2017 азы декабры кæрон мыхуыры рацыд фыссæг, Ирыстоны Фысджыты цæдисы æмсæрдар Хъазиты Мелитоны 6-томон «Ирон литературæйы истори»-йы 2-аг чиныг (Ирон прозæйы æндидзæн рæстæг). Чиныджы зонадон редактор у Безаты Ф., рецензенттæ та –  (дзæнæттаг) Джусойты Нафи – филологон зонæдты доктор, профессор æмæ Биазырты Аллæ – филолгон зонæдты кандидат, ХИПУ-йы доцент. Рауагъд конд у аст сæрæй. Фыццаг – «Ирон прозæйы æндидзæн рæстæг», дыккаг – «Зæрдæмæ бадзурыны фаг рæстдзинад», æртыккаг – «Хъæууон прозæйы дæсны», цыппæрæм –  «Куырыхон лæджы прозæ», фæндзæм – «Намысимæ цæргæйæ», æхсæзæм –  «Историйы азхынцæг», æвдæм – «Фарны нысанимæ»  æмæ æстæм сæр та – «Литературæйы зиууонтæ».

Чиныгмæ хаст æрцыдысты фысджытæ Цæгæраты Максим, Букуылты Алыкси, Æгъуызарты Æхсарбег, Мæрзойты Сергей, Булкъаты Ми-хал, Бицъоты Грис, Богазты Умар, Биазырты Димитр, Гæбулты Мелитон, Хæблиаты Сафар, Къæбысты Зауыр æмæ Дауыраты Дамиры биографитæ æмæ се сфæлдыстадыл афæлгæст.

Уый размæ  2013 азы та мыхуыры рацыд «Ирон литературæйы историйы» 1-аг чиныг (Ирон ны-вæфтыд литературæйы æндидзæн дуг), уырдæм бацыдысты Гафез, Дзугаты Георги, Мыртазты Барис, Цæрукъаты Алыксандр, Мæргъиты Къоста, Джусойты Нафи, Дарчиты Дауыт, Цырыхаты Михал, Асаты Реуаз, Тетцойты Таймураз, Нартыхыты Михалы биографитæ æмæ се сфæлдыстадыл афæл-гæст. Æхсæзтомоны 4-æм чиныг (Ирон поэзийы æвзист рæстæг) та рухс федта 2015 азы. Хаст æм æрцыдысты Козаты Исидор, Дзаболаты Хазби, Бестауты Гиурæги, Дзуццаты Хадзы-Мурат, Дзассохты Музафер, Хостыхъоты Зинæ, Тедеты Ефим, Гæджиты Георги, Харебаты Леонид, Уырымты Петя, Бахъаты Нугзар æмæ Плиты Феликсы  биографитæ æмæ се сфæлдыстадыл афæлгæст. «Ирон литерату-рæйы истори»-йы 5-æм чиныг (Ирон поэзийы сыгъзæрин рæстæг) та мыхуыр æрцыд 2016 азы æмæ йæм автор бахаста Хуыгаты Сергей,  Хъодзаты Æхсар, Малиты Васо, Скифирон (Тедеты Рюрик), Æлборты Хъадзы-Умар, Джыгкайты Шамил, Ходы Камал, Ситъохаты Саламджери, Икъаты Владимир, Чеджемты Æхсар, Хъодалаты Герсан, Чеджемты Георы биографитæ æмæ се сфæлдыстадыл афæлгæст.

Автор  «Ирон литературæйы истори»-йы 1-аг чиныджы йæ разныхасы фыссы: «Цард афтæ сфæлдыстæуыд, æмæ алцæмæн дæр, стæй алкæмæн дæр, ис йæхи райдайæн æмæ кæрон. Ацы чиныг саразыны хъуыды дæр, æнæнхъæлæджы нæ фæзынд. Нырыккон ирон литературæйы уроктæ уадзын, аразын, лекцитæ кæсын кæй фæхъæуы, уыдонæн нæй, иннæ предметтæй куыд ис, афтæ цæттæ æрмæджытæ нæ зонадон литературæйы. Уымæ гæсгæ скъолайы  æмæ уæлдæр ахуырадон ахуыргæнæндæтты ирон литературæ чи амоны фæси-вæдæн, уыдон зын уавæры бахауынц. Гъе, уый тыххæй ацы чиныг саразын уыд æнæмæнг хъуыддаг».

Автор йæхимæ райста ахсджиаг чиныг саразыны бæрнон хæс æмæ йын æнтысгæ дæр бакодта. Æхсæзтомонæй æнцонæй пайда кæндзысты ахуыргæнджытæ, студенттæ, ахуыргæнинæгтæ, ирон аив дзырдыл иузæрдион чи у, уыдон се ‘ппæтдæр. Хъазиты Мелитон стыр куыст бакодта æмæ дзы бузныг сты æмæ уыдзысты чиныгæй пайдагæнджытæ се ‘ппæт дæр, уымæн æмæ æхсæзтомоны ссарæн уыдзæн Ирыстоны фысджыты биографиты æмæ сфæлдыстады тыххæй. Мæнгæй йын йæ чингуытæй сæ иуы презентацийы рæстæджы РХИ-йы раздæры Президент Тыбылты Леонид куынæ загъта мый-йаг, зæгъгæ, уый æппæт чингуытæ уадзыныл бирæ фыдæбон, бирæ рæстæг  хъæуы, æвæццæгæн, æхсæвыгæтты дæр кусгæ фæкæныс æмæ ма, зæгъ, уæд фынæй та кæд фæкæныс. Хъазиты Мелитоны ныхæстæм гæсгæ ацы цыппар томы рухс федтой ирон æвзаджы рæзты фæдыл РХИ-йы Хицауады цур къамис цы программæ бакуыста, уый фæлгæтты. Хъæуы ма иннæ дыууæ томы дæр  рауадзын, фæлæ автор куыд банысан кодта, уымæ гæсгæ сæ хъысмæт баст у финансон фæрæзтимæ æмæ кæд афоныл хицæн æрцæуой, уæд уыдон дæр рухс фендзысты æввахс рæстæджы, уымæн æмæ дыууæ томы дæр цæттæ сты мыхуырмæ. Хъазийы фырт куыд загъта, уымæ гæсгæ рухс  цы чингуытæ федтой, уыдон дих æрцыдысты нæ республикæйы библиотекæтыл, афтæ ма  скъолаты библиотекæтыл дæр.

Автор егъау хуын бахаста ирон литературæйы зонады къæбицмæ æмæ Хуыцау зæгъæд, æмæ йын дарддæр дæр ноджы уæзгæ хуынтæ бахæссын цы бантыса.

Джиоты Екатеринæ

Comments are closed, but trackbacks and pingbacks are open.