Карбаг кризисыл сæххæст 60 азы

60 азы размæ, 1962 азы октябры райдыдта Советон Цæдис æмæ АИШ-ы ‘хсæн ныхмæлæуд. Ацы тæссаг эпизод историографийы райста «Карибаг кризис»-ы ном. Уæд реалонæй тас уыд термоядерон хæст райдайынæй, кæцыйы фæстиуæгæн чысыл ма бахъæуа дуне ядерон хуыдымы бахаудаид.

Карибаг кризисы аххосаг уыд 1961 азы Иугонд Штаттæ Туркы астæуккаг дæрддзæджы ракетæтæ «Юпитер»-тæ кæй равæрдтой, уый. Америкæйаг хæцæнгарз здæхт уыд Советон Цæдисы ныхмæ æмæ йæ бон уыд 20 минутмæ Мæскуыйы скуынæг кæнын.

Конфликт ахаста дыууæ къуырийы — 16-æм октябрæй 27-æм октябрмæ. Уæд америкæйаг тæссагдзинады ныхмæ мадзæлттæ райсыны тыххæй Хуссар Ирыстоны территорийыл дæр равæрд æрцыд ядерон боеголовкатимæ тактикон ракетæтæ «Р-12»-ы дивизион, кæцытæн сæ бон уыд Турчы АИШ-ы авиабазæтæ æмæ «Юпитер» ракетæты позицитæ ныццæвын. Уыцы рæстæджы ма АИШ план кодта Кубæмæ бабырсын æмæ Фидель Кастройы раппарын. Уый размæ ацы операци саразынмæ бафæлвæрдтой кубæйаг контрреволюционертæ, фæлæ сæ фæнд фæсыкк. Ныр уавæр «рараст» кæнын план кодтой АИШ-ы гарзджын тыхтæ. Фидель Кастро паддзахадон сразыдзинæдты фæлгæтты бахатыд Советон Цæдисмæ æфсæддон æххуысы тыххæй. Советон Цæдис Сæрибары сакъадахмæ арвыста æрмæст мотоæхсæг, бронетанкон хæйттæ æмæ Æфсæддон Уæлдæфон тыхтæ нæ, фæлæ ма ядерон хæстон зарядтимæ ракетæтæ дæр. Æфсæдты æмæ техникæйы денджызыл кæй æрвыстой, уымæ гæсгæ дæргъвæтин рæстæджы америкæйæгтæ ницы зыдтой.

Кубæйы АИШ-ы хæстон агрессийæ бахъахъхъæнын йæ бон уыд æрмæстдæр Советон Цæдисæн.

Уый уыд æцæг реалон тæссагдзинад, кæцыйæн советон къухдариуæгад хъуамæ радтаид æмбæлон дзуапп. Афтæмæй планетæйы дыууæ гиганты цæттæ уыдысты мæлæтдзаг тохы бацæуынмæ. 1962 азы 22-æм октябры АИШ-ы президент Джон Кеннеди фехъусын кодта Кубæйы алыварс денджызон блокадæ кæй аразы, уый тыххæй. Советон Цæдисы хицауад дзуап-пæн фехъусын кодта, зæгъгæ, сæ ныккæндзæн «иууыл тыхджындæр дзуаппон цæф». Хæстон цæттæдзинадмæ конд æрцыдысты Советон Цæдисы æппæт Гарзджын тыхтæ. Кубæйаг æфсæдтæ æрæмбырд сты уæлдай тæссагдæр донбылгæрæтты, хъахъхъæд цыдысты æппæт ахсджиаг объекттæ, хидтæ, электростанцтæ æмæ æндæртæ. Гаванæйы фæзуæтты æвæрд æрцыдысты зенитон хæцæнгæрзтæ, кæцытæ æхстой америкæйаг хæдтæхджыты. Уыцы бон æвæстиатæй ауагъд æрцыд ИНО-йы Æдасдзинады советы рабадт, цыран уынаффæ кодтой Кубæйæ советон ракетæтæ ракæныны тыххæй æмæ Кубæмæ АИШ-ы бабырст ма бауадзыныл.

Цаутæ цыдысты динамикон æгъдауæй. АИШ æмæ Советон Цæдисы сæргълæуджытæ кæрæдзимæ æрвыстой æндыгъд ныстуантæ. Карибаг кризисы кульминаци æрбалæууыд 27-æм октябры. Советон зенитонтæ æрæппæрстой америкæйаг хæдтæхæг-развæдсгарæг U-2. Тæхæг Рудольф Андерсон фæмард.

Плиты Иссæ — операци «Анадырь»-ы командæгæнæг

Советон æфсæдтыл командæ кодта номдзыд ирон инæлар Плиты Иссæ, кæцыйы хуыдтой «инæлар Павлов» (псевдоним). Карибаг кризисы стыр нысаниуæг уыд ирон адæмы зынгæ фырт Плиты Иссæйы архайдæн. Плийы фырты адæм зонынц, куыд Советон Цæдисы дыууæ хатты хъайтар, афтæ, фæлæ алчи нæ зоны, 1962 азы Плиты Иссæ нысан кæй æрцыд Кубæйы советон æфсæдты операци «Анадырь»-ы командæгæнæгæй. Плиты Иссæ уый фæстæ дзырдта, зæгъгæ, Кубæмæ тахтысты Африкæйыл уыцы рæстæджы иууыл стырдæр хæдтæхæг «Руслан»-ыл.

АИШ-ы фæнд кодтой проблемæ тыхон æгъдауæй аскъуыддзаг кæнын

22-æм октябры Кеннеди ралæууыд адæммæ сидтимæ, цыран фехъусын кодта Кубæйы советон размæбырсæн хæцæнгæрзты уæвынады тыххæй. Иугонд Штатты адæм уайтагъд паникæйы ныххаудтой. Райдыдта Кубæйы блокадæ. Советон фарс нæ састис сакъадахы советон ядерон хæцæнгарз кæй равæрдта, ууыл. 25-æм октябры ракетæты нывтæ равдыстой ИНО-йы Æдасдзинады Советы рабадты. Урс хæдзары уынаффæ цыд проблемæ тыхон æгъдауæй аскъуыддзаг кæныны вариантыл æмæ хæст райдианы фарсхæцджытæ Кеннедийæн уырнын кодтой куыд гæнæн ис афтæ тагъддæр Кубæйы уæлдæфон цæф ныккæныны тыххæй. Фæлæ АИШ-ы хæдтæхæг-развæдсгарæг U-2 радон атахты рæстæджы дызæрдыггаг нал уыд, советон ракетæтæй цалдæр æвæрд æмæ цæттæ кæй сты фехсынмæ. Æмæ тыхон архайдтытæ та æнæмæнгæй дæр æркодтаиккой стыр хæстмæ.

Ирон лæгыл баст уыд æнæхъæн бæстæты æмæ адæмты хъысмæт

Советон æфсæдты фæкъуындæгдæргонд контингенты Плиты Иссæйы дæлбар уыдысты дыууæ ракетон дивизийы, дыууæ зенитон-ракетон дивизийы, цыппар хицæн мотоæхсæг, вертолетон æмæ ракетон полктæ æмæ дыууæ денджызон эскадрæйы. Иссæ Александры фыртæн лæвæрд æрцыдысты стыр бартæ, хи цæстæнгасмæ гæсгæ суанг ядерон хæцæнгарзимæ ракетæтæй спайда кæныны онг. Рауад афтæ, æмæ ирон лæгыл баст уыд æнæхъæн бæстæты æмæ адæмты хъысмæт. Армийы инæлар, Советон Цæдисы дыууæ хатты хъайтар Плиты Иссæ у адæймагады историйы иунæг адæймаг, кæцыйæн бар радтой ядерон хæцæнгарзæй спайда кæныны тыххæй советон къухдариуæгадимæ æнæ бауынаффæ кæнгæйæ.

Ирыстоны номдзыд хъайтар Карибаг кри-зисы критикон рæстæджы дæр равдыста стыр дипломат-гуманисты куырыхондзинад æмæ æппæт тыхтæ дæр радта æртыккаг дунеон хæст аиуварс кæныны тыххæй. Ахæм уавæрты æрмæстдæр цалдæр адæймаджы фидардзинад æмæ хъайтардзинад баххуыс кодтой ахæм катастрофæ ма æруадзынæн, кæцы нæма федта дуне æмæ уыдоны ’хсæн уыд ирон лæг дæр. Плиты Иссæмæ Кубæмæ æртахт Советон Цæдисы Уæлдæр Советы минæвар Микоян.

Карибаг операцийы хайад истой æндæр ирæттæ дæр

Плиты Иссæйæ дарддæр ма Кубæйы уыд бирæ ирæттæ, кæцытæ уыцы рæстæджы службæ кодтой Советон Æфсады рæнхъыты. Кубæйы Плиты Иссæ цы æфсæдтыл командæ кодта, уым уыд артиллерист, булкъон Гасситы Ахмæт æмæ бирæ æндæр ирон афицертæ, салдаттæ. Советон салдаттæ Кубæмæ цыдысты æмбæстагон уæлæдарæсы æмæ æфсæддон лагертæй æддæмæ нæ хызтысты. Уыцы азты Сæрибары сакъадахы испайнаг æвзагæй Плиты Иссæйы тæлмацгæнæг уыд Гаванæйы университеты рауагъдон, цхинвайлаг Джиоты Владимир. Мотоæхсæг дæлхайы службæ кодтой ноджы дыууæ ирон æфсæддон службæгæнæджы Тедеты Георги æмæ Цоциты Эльбрус. Кубæйаг арв чи хъахъхъæдта, уыдоны нымæцы уыд зынгæ æфсæддон тæхæг Галуанты Илья. Проекты донбындзу наутæй иуы службæ кодтой Дзауы районы Хуыцъейы хъæуккаг Харебаты Зельдик æмæ дменисаг Бестауты Хъазбег дæр. Хъыгагæн, кубæйаг операцийы ирæттæй хайад чи иста, уыдонæй ма сæрæгас сты æрмæстдæр цалдæрæй.

Кризис аскъуыддзаг сабырадон æгъдауæй

АИШ-ы президент Джон Кеннеди йæ фæндон загъта Советон Цæдисæн сæ ракетæтæ сисыны æмæ Кубæмæ цæуæг советон науты фæстæмæ раздахыны тыххæй. Уыимæ сын АИШ гаранти радта Кубæмæ кæй нæ бабырсдзысты æмæ Фидель Кастройы режим кæй нæ раппардзысты, уымæй. Афтæ ма АИШ баныфсæвæрдтой Туркæй америкæйаг ракетæтæ ракæныны тыххæй дæр. Советон Цæдисы Коммунистон партийы Централон комитеты фыццаг секретарь Никита Хрущев сразы ис сæ фæндыл æмæ 1962 азы 28-æм октябры райдыдта советон ядерон ракетæты демонтаж. 31-æм октябры ИНО-йы Генералон нымæрдары хæстæ æххæстгæнæг У Тан æрцыд сакъадахмæ конфликты фæстиуджытæ æрбæстон кæныны тыххæй æмæ йын фехъусын кодтой баллистикон ракетæты демонтажы тыххæй. Афтæмæй Æртыккаг дунеон хæст райдайыны тæссагдзинад иуварсгонд æрцыд, кæцымæ егъау хайбавæрд бахаста Плиты Иссæ.

Карибаг кризис æрцыд 60 азы размæ. Фæлæ абон дæр у тынг актуалон, дунейы уавæр у æндыгъд Украинæйы нацистты аххосæй. Хуыцау зæгъæд æмæ та ам дæр кризис сабырадон æгъдауæй скъуыддзаг цы æрцæуа, науæд ядерон хæсты уæлахиздзаутæ нæ вæййы…

ДЖИОТЫ Екатерина

Comments are closed, but trackbacks and pingbacks are open.