъæуы ма дзы хорз фердæхтдзинад æмæ профессионалондзинад.

Радтой  йæм ахæм фарст дæр, зæгъгæ, ма Китайы цирчы ирæттæ ис, æви нæ.  Уый куыд загъта, афтæмæй дзы цалдæр ирон лæппуйыл фембæлдис. «Фыццаг уыдыстæм æртæ иронæй, уый фæстæ ма нæм æрбафтыдис дыууæ ирон лæппуйы», – загъта Хъотайты Батрадз.

Цирчы дæ архайды рæстæджы ирон кафты элементтæй фæпайда кæныс, зæгъгæ, йæм ахæм фарст дæр радтой нæ журналисттæ.  Уый сын загъта, зæгъгæ, арæх бахæссы ирон мотивтæ. Бафарстой ма йæ, «Фыццаг рæстæджы йæм фæс-мондзинад  сæвзæрдис, Китай-мæ æрцæуыны  тыххæй”.

– Кæй зæгъын æй хъæуы, фыццаг рæстæджы мын зын уыдис цирчы артист суæвын. Фæлæ мæ разы фидарæй æрæвæрдтон хæс, зæгъгæ, ме ‘рцыд æнæхъуаджы ма хъуамæ фæуа æмæ мæхиуыл фидарæй бакуыстон. Æгæрыстæмæй, уым бынтон æндæр æрдзон уавæртæ ис, фæлæ уый дæр æнцонæй сфæрæзтон, ме ‘нæниздзинады иумиаг уавæ-рыл нæ бандæвта.

Хъотайты лæппу дæргъвæтин рæстæджы фæныхас кодта журналисттимæ. Йæ ныхасы фылдæр хайы æвдыста æмæ дзырдта йæ Райгуырæн бæстæмæ уарзондзинады æнкъарæнтыл. Уый немæ ныхасгæнгæйæ сæрыстырæй банысан кодта, зæгъгæ, бирæ стыр бæстæты уыди, фæлæ дзы Ирыстонæй рæсугъддæр нæй, куыд йæ адæм, йæ æрдз, афтæ нæ адæмы æгъдæуттæй дæр. «Кæмфæнды ма уон, уæддæр Ирыстон кæддæриддæр ис мæ зæрдæйы. Кæд ныртæккæ дард бæстæйы дæн, уæддæр мæ фидæн уынын  Ирыстоны», – загъта уый.

Ирон джигитæн ма йе стыр бæллиц у фидæны Хуссар Ирыстоны бæхты театр саразын.

Ныртæккæ Батрадзæн цирчы йæ къах кусгæ-кусын ацъæл ис, уымæ гæсгæ уал йæ æнæниздзинадмæ гæсгæ куыстæй у сæрибар æмæ йын йæ Райгуырæн бæстæм æрцæуыны рæстæг дæр фæцис.

Хъотайты Батрадзæн йæ фыдæлтæ сты Чеселтæй рацæугæ, йæ хиуæттæ ныртæккæ цæрынц Цхинвалы, йæхæдæг йæ ныййарджытимæ хæрзчысылæй цæрынмæ ацыдис Цæгат Ирыстонмæ, астæуккаг скъола дæр каст фæцис уым. Каст фæцис æртæ уæлдæр ахуыргæнæндоны. Нæ паддзахадон ансабль «Симд»-ы размæ та кафыдис Абхазы кафты паддзахадон ансамблы, Цæцæны паддзахадон ансаблы æмæ Краснодары паддзахадон ансамбль «Казачья вольница»-йы.

Фæлæ Батрадз кæмфæнды куы уа, уæддæр йæ зæрдæ вæййы Хуссар Ирыстоны.

Уæдæ не ‘взонг æмæ курдиатджын артистæн нæ зæрдæ зæгъы ноджыдæр фылдæр сфæлдыстадон æнтыстытæ æмæ йын Хуыцау йæ фæндтæ рæстмæ фæкæнæд.

Туаты Ларисæ

Comments are closed, but trackbacks and pingbacks are open.